အာဏာရူး မအလနဲ့ အကြမ်းဖက်အဖွဲ့အစည်းက ၂၀၂၃ ခုမှာ ရွေးကောက်ပွဲပြုလုပ်ပြီး အရှင်ထွက်ထွက်ဖို့ ကြိုးပမ်းပြင်ဆင် အားထုတ်နေတာကို တွေ့ကြရတယ်။ ဒါပေမဲ့ ဒင်းတို့ မျှော်မှန်းထားသလို အရှင်ထွက် မထွက်နိုင်ဘဲ အသေထွက်သာ ထွက်နိုင်မယ်လို့ တွက်ချက်မိတယ်။

၂၀၂၀ ရွေးကောက်ပွဲကို ပြည်သူ့တရပ်လုံးကရော၊ နိုင်ငံတကာကပါ သန့်ရှင်းလွတ်လပ်မျှတသော ရွေးကောက်ပွဲလို့ အခိုင်အမာ သတ်မှတ်ထားပြီး ဖြစ်တယ်။ ဒါကို ဒင်းတို့ အကြမ်းဖက်အုပ်စုလောက်ကသာ မဟုတ်တမ်းတရားတွေနဲ့ စွပ်စွဲပြီး အာဏာသိမ်းခဲ့ကြတာ မဟုတ်လား။ ဒါကြောင့်လည်း နိုင်ငံတဝန်း အတိုင်းအတာနဲ့ ဆန္ဒပြထုတ်ဖော် ကန့်ကွက်ခဲ့ကြတယ်။ ပြည်သူတွေရဲ့ ဆန္ဒသဘောတရားကို အကြမ်းဖက်သမားတွေပီပီ လုံးဝ ထည့်သွင်းမစဉ်စားဘဲ ရက်စက်ယုတ်မာစွာ ပစ်သတ်နှိမ်နင်းခဲ့တယ်။ ခုဆို လက်နက်ကိုင်တော်လှန်ရေး အနေအထားအထိ ရောက်ရှိလာပြီ မဟုတ်လား။

အဲဒီ လက်နက်ကိုင်တော်လှန်ရေးဖြစ်စဉ် ပေါ်ထွန်းလာအောင် ဖန်းတီးကြတဲ့ အဓိက တရားခံဟာ အာဏာရူး မအလရဲ့ အကြမ်းဖက်အဖွဲ့အစည်းဖြစ်တယ်။ ဒင်းတို့မှာသာ ဆိုးမွေအေားလုံးအတွက် တာဝန်ခံမှု၊ တာဝန်ယူမှု အပြည့်အဝယူကြရမှာ ဖြစ်ပါတယ်။

ဒီမှာ ကျုပ်တို့နိုင်ငံမှာ မြို့နယ်ပေါင်း ၃၃၀ ရှိတယ်။ ၂၀၁၀ ခု ရွေးကောက်ပွဲတုန်းက မြို့နယ် ၃၂၅၊ ၂၀၁၅ ရွေးကောက်ပွဲမှာ မြို့နယ်ပေါင်း ၂၃၂၊ ၂၀၂၀ ခု ရွေးကောက်ပွဲမှာ မြို့နယ် ၃၁၅ တို့မှာသာ ရွေးကောက်ပွဲ ကျင်းပနိုင်ခဲ့တယ်။ အခု ၂၀၂၃ ခု ရွေးကောက်ပွဲမှာတော့ တနိုင်ငံလုံး နေရာမလပ် ကျင်းပမယ်တဲ့။ ခြံစောင့် ဇော်မင်းထွန်း (အများသိမှတ်ထားတဲ့ ဇော်မဲလုံး) က ပြောဆိုသွားတာလေ။ ဒင်းရဲ့စကားကို လက်ရှိအနေအထားအရ ဦးနှောက်ရှိကြတဲ့သူတိုင်းက လက်မခံပါဘူး။

ဒါပေမဲ့ ဒင်းတို့ကတော့ ဒင်းတို့ဖြစ်ချင်တဲ့ အနေအထားကို အင်အားနဲ့ ခြိမ်းခြောက်ဖိနှိပ် ဆောင်ရွက်ကြမယ့် သဘောပါပဲ။ ပြည်သူ့ဆန္ဒထင်ဟပ်မှု မပါဝင်ဘဲ လုပ်ဆောင်တဲ့ အရာအားလုံးရဲ့ အကျိုးဆက်ဟာ ပိုမိုဆိုးဝါးတဲ့ အခြေအနေတွေသာ ဖြစ်စေလိမ့်မယ်လို့ ဒင်းတို့ကို သတိပေးလိုက်ပါရစေ။

ဇော်မင်းထွန်းက တနေ့ကပဲ PR စနစ် ဒီမိုကရေစီရွေးကောက်ပွဲကို လက်မခံဘဲ ဒင်းတို့ကိုသာ ဆက်ဆက်တိုက်ခိုက် တော်လှန်နေမယ်ဆိုရင် မြောက်ကိုရီးယားနိုင်ငံလို ဖြစ်သွားစေမယ်လို့ ပြောခဲ့သေးတယ် မဟုတ်လား။ ငါတို့ပြည်သူတွေ ပိုင်ဆိုင်တဲ့ နိုင်ငံကိုများ ဒင်းအမေလင်၊ ဒင်းပထွေးဆီက အမွေရလိုက်တဲ့ ပစ္စည်းလိုများ ထင်မှတ်နေသလား မပြောတတ်ပါဘူး။ ပြီးတော့ မြောက်ကိုရီးယားက ပြည်သူတွေရဲ့ လွတ်လပ်မှုတွေကို ထိန်းချုပ်ထားပြီး နျူကလီးယားပိုင်ဆိုင်ရင် နိုင်ငံတကာနဲ့ ရင်ပေါင်တန်းနိုင်မယ်လို့ ဆိုတဲ့ တစွန့်တစ နိုင်ငံချစ်စိတ်တွေ ရသေးတယ်။

ဒင်းတို့ကလား… ပြည်သူတွေကို ပစ်သတ်၊ ပြည်သူ့စည်းစိမ်တွေကို ဖျက်ဆီးမီးရှို့ပြီး ဒင်းတို့ အာဏာတည်မြဲရေးကိုသာ ကိုးစားနေကြတဲ့ ကောင်တွေ၊ နိုင်ငံဘဏ္ဍာတွေကို ရနိုင်သမျှ ခိုင်းနေကြတဲ့ သူခိုးတွေ၊ ခွေးတိရစ္ဆာန်ကမှ ကျွေးမွေးတဲ့သခင်ကို သစ္စာရှိသေးတယ်။ ဒင်းတို့က ကျွေးမွေးတဲ့ ပြည်သူကို ရန်သူလို့ သတ်မှတ်ထားတဲ့ကောင်တွေ။

ပြီးတော့ ၂၅ ရာခိုင်နှုန်း အသာစီးရထားတာတောင် ၅၀ ရာခိုင်နှုန်းရရှိအောင် မစွမ်းဆောင်နိုင်သူတွေဆိုတော့ PR စနစ် ဆောင်ရွက်ချင်မှာပေါ့။ အခု လက်နက်ကိုင် တိုင်းရင်းသားအဖွဲ့အစည်းတွေနဲ့ တွေ့ဆုံတာလည်း ဒင်းတို့ပြုလုပ်မယ့် ရွေးကောက်ပွဲအတွက် မဲဆွယ်တဲ့ အနေအထားပါပဲ။ ဒါမှလည်း အာဏာရူး အကြမ်းဖက်ခေါင်းဆောင် မအလရဲ့ သမ္မတဖြစ်မြောက်ရေး မျှော်လင့်မှုအိပ်မက် မက်နိုင်မှာပေါ့။

ဟအကောင် မအလ ရေ… မင်းရဲ့ အခါပေးဆရာတွေလည်း မေးကြည့်ဦး၊ ထီးဖြူဆောင်းရမယ်ဆိုတာ ဘယ်အချိန်လဲ ဆိုတာကို။ တော်ကြာ ဗေဒင်ဆရာတယောက်က လူတယောက်ကို ထီးဖြူဆောင်းရကိန်း မြင်တယ်လို့ ပြောသလို ဖြစ်နေပါဦးမယ်။ ဒီလိုကွ ရှေးအခါကတော့ ထီးဖြူဆောင်းရကိန်း မြင်တယ်ဆိုတာ ရှင်ဘုရင်ဖြစ်လိမ့်မယ်ဆိုတဲ့ သဘောပဲ။ ဒါနဲ့ အဲဒီလူဟာ ဘုရင်ဖြစ်မှာပဲဆိုပြီး အလုပ်မလုပ်တော့ဘဲ ရှိတာလေး ထိုင်စားနေတာပေါ့။ နောက်ဆုံး ငတ်ပြီး သေငယ်ဇော မြောပါလေရော၊ အရပ်ကလည်း ဘုရင်ရူး၊ ရူးနေတဲ့ကောင်ဆိုတော့ ပစ်ထားကြတာပေါ့ကွာ။

အဲဒီမှာ ဘုရင်ကြွလာပြီး နေပူထဲ ငတ်ပြတ် သေငယ်ဇော မြောနေတဲ့ ဘုရင်ရူး မြင်တာနဲ့ သနားပြီး ထီးဖြူဆောင်းခိုင်းစေသတဲ့။ ထီဖြူလည်း ဆောင်းလိုက်ရော အဲဒီ ဘုရင်ရူးလည်း အသက်ထွက်သွားရှာတော့တာတဲ့ မောင်…။

ခုလည်း မအလ ရေ…. မင်းလည်း ဒီအဖြစ်မျိုးနဲ့ ကြုံကြိုက်နိုင်တယ်လို့ ကျုပ်တော့ ထင်မြင်နေမိပါကြောင်း။

ဒေါင်းနီ

၁၂ လ ၁၂ ရာသီပွဲထဲမှာ ကျုပ်တို့လူမျိုးတွေ အလေးအနက်အထားဆုံး၊ အပျော်ရွှင်ဆုံး ပါဝင်ဆင်နွှဲကြတဲ့ ပွဲတော်က နှစ်ကူးသင်္ကြန်ပွဲတော်ပါပဲ။ ကိုဗစ်-၁၉ ကြောင့် တနှစ် မဆင်နွှဲရ၊ ဒင်းတို့ အာဏာသိမ်းလို့ မဆင်နွှဲရ..။ ပြည်သူတွေ သင်္ကြန်ငတ်မွတ်နေတာ ၂ နှစ်ရှိသွားပြီ..။ ဒီနှစ် စည်စည်ကားကား ကျင်းပပေးလိုက်ရင် သင်္ကြန်ပွဲတော်ကြီး ဝက်ဝက်ကွဲအောင် စည်ကားလိမ့်မယ်လို့ တွက်ဆထားကြဟန်တူပါရဲ့။ ဒါပေမဲ့ ကျုပ်တို့ ပြည်သူတွေက ဒင်းတို့ကို အသည်းပေါက်အောင် နာကျည်းနေကြတာလေ ..။

ဒီတော့ ကျုပ်တို့ ပြည်သူတွေက အပျော်သင်္ကြန်ကို တော်လှန်သင်္ကြန်အဖြစ်ပြောင်းလဲပြီး ရေမဆော့သပိတ်နဲ့ တုံ့ပြန်လိုက်ကြတယ်။ ဒင်းတို့ မပြောနဲ့ ကျုပ်တောင် ပြည်သူတရပ်လုံးရဲ့ ညီညွတ်မှုကို မြင်တွေ့လိုက်ရတော့ ကြက်သီးမွေးညင်းထအောင် လန့်ဖျပ် ကြောက်ရွံ့မိပါရဲ့။ နှစ်ဆန်းတရက်နေ့မှာ အပြင်မထွက်ရ၊ ထွက်ရင် ယောက်ျားဆိုရင် ၃ ချက်၊ မိန်းမဆိုရင် ၂ ချက်၊ ကလေးဆိုရင် ၁ ချက် ကြိမ်ဒဏ်ပေးမယ်လို့ တောက်တီးတောက်တဲ့ ဥပဒေတွေ လိုက်လံကြေညာပါလေရော။ တကယ်ကို ကပေါက်တိ ကပေါက်ချာ..။

ဘာပဲဖြစ်ဖြစ် အဲဒီအချက်တွေဟာ ကျုပ်တို့ဆင်နွှဲနေတဲ့ နွေဦးတော်လှန်ရေးအောင်မြင်တော့မယ့် လက္ခဏာတွေပဲလို့ ကျုပ်ကတော့မှတ်ယူမိသဗျာ။ ပြည်သူတွေရဲ့ ညီညွတ်မှုကို အလေးနီပြုလိုက်ပါရဲ့။

ဒီမှာ မအလ က ဘွဲ့ထူး၊ ဂုဏ်ထူးတွေလည်း ဖောခြင်းသောခြင်း ပေးအပ်လာတာ တွေ့ရှိရသဗျ။ အဲဒီမှာ ရက်ပိုင်းသာ သမ္မတဖြစ်ခွင့်ရလိုက်တဲ့ ဒေါက်တာမောင်မောင်တို့၊ နာရီပိုင်းအတွင်းသာ ယာယီသမ္မတဖြစ်ခွင့်ရလိုက်တဲ့ မြင့်ဆွေတို့ပင် ပါလိုက်သေးရဲ့။ ဒါပေမဲ့ ငါးနှစ်ငါးမိုး သမ္မတလုပ်ခဲ့တဲ့ သိန်းစိန်တော့ ပါဝင်မလာဘူး။ ရည်ရွယ်ချက်ရှိရှိ ချန်လှပ်ထားခဲ့ဟန်တူပါရဲ့။ ကျုပ်ဖြင့် ပြန်ဝန်ဟောင်း ရဲထွဋ်အစား မျက်ခုံးတွေလှုပ်လိုက်တာပါ။

အဂ္ဂမဟာ သရေစည်သူ မအလ က ဒင်းအတွက်တော့ မမေ့မလျော့ ဘွဲ့ထပ်ပြီး ယူလိုက်ပြန်တယ်။  “သတိုးသီရိ သုဓမ္မ” ဘွဲ့ တဲ့။ ကျုပ်အနေနဲ့တော့ အရူးကောင် မအလတယောက် အဲဒီဘွဲ့ လက်ခံရယူတာ နားမလည်နိုင်ဘူး။ ဘာလို့လဲဆိုတော့ ဒင်းက မတန်မရာ သမ္မတရာထူး ရူးနေတာလေ။ သိကြတယ်ဟုတ်။”

ဒါပေမဲ့ ကျုပ်တို့ မြန်မာတွေ အစဉ်အဆက် အစဉ်အလာမှာ “ကျွန်ချစ်ရင် နေမျိုး၊ သားချစ်ရင် သတိုး” ဆိုတဲ့ ဆိုရိုးရှိတယ်ဗျ။ မိမိရဲ့ ကျေးကျွန်ကို ချစ်ရင် “နေမျိုး” ဘွဲ့ပေးတတ်တယ်။ သီပေါဘုရင်က ဆိုင်းဆရာ စိန်ဗေဒါကို “နေမျိုးဗလကျော်သူ” ဘွဲ့ပေးအပ်ခဲ့တယ်။ နောက် သားသမီးတွေကိုချစ်ရင်တော့ “သတိုး” ဘွဲ့ ပေးအပ်တတ်ကြတယ်။ အခု အရူးကောင် မအလ ကို ပေးအပ်တဲ့ ဘွဲ့ထူးက  “သတိုးသီရိ သုဓမ္မ” ဆိုတော့ သားသမီးပေးတဲ့ ဘွဲ့ဖြစ်နေတယ် .. ။

ဒီမှာ လက်ရှိ သမ္မတကြီးက ဦးဝင်းမြင့်။ ရှေးအစဉ်အလာဆိုရင် ဘုရင်ကြီးက ဦးဝင်းမြင့်။ ဒီတော့ မအလ က ဦးဝင်းမြင့်ရဲ့ သားအဖြစ် ခံယူလိုက်သလိုဖြစ်နေတယ်။ အရူးကောင်ရာ ကြီးတောင့်ကြီးခါမှာ ကိုယ့်မိခင်ကြီးကို နောက်လင်ပေးစားဖို့ မကြိုးစားပါနဲ့။ မင့် ရင်ဘတ်မှာလည်း ချိတ်ဆွဲစရာမရှိအောင် ဘွဲ့တံဆိပ်တွေ ပြည့်နေပြီ ဥစ္စာကို..။

ကျပ်အကြံပေးချင်တာကတော့ ဓာတ်ရှင်မင်းသမီးရဲ့ ပေးအပ်ပြီးတဲ့ တံဆိပ်တောင် ပြန်လည်ရုပ်သိမ်းခဲ့တာပဲ။ ခုလည်း မင်းရဲ့ ပေါချာချာဘွဲ့  “သတိုးသီရိ သုဓမ္မ” ကို ပြန်သာပေးအပ်လိုက်။ ဟုတ်ပြီလား။ နို့ မဟုတ်ရင် အမေနဲ့ လဲလှယ်ပြီး ရရှိခဲ့တဲ့ ဘွဲ့တံဆိပ်ကြီးလို့ မော်ကွန်းဝင်သွားလိမ့်မယ်။ မော်ကွန်းထိုးကြလိမ့်မယ်။ ဘာပဲဖြစ်ဖြစ် “ကျနော်ကတော့ ဘာနဲ့ လဲလှယ်ရ လဲလှယ်ရ ယူမှာပဲ ရရင်” ဆိုရင်တော့ အရူးကောင်ရဲ့ သဘောပ …။

ဟော .. ခုဆို ၂ နှစ်ကျော် ပိတ်ထားခဲ့တဲ့ ရုပ်ရှင်ရုံတွေလည်း ပြန်လည်ဖွင့်လှစ်လိုက်ပြီ။ မန္တလေးမှာတော့ ကြည့်မယ့်သူ မရှိဘူးတဲ့။ ရန်ကုန် သမ္မတရုံမှာတော့ ကြည့်တဲ့သူ ၂၀ လောက်ရှိသတဲ့။ ကောင်းတယ်..။ ပိုက်ဆံပြန်ပေးရင်လည်း အရှက်ရ။ ပြသပြန်ရင်လည်း အရှုံးရ။ ရုပ်ရှင် ကုမ္ပဏီပိုင်ရှင်တွေ၊ ရုပ်ရှင်ရုံပိုင်ရှင်တွေ ဘယ်အထိ တောင့်ခံထားနိုင်ကြမလဲ..။ အာဏာရှင် အကြမ်းဖက်အဖွဲ့အစည်းအား တော်လှန်ရေးဟာ ပြည်သူအားလုံးနဲ့ သက်ဆိုင်နေပါကြောင်း …။

နွေဦးတော်လှန်ရေး အောင်ရမည်။

ဒေါင်းနီ