မြစ်ကြီးနားအကျဉ်းထောင်မှာ ပုဒ်မ ၅၀၅-က နဲ့ ထောင်ဒဏ် ၂  နှစ်ချမှတ်ခံထားရတဲ့ ကချင်အမျိုးသားကွန်ဂရက် (KNC) ပါတီဥက္ကဋ္ဌ  ဒေါက်တာအမ်ကောန်လ ဇန်နဝါရီ ၄ ရက် ဒီနေ့  ပြန်လွတ်မြောက်လာပြီလို့ သူ့ရဲ့ မိသားစုအသိုက်အဝန်းက ပြောပါတယ်။ 

ဒေါက်တာအမ်ကောန်လဟာ ၇၅ နှစ် စိန်ရတု လွတ်လပ်ရေးနေ့ လွတ်ငြိမ်းချမ်းသာခွင့်နဲ့ လွတ်မြောက်လာတာဖြစ်တယ်လို့ မိသားစုနဲ့ နီးစပ်သူတစ်ဦးက ပြောပါတယ်။ 

“ထောင်ဒဏ် ၂နှစ်က နည်းနည်းလိုသေးတယ်။ ဘယ်လိုပဲ ဖြစ်ဖြစ် လွတ်လာတော့ ကောင်းတာပဲ။ ရှေ့ဆက်လုပ်ဆောင်ရမယ့် လုပ်ငန်းတွေလည်း ရှိသေးတော့” လို့ မိသားစုနဲ့ နီးစပ်သူက ပြောပါတယ်။ 

ကချင်အမျိုးသားကွန်ဂရက်(KNC) တာဝန်ရှိသူတစ်ဦးကလည်း “ဒီနေ့ နေ့လယ် ၁ နာရီက လွတ်လာပြီ။ သူနဲ့တော့ မတွေ့ရသေးဘူး။ သူလုပ်ငန်းတွေ ပြန်ဆောင်ရွက်ဖို့ကတော့ ကျနော်တို့ CEC အစည်းအဝေးတွေ လုပ်ပြီးမှပဲ ပြောနိုင်မယ်။” လို့ ပြောပါတယ်။

ဒေါက်တာအမ်ကောန်လကို နေပြည်တော်မှာရှိတဲ့ သူ့ရဲ့နေအိမ်ကနေ စစ်ကောင်စီတပ်ဖွဲ့ဝင်တွေကနေ ၂၀၂၁ ခုနှစ် ဩဂုတ် ၂၅  ရက်နေ့က  ဖမ်းဆီးထိန်းသိမ်းခဲ့ပြီး ဇမ္ဗူသီရိမြို့နယ် တရားရုံးမှာ ပုဒ်မ ၅၀၅ - က နဲ့ တရားစွဲဆိုပြီးတဲ့နောက် ၂၀၂၂ ခုနှစ် မတ် ၂၃  ရက်နေ့မှာ ထောင်ဒဏ် ၂ နှစ် ပြစ်ဒဏ်ချမှတ်ခဲ့တာ ဖြစ်ပါတယ်။

ပြစ်ဒဏ် ၂ နှစ် ချမှတ်ခဲ့ပြီးနောက်မှာလည်း မြောက်ပိုင်းတိုင်းစစ်ဌာနချုပ်က ဒု-ဗိုလ်မှူးကြီး သန်းထိုက်အောင်ကနေ တရားလိုလုပ်ပြီး မြစ်ကြီးနားမြို့အမှတ်(၁)ရဲစခန်းမှာ ပုဒ်မ ၅၀၅-က နဲ့ပဲ အမှုထပ်ဖွင့်ထားတာကြောင့်  အမှုရင်ဆိုင်ဖို့အတွက် ရမည်းသင်းအကျဉ်းထောင်ကနေ မြစ်ကြီးနား အကျဉ်းထောင်ကို ၂၀၂၂ မေလ ၉ ရက်နေ့က ရောက်ရှိခဲ့ပါတယ်။

မြစ်ကြီးနား အမှတ် ၁ ရဲစခန်းမှာ စွဲဆိုထားတဲ့ အမှု အထမမြာက်တဲ့အတွက် ၂၀၂၂ ဇွန်လ ၂၂ ရက်နေ့မှာ အဲဒီအမှုကနေ တရားသေလွတ်မြောက်ခဲ့ပြီး နေပြည်တော် ဇမ္ဗူသီရိတရားရုံးက ချမှတ်ထားတဲ့ ထောင်ဒဏ် ၂  နှစ်ကို မြစ်ကြီးနားအကျဉ်းထောင်မှာ ဆက်လက် ကျခံခဲ့ရတာ ဖြစ်ပါတယ်။

ဒေါက်တာ အမ်ကောန်လဟာ စစ်အာဏာသိမ်းပြီးနောက် ကချင်ပြည်သူ့နိုင်ငံရေးရှေ့ဆောင်အဖွဲ့ (KPPF) ကို ဦးဆောင်တည်ထောင်ခဲ့သူဖြစ်ပြီး KPPF ရဲ့ လုပ်ဆောင်ချက်တွေတွေဟာ နိုင်ငံတော် အကြည်ညိုပျက်စေတယ်ဆိုတဲ့ စွပ်စွဲချက်နဲ့ စစ်ကောင်စီက ဒေါက်တာအမ်ကောန်လကို   ပုဒ်မ ၅၀၅ - က နဲ့ တရားစွဲဆိုထောင်ချခဲ့တာဖြစ်ပါတယ်။‌

ကချင်အမျိုးသား ကွန်ဂရက်ပါတီ (KNC) ဥက္ကဋ္ဌ ဒေါက်တာ အမ်ကောန်လဟာ စစ်ကောင်စီတပ်က စွဲဆိုထားတဲ့ ပုဒ်မ ၅၀၅ (က) အမှုတခုကနေ ကွင်းလုံးကျွတ်လွတ်မြောက်ခဲ့တယ်လို့ သူ့ရဲ့ပါတီက ထုတ်ပြန်ပါတယ်။

မြောက်ပိုင်းတိုင်း စစ်ဌာနချုပ်က ဒုဗိုလ်မှူးကြီး သန်းထိုက်ကတရားလိုလုပ်ပြီး မြစ်ကြီးနားမြို့နယ် တရားရုံးမှာ ဒေါက်တာ အမ်ကောန်လကို တရားစွဲဆိုထားတဲ့အမှုကနေလွှတ်ပေးဖို့  စစ်ကောင်စီ တရားရုံးက ဇွန်လ ၂၂ ရက် ဒီနေ့ ဆုံးဖြတ်လိုက်တာပါ။

ဒေါက်တာအမ်ကောန်လကို ၂၀၂၁ ခုနှစ် ဩဂုတ်လက နေပြည်တော်မှာဖမ်းဆီးပြီး အခုနှစ် မတ်လမှာ ပုဒ်မ ၅၀၅-က နဲ့ နေပြည်တော် ဇမ္ဗူသီရိမြို့နယ်တရားရုံးက ထောင်ဒဏ် ၂ နှစ်ချမှတ်ထားပါတယ်။

အဲဒီနောက် အနောက်ပိုင်းတိုင်းစစ်ဌာနချုပ်က ဒုတိယဗိုလ်မှူးကြီးကလည်း မြစ်ကြီးနားမြို့ မြို့မရဲစခန်းမှာ ထပ်ပြီး အမှုဖွင့်ခဲ့တာကြောင့် မေလ ၉ ရက်နေ့က မြစ်ကြီးနားမြို့ အကျဉ်းထောင်ကို ရောက်လာခဲ့တာပါ။