မွန်ပြည်နယ်၊ ရေးမြို့၊ အောင်သုခရပ်ကွက်မှာ ဇန်နဝါရီ ၁၁ ရက် ည ၈ နာရီလောက်က စစ်ကောင်စီ ရေးခရိုင် ဒုစရိုက်နှိမ်နင်းရေးခေါင်းဆောင် ဒုရဲမှူးလှိုင်မင်းသန့်ကို အဝေးထိန်းမိုင်းနဲ့ မိုင်းဆွဲတိုက်ခိုက်ခဲ့တယ်လို့ ရေးပြောက်ကျားတပ်ဖွဲ့ တာဝန်ခံ ဗိုလ်ကျန်ရစ်က ဒီဗွီဘီကို ပြောပါတယ်။

အောင်သုခရပ်ကွက် နေအိမ်ကို ဆိုင်ကယ်နဲ့ပြန်လာတဲ့ ဒုရဲမှူး လှိုင်မင်းသန့်ကို ရေးပြောက်ကျားတပ်ဖွဲ့ (YGF) က အသင့်စောင့်ဆိုင်းပြီး မိုင်းဆွဲတိုက်ခိုက်ခဲ့တာပါ။

မိုင်းဆွဲတိုက်ခိုက်ခံရတာကြောင့် ဒုရဲမှူးလှိုင်မင်းသန့် လဲကျသွားခဲ့သလို ဆိုင်ကယ်လည်း ထိခိုက်ပျက်စီးခဲ့တဲ့အတွက် သေဆုံးနိုင်ကြောင်းနဲ့ မြေပြင်အခြေအနေကို ဆက်လက်စုံစမ်းနေတယ်လို့ ဆိုပါတယ်။

ဗိုလ်ကျန်ရစ်ကတော့ ဒုရဲမှူးလှိုင်မင်းသန့်ဟာ ပြည်သူတွေကို ဖမ်းဆီးတာနဲ့ ခြိမ်းခြောက်ငွေညှစ်တာတွေ လုပ်ဆောင်ကြောင်း တိုင်ကြားလာတဲ့အတွက် မိုင်းဆွဲတိုက်ခဲ့တာ ဖြစ်ကြောင်းနဲ့ မိုင်းဆွဲတိုက်ခိုက်မှုမှာလည်း အားပြင်းတဲ့ယမ်းတွေ အသုံးပြုခဲ့တယ်လို့ ပြောပါတယ်။

ဒေသခံတွေအဆိုအရ ဒုရဲမှူးလှိုင်မင်းသန့် မိုင်းဆွဲတိုက်ခိုက်ခံရမှုဟာ ညပိုင်းဖြစ်တာကြောင့် ဘယ်သူမှ ထွက်မကြည့်ရဲကြောင်းနဲ့ မိုင်းကွဲသံကြားရပြီးနောက် လူမှုကယ်ဆယ်ရေးကားတစီး မောင်းနှင်သွားတယ်လို့ ဆိုပါတယ်။

ရေးမြို့နယ်၊ လမိုင်းမြို့မှာ ပြီးခဲ့တဲ့ ဇန်နဝါရီ ၉ ရက်ကလည်း စစ်ကောင်စီ ရဲသတင်းတပ်ဖွဲ့ဝင် ရဲအုပ်ညီညီဝင်းကို ရေးပြောက်ကျားတပ်ဖွဲ့ (YGF) က ပစ်ခတ်ရှင်းလင်းထားပါတယ်။

မွန်ပြည်နယ်၊ ရေးမြို့မရဲစခန်းက  ဒုရဲမှူး တယောက်နဲ့ ရဲတပ်ကြပ်ကြီးတယောက်  နိုဝင်ဘာ ၂၃ ရက် ဒီမနက် ၈ နာရီခွဲမှာ ရေး-ထားဝယ် ကားလမ်းမရှိ ရေးကျုံလောင်းရွာသစ်အနီး ကားလမ်းမပေါ်မှာ ပစ်ခတ်တိုက်ခိုက်ခံရလို့ သေဆုံးခဲ့ပြီး လက်နက်တွေပါသွားတယ်လို့ ပြည်နယ်အစိုးရနဲ့နီးစပ်သူတွေဆီက သိရပါတယ်။

ခရိုင်အစည်းအဝေးကိုတက်ဖို့ ကားနဲ့ထွက်လာတဲ့ ရေးမြို့မရဲစခန်းက စခန်းမှူး ဒုရဲမှူး လှဌေးနဲ့ တပ်ကြပ်ကြီး ဘဟိန်းတို့ စီးလာတဲ့ကားကို တူးမြောင်းအုပ်စု ကျုံးလောင်းရွာသစ်အနီး တံတားအကျော်မှာ ပစ်ခတ်ခံရတာဖြစ်ပြီး ကားကိုမီးရှို့ကာ လက်နက်တွေပါယူသွားတယ်လို့ ပြည်နယ်အစိုးရအဖွဲ့နဲ့ နီးစပ်သူတစ်ဦးက ပြောပါတယ်။

“ဒီမနက် ၈ နာရီ ၂၀ လောက်မှာဖြစ်တာ လက်နက်ကြီးငယ်နဲ့ပစ်ပြီး ကားကိုပါ မီးရှို့သွားတယ်။ M 16 တလက်နဲ့ လက်နက် တချို့ပါသွားတယ်။ နှစ်ဦးသေတယ်။ အခုစစ်ဆေးတာတွေလုပ်နေတယ်။ ရေးဘီလူးအဖွဲ့ကပစ်တယ် ကနဦးသိရတယ်။”

အခုလို ရဲတပ်ဖွဲ့ဝင် နှစ်ယောက် သေဆုံးသွားတာနဲ့ ပါသွားတဲ့လက်နက်တွေကို  အတည်ပြုဖို့ စစ်ကောင်စီတပ်တွေက ရေးမြို့မရဲစခန်းကို ရောက်ရှိနေတယ်လို့ ရဲအသိုင်းအဝိုင်းက သိရပါတယ်။

အဆိုပါတိုက်ခိုက်မှုကို မွန်ပြည်နယ်အခြေစိုက် ရေးဘီလူး ပြည်သူ့ကာကွယ်ရေးတပ်ဖွဲ့က လုပ် ဆောင်ခဲ့တာဖြစ်တယ်လို့  သူတို့ရဲ့ လူမှုကွန်ရက်စာမျက်နှာမှာ ထုတ်ပြန်ထားပါတယ်။

MSRO တာဝန်ခံ တိုဘီ ကျဆုံးခဲ့တဲ့အတွက် လက်တုံ့ပြန်တဲ့အနေနဲ့ ရေးရဲစခန်းမှူး အပါအဝင် တပ်ဖွဲ့ဝင် ၂ ဦးကို ပစ်ခတ်ရှင်းလင်းလိုက်တယ်လို့ ရေးဘီလူးအဖွဲ့ခေါင်းဆောင်က ပြောပါတယ်။

“ပစ်ခတ်ရှင်းလင်းခဲ့ပြီးနောက် M16 သေနတ်တလက် ရရှိတယ်။ ကားတစီးပါ မီးရှို့ဖျက်ဆီးလိုက်တယ်။ ပစ်ခတ်ရှင်းလင်းခံရတဲ့အထဲမှာ ရဲမှာဆို စခန်းမှူးအဆင့် ဖြစ်ပါတယ်။ သူတို့ဘက်က ပစ်ဖို့အချိန်မရလိုက်ဘူး။ အခုပစ်ခတ်တဲ့နေရာက တပ်မ ၁၉ ခလရ ၆၁ တပ်ရင်းနဲ့ဆို အနီးနားမှာပါ။ ရေးတံတားကြီး စစ်ဆေးရေးဂိတ်နဲ့လည်း နီးပါတယ်။ လုံခြုံရေးတွေ တင်းကျပ်ထားတဲ့ကြားကနေ အခုလို ပစ်ခတ်လိုက်တာပါ။”

လက်ရှိအခြေအနေမှာ စစ်ကောင်စီတပ် ခရိုင်ရဲတပ်ဖွဲ့၊ မြို့နယ်ရဲမှူးဦးဆောင်တဲ့ အဖွဲ့တွေက  ကျုံးလောင်းရွာသစ် ကားလမ်းပိုင်းကို စစ်ဆေးတာတွေ၊ နယ်မြေရှင်းလင်းတာတွေလုပ်ဆောင်နေပြီး  လမ်းသွားလမ်းလာတွေကိုလည်း စစ်ဆေး၊ ကင်းပုန်း ဝပ်နေတာကြောင့် နှစ်ဖက်ထိတွေ့မှုတွေ ထပ်ဖြစ်လာမှာကို ဒေသခံတွေ စိုးရိမ်နေကြပါတယ်။

စစ်ကောင်စီတပ်က လုံခြုံရေးအင်အားအပြည့်နဲ့ မြို့တွင်း မြို့ပြင် နေရာတွေကို ပိတ်ဆို့ထားသလို လုံခြုံရေးတင်းကျပ်ထားတာကြောင့် လမ်းခရီး သွားလာရာမှာ အခက်ခဲတွေရှိကြတယ်လို့ ဒေသခံတွေက ပြောပါတယ်။

အဆိုပါ ရေးရဲစခန်းမှူးနဲ့ တပ်ဖွဲ့ဝင်တွေကို ပစ်ခတ်နေတဲ့အချိန်ဟာ ကျောင်းတက်နေတဲ့ အချိန်နဲ့လည်း တိုက်ဆိုင်နေတာကြောင့် ကျောင်းသားမိဘတွေက ကလေးတွေကို ကျောင်းမတက်ခိုင်းဘဲ အိမ်ကိုပြန်ခေါ်သွားခဲ့ကြတယ်လို့ ကျောင်းသားမိဘတဦးက ပြောပါတယ်။

ရေးဘီလူးအဖွဲ့ဟာ စစ်ကောင်စီ လက်ပါးစေတွေဖြစ်တဲ့ စစ်တပ်၊ ရဲနဲ့ သတင်းပေး ၂ ဒါဇင်ကျော်လောက်ကို ရှင်းလင်းထားပါတယ်။