မကွေးတိုင်း၊ ပခုက္ကူမြို့နယ်မှာ မေ ၁၁ ရက် မနက်ပိုင်းက စစ်ကောင်စီတပ်သားတွေနဲ့ ပျူစောထီးတွေ ဒရုန်းနဲ့ ဗုံးကြဲတိုက်ခိုက်ခံရပြီး တယောက်သေဆုံးကာ တယောက် ဒဏ်ရာရတယ်လို့  မြိုင်ပကဖ ကနေ သိရပါတယ်။

ပခုက္ကူမြို့နယ်၊ ကန်တော်ရွာနားမှာ လမ်းကင်းစောင့်နေတဲ့ စစ်ကောင်စီတပ်သားနဲ့ ပျူစောထီးတွေကို မနေ့မနက် ၈ နာရီလောက်မှာ ဒရုန်းနဲ့ ဗုံးသီး ၃ လုံးဖြုတ်ချ တိုက်ခိုက်ခဲ့တာ ဖြစ်ပါတယ်။

အဲဒီတိုက်ခိုက်မှုအတွင်း ပျူစောထီးအဖွဲ့ဝင် တယောက် သေဆုံးပြီး စစ်သားတယောက် ဒဏ်ရာရတယ်တယ်လို့ မြိုင်ပကဖ တပ်ရင်း-၁ တပ်ရင်းမှူး ဗိုလ်လက်ယာက ပြောပါတယ်။

အဲဒီတိုက်ခိုက်မှုကို ပခုက္ကူအခြေစိုက် Black Cobra တပ်ဖွဲ့၊ သူရိန်တပ်ဖွဲ့တို့နဲ့အတူ ပူးပေါင်းတိုက်ခိုက်ခဲ့တာဖြစ်ပြီး  ရဲဘော်တွေ ထိခိုက်မှုမရှိခဲ့ဘူးလို့ ဆိုပါတယ်။

ပခုက္ကူမြို့နယ်မှာ မေ ၇ ရက် မနက်ပိုင်းကလည်း စစ်ကောင်စီယာဥ်တန်း မိုင်းဆွဲတိုက်ခိုက်ခံရပြီး ၂ ယောက်သေဆုံးကာ ၈ ယောက်ထက်မနည်း ဒဏ်ရာရရှိခဲ့တယ်လို့ မြိုင်ပကဖ ကနေ သိရပါတယ်။

မကွေးတိုင်း၊ မြိုင်မြို့နယ်မှာလည်း မေ ၉ ရက်နဲ့ ၁၁ ရက်တွေမှာ စစ်ကောင်စီတပ်သားတွေနဲ့ ပျူစောထီးတွေ တိုက်ခိုက်ခံရပြီး တယောက် သေဆုံးကာ ငါးယောက်ထက်မနည်း ဒဏ်ရာရရှိခဲ့တဲ့အပြင် ပျူစောထီး ရိက္ခာကားတစီးကို မိုင်းဆွဲမီးရှို့ဖျက်ဆီးခဲ့တယ်လို့ မြိုင်ပကဖ ကနေ သိရပါတယ်။

မြိုင်မြို့နယ် အိုရင်းရွာကနေ ထွက်လာတဲ့ စစ်ကောင်စီစစ်ကြောင်းကို မေ ၉ ရက် မနက် ၅ နာရီ လောက်မှာ မြိုင်ပကဖ တပ်ရင်း-၁၊ တပ်ခွဲ-၂၊ ဘီလူးငှက်တပ်ဖွဲ့တို့ ပူးပေါင်းပြီး စောင့်ကြိုတိုက်ခိုက်ခဲ့တာလို့ မြိုင်ပကဖ တပ်ရင်း-၁ တပ်ရင်းမှူး ဗိုလ်လက်ယာက ပြောပါတယ်။

တိုက်ခိုက်မှုအတွင်းမှာ စစ်ကောင်စီဘက်က လေးယောက် ငါးယောက်လောက် ဒဏ်ရာရရှိခဲ့ပြီး ပြည်သူ့ကာကွယ်ရေးတပ်ဖွဲ့က ရဲဘော်တွေ ထိခိုက်မှုမရှိ ဆုတ်ခွာနိုင်ခဲ့ကြတယ်လို့ ဆိုပါတယ်။

ဒါ့အပြင် သရက်ကန် ပျူစောထီးစခန်း တောင်ဘက်နားကို ကင်းပုန်းလာဝပ်တဲ့ ပျူစောထီးတွေကို မေ ၁၁ ရက် မနက် ၇ နာရီခွဲလောက်မှာ ဒေသကာကွယ်ရေး ပူးပေါင်းတပ်ဖွဲ့တွေက မိုင်းဆွဲတိုက်ခိုက်ခဲ့လို့ ပျူစောထီး ကိုလတ် ပွဲချင်းပြီးသေဆုံးကာ အများအပြား ဒဏ်ရာရခဲ့တယ်လို့ ဗိုလ်လက်ယာက ပြောပါတယ်။

အဲဒီနောက်မှာ သရက်ကန် ပျူစောထီးစခန်းကနေ ပခုက္ကူမြို့မှာ ရိက္ခာသယ်ဖို့ထွက်လာတဲ့ ကားတစီးကို သရက်ကန်နဲ့ တွင်းမရွာကြားမှာ ထပ်မံမိုင်းဆွဲတိုက်ခိုက်ခဲ့တယ်လို့ ဆိုပါတယ်။

အဲဒီတိုက်ခိုက်မှုကြောင့် ကားကတော့ ပျက်စီးရပ်တန့်သွားပြီး စစ်ကောင်စီဘက်က အများအပြား ဒဏ်ရာရရှိကာ အဲဒီကားကိုတော့ ကာကွယ်ရေးအဖွဲ့တွေက မီးရှို့ဖျက်ဆီးခဲ့ကြတယ်လို့ ပြောပါတယ်။

ဒါ့အပြင် အဲဒီပျူစောထီးတွေကို ဒရုန်းနဲ့ အီနာဂါဗုံးသီး ၅ လုံးဖြုတ်ချကာ ထပ်မံတိုက်ခိုက်ခဲ့ပြီး အဲဒီတိုက်ခိုက်မှုတွေအတွင်းမှာ သေဆုံးသူရှိမရှိ ဆိုတာကိုတော့ ဆက်လက်စုံစမ်းနေတယ်လို့ ဆိုပါတယ်။

အဲဒီတိုက်ခိုက်မှုကို KMDF၊ အလင်းတန်းပြောက်ကျားတပ်ဖွဲ့၊ ဘီလုံးငှက်တပ်ဖွဲ့၊ TYK တပ်ဖွဲ့၊ ဧရာအနောက်တပ်ဖွဲ့တို့နဲ့အတူ ပူးပေါင်းတိုက်ခိုက်ခဲ့တာဖြစ်ပြီး ရဲဘော်တွေ ထိခိုက်မှု မရှိခဲ့ဘူးလို့ ပြောပါတယ်။

အဲဒီတိုက်ခိုက်မှုတွေအတွင်း စစ်ကောင်စီဘက်က ထိခိုက်သေဆုံးတဲ့ အခြေအနေကို ဒီဗွီဘီက သီးခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်ထားတာ မတွေ့ရသေးပါဘူး။

မကွေးတိုင်း၊ ရေစကြိုနဲ့ မြိုင်မြို့နယ်တွေမှာ စစ်တပ်က စစ်ကြောင်းထိုးလာလို့ ဒေသခံ သောင်းနဲ့ချီ ဘေးလွတ်ရာကို ထွက်ပြေးခဲ့ရကာ ပြည်သူတချို့ ဖမ်းဆီးခံခဲ့ရတယ်လို့ ဒေသခံတွေက ပြောပါတယ်။

မေ ၁၁ ရက် မနက် ၂ နာရီကျော်လောက်မှာ ရေစကြိုမြို့နယ်ထဲကို စစ်ကြောင်းထိုးလာလို့ အညာတော၊ ဆတ်သွား၊ စလင်းကုန်း၊ စိုင်သေနဲ့ သံပြာချောင်း ကျေးရွာတွေက ဒေသခံတွေ ဘေးလွတ်ရာ ထွက်ပြေးနေရတယ်လို့ စိုင်သေကျေးရွာ ဒေသခံအမျိုးသမီးတဦးက ပြောပါတယ်။

ကံပေါက်တို့ ကမ်းနီတို့ဘက်မှာ အဲဒီစစ်ကြောင်းက မနေ့ကတည်းက ရောက်နေပြီး မေ ၁၁ ရက် မနက် ၂ နာရီလောက်ကတည်းက အညာတောဘက်ကို ထွက်လာတော့ အညာတောကို ရောက်ပြီလို့ ကြားတာနဲ့  ၂ နာရီသာသာလောက်မှာ ထွက်ပြေးလာခဲ့ရတာလို့ ဆိုပါတယ်။

အင်အား ၁၀၀ ကျော်ပါ စစ်ကြောင်းက အညာတောကတဆင့် စလင်းကုန်းရွာကို စစ်ကြောင်းထိုးနေပြီး အရင်ရက်တွေကလည်း ကမ်းနီ၊ ကံပေါက်နဲ့ ထနောင်းခလောက် ရွာတွေကို စစ်ကြောင်းထိုးခဲ့တယ်လို့ ပြောပါတယ်။

လတ်တလော စစ်ဘေးရှောင် အရေအတွက် ၂၀,၀၀၀ ကျော် ၃၀,၀၀၀ လောက်ရှိနေကာ မနက်ခင်းကပဲ ထွက်ပြေးလာတာဆိုတော့ ဖြစ်သလိုနေနေကြရပြီး အိမ်ကပါလာတာလေးတွေနဲ့ ချက်ပြုတ်စားသောက်နေကြတယ်လို့ ဆိုပါတယ်။

အညာတောရွာက ကလေးသူငယ်တွေ အပါအဝင် စစ်ဘေးရှောင် ၂၀ လောက် လိုက်ပါလာတဲ့ လိုက်ထရပ်ကားတစီးကို ဆတ်သွားရွာနားမှာ ဖမ်းမိတယ်လို့ သတင်းကြားပြီး ပြန်လွတ်လား မလွတ်ဘူးလား ဆိုတာတော့ မသိရသေးပါဘူး။

ဧရာဝတီတိုင်း၊ လပွတ္တာမြို့နယ်မှာရှိတဲ့ ကျေးရွာတွေက ဒေသခံပြည်သူတွေဟာ မုန်တိုင်းရှောင်ဖို့ မြို့ပေါ်ဘုန်းတော်ကြီးကျောင်းတွေနဲ့ စာသင်တိုက်တွေကို လူဦးရေ ထောင်နဲ့ချီပြီးလာရောက် ယာယီ ခိုလှုံနေကြပါတယ်။

လပွတ္တာမြို့ အနီးပတ်ဝန်းကျင်နဲ့ အောက်ဖက်ကျေးရွာတွေက ဒေသခံပြည်သူတွေဟာ မုန်တိုင်းရှောင်ဖို့ အတွက် မေလ ၆ ရက်နေ့ကစတင်ပြီး ရွှေ့ပြောင်းနေထိုင်နေကြတာဖြစ်ကြောင်း ဒေသခံတွေဆီက သိရပါတယ်။

ကူညီကယ်ဆယ်ရေးလုပ်ကိုင် ဆောင်ရွက်ပေးနေသူ တစ်ဦးက " မုန်တိုင်းသတင်းကြေညာပြီး မေလ ၆ ရက်ကစပြီး မြို့ပေါ်ဘုန်းကြီးကျောင်းတွေမှာ လာရောက်နေထိုင်ကြတာ။  မုန်တိုင်းရှောင်သူတွေကတော့ နီးစပ်ရာအဆက်အသွယ်နဲ့ ဘုန်းတော်ကြီးကျောင်းတွေမှာ ယာယီနေကြတာထောင်နဲ့ချီတယ်။ စာရင်းအတိ အကျကတော့ သေချာမသိရသေးဘူး"လို့  ပြောပါတယ်။

လတ်တလော မုန်တိုင်းရှောင် ပြည်သူတွေဟာ လပွတ္တာမြို့ရှိ ဘုန်းတော်ကြီးကျောင်း ၃၀ နီးပါးမှာ  ယာယီခိုလုံနေကြပြီး  တချို့ကတော့ မြောင်းမြမြို့ပေါ်ကို တိမ်းရှောင် နေသူတွေလည်း ရှိပါတယ်။

ဧရာဝတီတိုင်းကို မုန်တိုင်းတိုက်ခတ်နိုင်တယ်လို့ ခန့်မှန်းတဲ့သတင်းထွက်ပေါ်ပြီးနောက်မှာ စစ်ကောင်စီခန့် ဧရာဝတီတိုင်းဝန်ကြီးချုပ် ဦးတင်မောင်ဝင်းနဲ့ စစ်ကောင်စီတပ်ဖွဲ့က မုန်တိုင်းမဝင်ရောက်နိုင်ဖို့ ပုသိမ်မြို့ရွှေမုဌောစေတီမှာ ကန်တော့ပွဲပေးတာ ပရိတ်ရွတ်တာ တွေပြုလုပ်နေပြီး မော်တင်စွန်းပင်လယ်ပြင်မှာ နဂါးစာကျွေးတာကို  မေလ ၈ ရက်နေ့က ပြုလုပ်ခဲ့ပါတယ်။

လက်ရှိအချိန်မှာတော့ ဘင်္ဂလားပင်လယ်အော်မှာ လေဖိအားနည်း ရပ်ဝန်း ဖြစ်ပေါ်နေပြီး နောက် ၁၈ နာရီအတွင်း မုန်တိုင်းငယ်အဖြစ်ရောက်ရှိနိုင်ကာ မေလ ၁၀ ရက်နေ့မှာ ဆိုင်ကလုန်း မုန်တိုင်းအဖြစ်ရောက်ရှိနိုင်တယ်လို့ မိုးဇလဌာနက ထုတ်ပြန်ထားပါတယ်။

မုန်းတိုင်းဘေးကြိုတင် သတိပေးချက်တွေကို စစ်ကောင်စီက မီဒီယာတွေကြေညာနေတာ ရှိသလို အမျိုးသားညီညွတ်ရေးအစိုးရ (NUG) ကလည်း မုန်းတိုင်းဘေးအန္တရာယ် အသိပေး ထုတ်ပြန်ထားပါတယ်။

ပြီးခဲ့တဲ့ ၂၀၀၈ ခုနှစ် မေလက တိုက်ခိုက်ခဲ့တဲ့ နာဂစ်မုန်တိုင်းကြောင့် ဘိုကလေးမြို့နယ် လပွတ္တာ မြို့နယ်အပါအဝင် ဧရာဝတီတိုင်းမှာ  ပြည်သူ ၁ သိန်းကျော် သေဆုံးခဲ့ပါတယ်။