ဘာသာရေးအဖွဲ့အစည်းတွေအနေနဲ့ စစ်ရှောင်တွေကို ကူညီမယ်ဆိုပါက ကြိုတင်ခွင့်ပြုချက်ရယူဖို့  အာဏာသိမ်းစစ်ကောင်စီဒုတိယခေါင်းဆောင်  ဒုဗိုလ်ချုပ်မှူးကြီးစိုးဝင်းက ပြောကြားခဲ့တယ်လို့ လွိုင်ကော်မြို့နယ်တွင်းက ဘာသာရေးခေါင်ဆောင်တွေဆီက သိရပါတယ်။

တိုက်ပွဲတွေ အဆက်မပြတ်ဖြစ်နေပြီး စစ်ကောင်စီတပ်တွေ အင်အား အလုံးအရင်းနဲ့ စစ်ကြောင်းထိုးနေတဲ့ ကရင်နီ (ကယား)ပြည်နယ် လွိုင်ကော်မြို့ဘက်ကို  ဒုတိယစစ်ခေါင်းဆောင် ဒုဗိုလ်ချုပ်မှူးကြီး စိုးဝင်းက  မတ်လ ၁၅ ရက်နေ့ကသွားရောက်ခဲ့ပါတယ်။

ဒီခရီးစဉ်မှာ ဒုဗိုလ်ချုပ်မှူးကြီးစိုးဝင်းက စီးပွားရေး  လုပ်ငန်းရှင်တွေ၊  ဘာသာရေးအဖွဲ့အစည်းတွေနဲ့  လွိုင်ကော်တပ်နယ်မိသားစုတွေနဲ့ တွေ့ဆုံခဲ့ပါတယ်။

ဘာသာရေးခေါင်းဆောင်တွေနဲ့တွေဆုံချိန်မှာ‌‌တော့   ဘာသာရေးအဖွဲ့တွေက စစ်ရှောင်တွေကို လှူမယ် ကူမယ်ဆိုရင် သူတို့ဆီမှာ ကြိုတင်ခွင့်ပြုချက်ယူဖို့ ညွှန်ကြားခဲ့ကြောင်းလည်း သူနဲ့တွေ့ဆုံခဲ့တဲ့ ဘာသာရေးခေါင်းဆောင်တွေက ဒီဗွီဘီကို ပြောပါတယ်။

လွိုင်ကော်မြို့နယ်ရှိဘာသာရေးခေါင်းဆောင်တွေဖြစ်တဲ့ ကက်သလစ်သာသနာ အသင်းတော်၊ နှစ်ခြင်းခရစ်ယာန်အသင်းတော်၊ ကယားဖူးနှစ်ခြင်းခရစ်ယာန်အသင်းတော်၊ အင်္ဂလီကန် အသင်းတော်၊ ယေဟောဝါအသင်းတော်၊ သတ္တမနေ့ ဥပုသ်အသင်းတော်နဲ့ ကေထိုးဘိုးရိုးရာ အဖွဲ့တွေက  ခေါင်းဆောင်တွေကို ပြည်နယ်အစိုးရ အဖွဲ့ရုံခန်းမှာ  တွေ့ဆုံခဲ့တာဖြစ်ပါတယ်။

ဒီလိုတွေ့ဆုံရာမှာ ဒုဗိုလ်ချုပ်မှူးကြီး စိုးဝင်းက တပ်မတော်သားတွေအနေနဲ့ ဘာသာအဆောက်အဦနဲ့ပတ်သက်ပြီး အလေးထား ထိတွေ့ဆက်ဆံမှုတွေ ပြုလုပ်နေကြောင်း၊ လက်နက်ကိုင်အကြမ်းဖက်သမားတွေအနေနဲ့ ဘာသာရေး အဆောက်အဦတွေ၊ စာသင်ကျောင်းတွေနဲ့ ဆေးပေးခန်းတွေကို အသုံးချကာ အကာအကွယ်ရယူတိုက်ခိုက်နေလို့ ခုခံကာကွယ် တုံ့ပြန်ပစ်ခတ်မှုတွေလည်းရှိကြောင်း ပြောခဲ့ပါတယ်။

ကယား(ကရင်နီပြည်နယ်)မှာ  စစ်တပ်အာဏာသိမ်းကတည်းက တိုက်ပွဲတွေ ပြင်းထန်ဖြစ်ပွား နေတာဖြစ်ပြီး စစ်ကောင်စီတပ်တွေက လေကြောင်းကနေဗုံးကြဲတိုက်ခိုက်မှုတွေ၊ လက်နက်ကြီးနဲ့ ပစ်ခတ်တိုက်ခိုက်မှုတွေလုပ်ခဲ့လို့ ဘာသာရေး အဆောက်အဦတွေ၊ စာသင်ကျောင်း၊ ဆေးပေးခန်းနဲ့ လူနေအိမ်တွေ အကြီးအကျယ်ထိခိုက်ပျက်စီးခဲ့ရပါတယ်။

စစ်ကောင်စီတပ်တွေနဲ့ တော်လှန်ရေးတပ်တွေအကြား တိုက်ပွဲတွေကြောင့် ဒေသခံတိုင်းရင်းသား ပြည်သူတွေသောင်းနဲ့ချီစစ်ဘေးရှောင်နေရပ်စွန့်ခွာထွက်ပြေးနေကြရပြီး  ဖမ်းဆီးခံရသူတွေကိုလည်း စစ်တပ်က  အစုလိုက် အပြုံလိုက် သတ်ဖြတ် စစ်ရာဇဝတ်မှုတွေ ကျူးလွန်နေတာဖြစ်ပါတယ်။ 

ဒုစစ်ခေါင်းဆောင် စိုးဝင်းကတော့ တုံးတိုက်တိုက် ကျားကိုက်ကိုက် စိတ်ဓာတ်နဲ့ လုပ်ဆောင်ကြဖို့၊  တပ်ဆင်ပေးထားတဲ့ လက်နက်၊ ခဲယမ်း၊ ကိရိယာတွေကို  အပြည့်အဝ ထိရောက်စွာ အသုံးချကြဖို့နဲ့ တပ်တွင်း စည်းလုံးညီညွတ်ရေး အရေးကြီးကြောင်းလည်း လွိုင်ကော်တပ်နယ်မိသားစုနဲ့ တွေ့ဆုံစဉ်မှာ စည်းရုံး ပြောဆိုခဲ့ပါတယ်။

ဒီခရီးစဉ်မှာ ဒုဗိုလ်ချုပ်မှူးကြီးစိုးဝင်းက စီးပွားရေး လုပ်ငန်းရှင်တွေနဲ့ တွေ့ဆုံရာမှာလည်း လုပ်ငန်းရှင်တွေအနေနဲ့ ဒေသထုတ်ကုန်တွေကို အဓိကထုတ်လုပ်နိုင်ရေး MSME လုပ်ငန်းတွေ ဖွံ့ဖြိုးတိုးတက်ရေးအတွက် ပါဝင်ဖို့ တိုက်တွန်းကြောင်း နိုင်ငံပိုင်သတင်းစာမှာ ရေးပါတယ်။

စစ်ကောင်စီအနေနဲ့ ဖေဖော်ဝါရီ ၂ ရက်က စတင်ပြီး ကယား(ကရင်နီပြည်နယ်) ဘောလခဲ၊ ဖရူဆို၊ ဒီးမော့ဆိုနဲ့ ရှားတောမြို့တို့ကို  စစ်အုပ်ချုပ်ရေးကြေညာပြီးနောက် အင်အားအလုံးအရင်းတွေနဲ့  ထိုးစစ်ဆင် တိုက်ခိုက်နေပြီး  ပြည်သူတွေနဲ့ ထပ်ဆင့် စစ်ဘေးရှောင်နေကြရပါတယ်။ 

မြန်မာပြည်တွင်းမှာ စီးပွားရေးလုပ်ငန်းတွေ ပုံမှန် ပြန်လည် လည်ပတ်နေပြီဖြစ်တာကြောင့် လာမယ့် ၂၀၂၃-၂၄ ဘဏ္ဍာနှစ်မှာ ပြီးခဲ့တဲ့ဘဏ္ဍာနှစ်ထက် ရငွေ(ဝင်ငွေ) ပိုမို ရရှိမယ်လို့ ခန့်မှန်းထားတဲ့အကြောင်း စစ်ကောင်စီ ဒုတိယခေါင်းဆောင်က ပြောပါတယ်။

အာဏာသိမ်း ဒုခေါင်းဆောင် ဒုဗိုလ်ချုပ်မှူးကြီး စိုးဝင်းက နေပြည်တော်မှာ မတ်လ ၉ ရက်က ပြုလုပ်ခဲ့တဲ့ ၂၀၂၃-၂၄ ဘဏ္ဍာရေးနှစ်အတွက် ပြည်ထောင်စုရဲ့အရအသုံး ခန့်မှန်းခြေ ငွေစာရင်း အစည်းအဝေးမှာ ပြောဆိုခဲ့တာပါ။

ဒါပေမဲ့ ပြည်တွင်းမှာ စစ်တပ်က အာဏာသိမ်းပြီးနောက် ပြည်တွင်းစီးပွားရေးလုပ်ငန်းတွေဟာ ပြီးခဲ့တဲ့ ၂၀၂၁ နဲ့ ၂၀၂၂ နှစ်နှစ်တာလုံးမှာ ချိနဲ့ခဲ့ရပြီး အခုအချိန်ထိ နလန် ပြန်မထူ နိုင်သေးတာကြောင့် လာမယ့် ၂၀၂၃-၂၄ ဘဏ္ဍာနှစ်မှာ ရငွေ(ဝင်ငွေ) ပိုမို ရရှိမယ်လို့ ခန့်မှန်းထားတဲ့ စစ်ကောင်စီရဲ့မျှော်မှန်းထားချက်က ပြည်တွင်းလုပ်ငန်းရှင်တွေအပေါ် ပိုမိုကြပ်ဖို့ ပြင်ဆင်လာတဲ့ အခြေအနေသာ ဖြစ်လာနိုင်တယ်လို့ စီးပွားရေးလုပ်ငန်းရှင်တွေနဲ့ သုတေသီတွေက သုံးသပ်ထားပါတယ်။

ပို့ကုန်၊သွင်းကုန်ဆောင်ရွက်နေတဲ့ စီးပွားရေးလုပ်ငန်းရှင်တဦးက “ပြီးခဲ့တဲ့ ၂နှစ်စလုံးမှာ ပြည်တွင်းက စီးပွားရေး လုပ်ငန်းရှင်တွေ အကုန်နီးပါးပဲ အမြတ် မရရင်နေ အရင်း ပြန်ရအောင်နဲ့ အရှုံးနည်းအောင် မနည်း ကြိုးစားခဲ့ရတာ။ အခုအချိန်ထိ လုပ်ငန်းတွေ အကုန်လုံးက နလန် ပြန်မထူသေးပါဘူး။ မပိတ်ရုံသာ ရှိပါတယ်။ ဒါကို ဘာကြောင့် ဖြစ်ရတယ်ဆိုတဲ့ ပြဿနာကို မရှာပဲ နဲ့ ဟိုဟာမလုပ်နဲ့ ဒီဟာ မလုပ်နဲ့ဆိုတဲ့ ကန့်သတ်ချက်တွေနဲ့ လိုက်လုပ်နေတာက အဖြေ မဟုတ်ဘူးလေ။ အဲ့တော့ အခြေအနေမှန်ကို လက်မခံပဲ အတင်းအကျပ် လျှောက်လုပ်နေတာက ပိုဆိုးတာပဲ ရှိတာပေါ့။ အခုလည်း နယ်စပ်ကုန်သွယ်ရေးလုပ်နေတဲ့ ပို့ကုန်သမားတွေ သွင်းကုန်သမားတွေ အကုန်အဆင်မပြေဘူး။ အဲ့ဒါကို စီးပွားရေး လုပ်ငန်းတွေ ပုံမှန် ပြန်လည် လည်ပတ်နေပြီဆိုတော့ ဘာတွေ မဟုတ်တာ ထပ်လုပ်မလို့လဲ မသိဘူး”လို့ ဒီဗွီဘီ ကို ပြောပါတယ်။

စစ်ကောင်စီရဲ့ ဒုတိယခေါင်းဆောင်ကတော့ ၂၀၂၃-၂၄ ဘဏ္ဍာနှစ်အတွက် ဘတ်ဂျက် အသုံးစရိတ် နဲ့ ပတ်သက်ပြီး ရရှိလာမယ့် ရငွေ အပေါ် မူတည်ကာ ဘတ်ဂျက်လိုငွေ အခြေအနေကို သင့်တင်စွာ ထိန်းသိမ်းဖို့နဲ့ သုံးသင့် သုံးထိုက်တဲ့ အသုံးစရိတ်တွေနဲ့ မသုံးသင့် မသုံးထိုက်တဲ့ အသုံးစရိတ် တွေကို စိစစ်သွားမယ်လို့ ဆိုပါတယ်။

ဒီ့ပြင် နိုင်ငံခြားငွေ သုံးစွဲမှု လျှော့နည်းစေရေး စက်သုံးဆီ သုံးစွဲမှုနဲ့ပတ်သက်ပြီး စိစိ စစ်စစ် ခွင့်ပြုပေးသွားမယ့်အပြင် ရုံသုံးပစ္စည်း ဝယ်ယူတာမှာလည်း ဇိမ်ခံ Luxury ပစ္စည်းတွေ ဝယ်ယူ ခွင့်ပြုမှာ မဟုတ်ဘူးလို့ ပြောဆိုခဲ့ပါတယ်။

ဘတ်ဂျက်ရေးရာလေ့လာသူတဦးက “ဒါက ဘတ်ဂျက်အစည်းအဝေးမှာ သူ ပြောသွားတာပေါ့။ အဲ့တော့ ကျနော်တို့ မြင်တာကတော့ သူတို့ အခွန်နှုန်းထားတွေကို မြှင့်မယ့် သဘောရှိတယ်။ ဘာလို့လဲဆိုတော့ ဘတ်ဂျက်အတွက် အသုံးစရိတ်တွေ သုံးဖို့က ရငွေ ဖြစ်တဲ့ ဝင်ငွေတွေရှိဖို့ လိုတယ်လေ။ အဲ့တော့ ဝင်ငွေရဖို့အတွက် အခွန်နှုန်းတွေကို မြှင့်မယ်လို့ ယူဆရတယ်။ နောက်တချက်က နိုင်ငံခြားငွေ သုံးစွဲမှုကဏ္ဍပေါ့။ အဲ့ဒီ့ကဏ္ဍကိုလည်း သူတို့ လျှော့လိမ့်မယ်လို့ ထင်တယ်။ ဘယ်လို လျှော့မလဲဆိုရင် သွင်းကုန်လိုင်စင် ချပေးတာတွေကို လျှော့ချတာရယ် နောက်တခါ စက်သုံးဆီ တင်သွင်းမှုကိုလဲ လျှော့ချဖို့ ကြိုးစားလိမ့်မယ်။ နောက်ဆုံးတချက်ကတော့ ငွေလုံးငွေရင်း အသုံးစရိတ်ပါ။ ဒါက စစ်ကောင်စီအနေနဲ့ သူတို့ ဖွဲ့စည်းထားတဲ့ ဝန်ကြီးဌာနနဲ့ အဖွဲ့အစည်းတွေမှာ သုံးမယ့် ဘတ်ဂျက်ကို စိစစ်မယ့် သဘောပေါ့။ ဥပမာ မနှစ်က သိန်း ၁၀၀ သုံးရင် ဒီနှစ် သိန်း ၅၀ ပဲ သုံးရင်သုံးမယ်ပေါ့။ သဘောကိုပြောတာနော်။ ဒါပေမဲ့ ကျနော်တို့ စိုးရိမ်တဲ့ အချက်က ဘတ်ဂျက် ဖြည့်ဖို့ ပိုက်ဆံ ရိုက်ထုတ်ပြီး သုံးမှာကိုပဲ။ အဲ့ဒါဆို နဂိုကတည်းက မြင့်နေတဲ့ နိုင်ငံခြားငွေ လဲလှယ်နှုန်းက ထပ်မြင့်လာပြီး ငွေကြေးဖောင်းပွမှုနှုန်းတွေ ပိုကြီးလာမယ်။ နောက်ဆက်တွဲက မြန်မာငွေတန်ဖိုး ထပ်ကျလာပြီး စီးပွားရေး အပေါ်သက်ရောက်မှုတွေ ပိုဆိုးလာလိမ့်မယ်” လို့ ဒီဗွီဘီကို ပြောပါတယ်။

စစ်ကောင်စီ လက်အောက်ခံ စီမံကိန်းနှင့်ဘဏ္ဍာရေးဝန်ကြီးဌာနက ထုတ်ပြန်တဲ့ ကိန်းဂဏန်းအချက်အလက်တွေအရ ၂၀၂၂-၂၃ ဘဏ္ဍာနှစ်အတွက် ဘတ်ဂျက်စာရင်းမှာ ပြည်ထောင်စုရဲ့ စုစုပေါင်း ရငွေ ကျပ်၂၃,၄၃၄ ဘီလီယံ ရှိပြီး ပြည်ထောင်စု၏ စုစုပေါင်း သုံးငွေ ကျပ် ၃၀,၈၃၃ ဘီလီယံ ရှိတာကြောင့် ပြည်ထောင်စု၏ စုစုပေါင်း လိုငွေ က ကျပ် ၇,၃၉၉ ဘီလီယံ ရှိပါတယ်။ ဒါကြောင့် ဒီပမာဏဟာ ဂျီဒီပီ ရဲ့ ၅ ဒသမ ၉ ရာခိုင်နှုန်း ရှိတာ တွေ့ရပါတယ်။ 

၂၀၂၂-၂၃ ဘဏ္ဍာနှစ်အတွက် စုစုပေါင်း ပြည်တွင်းထုတ်လုပ်မှုနဲ့ ဝန်ဆောင်မှုတန်ဖိုး(ဂျီဒီပီ)ကတော့ ကျပ် ၁၂၃,၉၃၃ ဘီလီယံ ရှိတယ်လို့ အရအသုံးခန့်မှန်းခြေဘတ်ဂျက်စာရင်းမှာ ဖော်ပြထားပါတယ်။

PHOTO-CINCDS