စစ်ကိုင်းတိုင်း၊ ဝက်လက်မြို့နယ်ထဲက ဆေးကုသမှုလိုအပ်နေတဲ့ မီးဘေးသင့်ပြည်သူတွေကို ရွှေဘိုခရိုင် အမှတ် ၁၈ တပ်ရင်း၊ ဝက်လက်မြို့နယ် နယ်စည်းမခြားတော်လှန်ရေးအင်အားစု နယ်မြေအတွင်း ဒေသတွင်းကာကွယ်ရေးအဖွဲ့တွေက သွားရောက်ဆေးကုသမှုခဲ့တယ်လို့ သိရပါတယ်။
စစ်ကောင်စီတပ်တွေရဲ့ အကြမ်းဖက်မီးရှို့မှုကြောင့် မီးလောင်ပျက်စီးသွားတဲ့ ဝက်လက်ဒေသရှိ ကျေးရွာ ၈ ရွာကို ဇန်နဝါရီ ၁ ရက်နဲ့ ၂ ရက်မှာ ပထမဆုံးအကြိမ်သွားရောက်ကွင်းဆင်းပြီး ရွာသားတွေကို အခမဲ့ ဆေးကုသမှုပေးခဲ့တာပါ။
စစ်ကိုင်းမြို့နယ် လူသားချင်းစာနာထောက်ထားမှုဆိုင်ရာ မြို့နယ်တာဝန်ခံက “အများစုက အမိုးအကာမရှိတော့ အအေးကလည်းပိုတော့ သက်ကြီးရွယ်အိုတွေ ပိုများပါတယ်။ လက်ရှိကတော့ ကွင်းဆင်းပြီးရွေ့လျားဆေးခန်းအဖြစ်လုပ်ဆောင်နေတာဆိုတော့ မျက်လုံးခွဲစိတ်တာမျိုးက လွဲရင် ကျန်တဲ့ရောဂါတွေကို ကုသပေးနိုင်ခဲ့ပါတယ်။ လက်ရှိမှာ ခွဲစိတ်တာမျိုးတော့ မလုပ်ဆောင်နိုင်သေးပါဘူး”လို့ ပြောပါတယ်။
မီးဘေးရှောင်ပြည်သူတွေအနေနဲ့ ဆေးကုသမှုတွေ လိုအပ်ချက်ရှိနေပြီး မြို့ပြအထိသွားရောက် ဆေးကုသဖို့ မလွယ်တာကြောင့် အခုလို ဒေသတွင်း ကာကွယ်ရေးတပ်ဖွဲ့တွေပူးပေါင်းပြီး သွားရောက် ကုသမှုတွေ ဆောင်ရွက်ပေးတာဖြစ်တာလည်း သိရပါတယ်။
အဆိုပါကွင်းဆင်း ဆေးကုသပေးမှုကို ဆေးဝါးကျွမ်းကျင် သင်တန်းဆင်းထားတဲ့ တော်လှန်ရေးရဲဘော်တွေနဲ့ ဒေသတွင်းလူငယ်တွေက စေတနာ့ဝန်ထမ်းအဖြစ် သွားရောက် ကုသပေးခဲ့တာလို့ သိရပါတယ်။
မြို့နယ်တာဝန်ခံက “ကျနော်တို့ဒေသက လူထုက မြို့ပေါ် ဆေးသွားကုဖို့က အခုအခြေအနေနဲ့ လုံးဝ မလွယ်ဖြစ်နေတာပါ။ ကျနော်တို့က ရှေးလတွေက ဆေးဝါးကျွမ်းကျင်သင်တန်းပေးပြီး ပြီးခဲ့တဲ့လက သင်တန်းကနေ ဆေးမှူးအယောက် ၅၀ သင်တန်းဆင်းထားတာပါ။ ဒေသကအဖွဲ့တွေပူးပေါင်းပြီး ဦးဆောင်မှုနဲ့ ဆေးဝါးကျွမ်းကျင်သင်တန်းဆင်းထားတဲ့ ရဲဘော်တွေနဲ့ ဒေသထဲက ကလေးတွေက ပါပါတယ်၊” လို့ပြောပါတယ်။
ကွင်းဆင်းဆေးကုသပေးတာကို ဝက်လက်မြို့နယ် နယ်စည်းမခြားတော်လှန်ရေးအင်အားစုအနေနဲ့ ဆက်လုပ်သွားမှာဖြစ်ပြီး စစ်ကိုင်းထဲက လက်လမ်းမမှီတဲ့ ကျေးရွာတွေအထိ သွားရောက်နိုင်ဖို့အတွက် ဆေးဝါးကျွမ်းကျင်နဲ့ အခြေခံကျန်းမာရေးလုပ်သားအများအပြား လိုအပ်နေတယ်လို့လည်းဆိုပါတယ်။
အခုလိုကွင်းဆင်းကုသပေးမှုကို မုံရွာခရိုင် တပ်ရင်း ၁၈ မှ တပ်ရင်းမှူးဗိုလ်စွန်ရဲ၊ တပ်ရင်းဆေးအဖွဲ့၊ မြို့နယ်ကျန်းမာရေးတာဝန်ခံ၊ မြို့နယ်လူသားစာနာတာဝန်ခံတွေ၊ ရပ်ကျေး ပအဖ၊ ပကဖ၊ ပလဖ တွေပူးပေါင်းဆောင်ရွက်ခဲ့တာဖြစ်ပြီး စစ်ကိုင်းတိုင်း ဝက်လက်မြို့နယ်ရှိ ရွာ ၈ ရွာမှ ပြည်သူ ၁၉၅ ဦးကို ဆေးကုသမှုခံယူခဲ့ပါတယ်။
စစ်ကိုင်းတိုင်း၊ ပုလဲမြို့ပေါ်မှာ ကင်းပတ်နေတဲ့ စစ်ကောင်စီတပ်ကို ဒီနေ့ ဒီဇင်ဘာ ၂၀ ရက် မနက် ၁၀ နာရီကျော်က လက်ပစ်မိုင်းနဲ့ ပစ်ခတ်ခဲ့တယ်လို့ စစ်ကောင်စီတပ်ဖွဲ့ဝင် တချို့ သေဆုံး ဒဏ်ရာရတာရှိတယ်လို့ ဒေသခံကာကွယ်ရေးအဖွဲ့တွေဆီက သိရပါတယ်။
ဒီနေ့မနက် ၁၀ နာရီကျော်က ပုလဲမြို့ပေါ်မှာ စစ်ကောင်စီတပ်က စစ်သား ၁၅ ယောက် ကင်းပတ်နေတာကို တော်လှန်ရေးအင်အားစုတွေက အလစ်ဝင်တိုက်ခဲ့တယ်လို့လည်း ဆိုပါတယ်။
ပုလဲမြို့ပြည်သူ့ကာကွယ်ရေးတပ်ဖွဲ့မှ သခင်ဒေါင်းညိုက “ ကျနော်တို့ဘက်က ပထမ အမှိုက်ကောက်သမားဟန်ဆောင်ပြီး သူတို့သတိမထားနိုင်မိတဲ့အချိန်ကို စောင့်ပြီး လက်ပစ်မိုင်း ၂ လုံးနဲ့ ပစ်ခတ်တာ၊ စခ နှစ်ကောင် နေရာတင်သေပြီး တကောင်တော့ ပြင်းထန်ဒဏ်ရာ ရသွားတယ်။ သူတို့ဘက်ကလည်း ပထမတော့ ကြောင်ကြည့်နေပြီး ခန နေတော့မှ ကျနော်တို့ကို လိုက်ပစ်တယ်။” လို့ ပြောပါတယ်။
အဆိုပါ တိုက်ခိုက်မှုကို ပုလဲပြည်သူ့ကာကွယ်ရေး ဒေါင်းညိုအဖွဲ့ကလုပ်ဆောင်ခဲ့တာဖြစ်ပြီး ရဲဘော် လေးယောက်သာ အသုံးပြုခဲ့ကြောင်းနဲ့ စစ်ကောင်စီတပ်ဘက်က နောက်ကနေ လိုက်လံ ပစ်ခတ်ခဲ့ပေမဲ့ တော်လှန်ရေးရဲဘော်တွေ အထိအခိုက် မရှိခဲ့ဘူးလို့ သိရပါတယ်။
