စစ်ကောင်စီက အာဏာသိမ်းပြီး ပုဒ်မမျိုးစုံနဲ့ တရားစွဲဆို ထောင်ဒဏ်အမိန့်ချမှတ်ခံထားရတဲ့ နေပြည်တော်မြို့တော်၀န် ဒေါက်တာမျိုးအောင်နဲ့ပတ်သက်တဲ့အမှုတွေထဲက ငါးမှုကို ပြည်ထောင်စုတရားလွှတ်တော်ချုပ်မှာ အယူခံတင်ထားတယ်လို့ တရားရေးနဲ့နီးစပ်တဲ့ အသိုက်အဝန်းက သိရပါတယ်။

“ငါးမှုအယူခံတင်ထားတာ ခုလာမယ့် ၁၆ ရက်နေ့မှာ လက်ခံသင့် မခံသင့် ကြားနာမယ်၊ သူ့အမှုတွေကများတော့ ဘယ်အမှုတွေလည်းတော့ သေချာမသိဘူး” လို့ တရားရေးနဲ့ နီးစပ်သူတဦး က ပြောပါတယ်။

ဒေါက်တာမျိုးအောင်အပေါ်စွဲဆိုတာတဲ့အမှုပေါင်း ၂၀ ရှိပြီး အယူခံတင်ထားတဲ့အမှုတွေမှာ အမှုအမှတ် ၁၂/၂၀၂၃၊ ၁၃/ ၂၀၂၃၊ ၁၄/၂၀၂၃၊ ၁၅/၂၀၂၃၊ ၁၆/၂၀၂၃ တို့ဖြစ်တယ်လို့ သိရပါတယ်။

ဒေါက်တာမျိုးအောင်ဟာ စုစုပေါင်း ထောင်ဒဏ်နှစ် ၂၀ ကျော်ချမှတ်ခံရပြီး ရမည်းသင်းထောင်မှာ အကျဉ်းကျခံနေရပါတယ်။ 

ဒေါက်တာမျိုး အောင်ကို နိုင်ငံတော်အတိုင်ပင်ခံ ဒေါ်အောင်ဆန်းစုကြည်၊ နိုင်ငံတော်သမ္မတဦး၀င်းမြင့်တို့နဲ့ ပတ်သက်တဲ့အမှုတွေမှာလည်း အမှုတွဲအဖြစ် တရားစွဲဆိုထားသလို သူတဦးတည်း အပေါ်မှာလည်း အဂတိမှုတွေများစွာနဲ့ တရားစွဲဆိုထားပါတယ်။

နေပြည်တော်မြို့တော်ဝန်ဟောင်း ဒေါက်တာမျိုးအောင်နဲ့ ဒုမြို့တော်ဝန်ဟောင်း ဦးရဲမင်းဦးတို့ကို ဒီကနေ့ နေ့လယ်ပိုင်းက နေပြည်တော်အချုပ်ထောင်ရှိ အထူးတရားရုံးကနေ အဂတိ ပုဒ်မ ၅၅ နဲ့ ထောင်ဒဏ်သုံးနှစ်စီ ချမှတ်ခဲ့တယ်လို့ နေပြည်တော်တရားရေးဝန်ထမ်းတွေဆီက သိရပါတယ်။

ဒေါက်တာမျိုးအောင်နဲ့ ဦးရဲမင်းဦးတို့ နှစ်ဦးကို ဒီကနေ့ နေ့လယ်ပိုင်းက နေပြည်တော်အချုပ်ထောင်ရှိ အထူးတရားရုံးကနေ အဂတိပုဒ်မ ပုဒ်မ ၅၅ နဲ့ အမှုအားလုံးကို တပေါင်းတည်းကျခံစေဖို့ သုံးနှစ်စီချမှတ်ခဲ့တာလို့ ရှေနေတဦးက ပြောပါတယ်။

"ဒေါက်တာမျိုးအောင်က အဂတိပုဒ်မနဲ့အမှုက ငါးမှု၊ ဦးရဲမင်းဦးက နှစ်မှု အဲ့ဒါတွေကို စုပေါင်းပြီး အမိန့်ချတာ သုံးနှစ် တစ်ပေါင်းတည်းကျခံစေရန်ဆိုပြီး အမိန့်ချတာ" လို့ ပြောပါတယ်။

သူတို့နှစ်ဦးကို စစ်ကောင်စီက ပြီးခဲ့တဲ့ ဧပြီလက နေပြည်တော်က မြို့နယ်အချို့က မြေကွက်တွေကို ရောင်းချခဲ့တယ်လို့ဆိုကာ အဂတိပုဒ်မ ၅၅ နဲ့ နေပြည်တော်ကောင်စီနယ်မြေ အမှတ် (၁) မြို့မရဲစခန်းမှာ အမှုဖွင့်လှစ်ခဲ့တာ ဖြစ်ပါတယ်။

ဒေါက်တာမျိုးအောင်ဟာ ပြီးခဲ့တဲ့လတွေက ပုဒ်မ ၅၀၅ (ခ)၊ အဂတိပုဒ်မတွေနဲ့ စုစုပေါင်း ထောင်ဒဏ် ၁၉ နှစ်ချမှတ်ခံထားရသူဖြစ်လို့ လက်တလောမှာ စုစုပေါင်းထောင်ဒဏ် ၂၂ နှစ်ကျခံမှာ ဖြစ်ပါတယ်။

အလားတူပင် ဦးရဲမင်းဦးမှာလည်း ပြီးခဲ့တဲ့ လတွေက အဂတိပုဒ်မတွေနဲ့ စုစုပေါင်းထောင်ဒဏ် အနှစ် ၂၀ ချမှတ်ခံထားရပြီး လက်တလောမှာ စုစုပေါင်းထောင်ဒဏ် ၂၃ နှစ်ကျခံရမှာဖြစ်ပါတယ်။

ဒီကနေ့ အမှုချခံရသူနှစ်ဦးမှာ NLD အစိုးရလက်ထက်မှာ ဒေါက်တာမျိုးအောင်က  နေပြည်တော် မြို့တော်ဝန် တာဝန်ယူခဲ့သလို ဦးရဲမင်းဦးမှာလည်း ဒုမြို့တော်ဝန် တာဝန်ယူခဲ့သူဖြစ်ပါတယ်။