ဧရာဝတီတိုင်း၊ ဓနုဖြူမြို့နယ်၊ ကမ်းငူကြီးကျေးရွာအုပ်စုထဲက ကျေးရွာ‌တွေမှာရှိတဲ့ ပြောင်းခင်းတွေမှာ လယ်ကြွက်တွေ ဝင်ရောက်ဖျက်ဆီးလို့ ပြောင်းခင်းတွေပျက်စီးပြီး နှစ်ခါပြန် စိုက်ပျိုးနေရတဲ့အတွက် အခက်တွေ့နေကြတယ်လို့ ဒေသခံတောင်သူတွေက ပြောပါတယ်။

အောက်တိုဘာလဆန်းလောက်ကစပြီး လယ်ကြွက်တွေ ဝင်ရောက်ဖျက်ဆီးနေတဲ့အတွက် ပြောင်းခင်းတွေကို ပြန်ဖျက်ပြီး အသစ်ပြန်စိုက်ပျိုးရသလို ကြွက်သတ်ဆေး၊ ပြောင်းစေ့၊ အစာအိတ်နဲ့ တခြားစိုက်ပျိုးထုတ်လုပ်မှု ကုန်ကျစရိတ်တွေ ပိုပြီးကုန်ကျနေတယ်လို့ ဆိုပါတယ်။

အဲဒီလို လယ်ကြွက်တွေ သောင်းကျန်းနေတာနဲ့ပတ်သက်လို့ စစ်ကောင်စီလက်အောက်ခံ စိုက်ပျိုးရေးဝန်ကြီးဌာနက ဝန်ထမ်းတွေကို တောင်သူတွေက သွားရောက် အကူအညီ တောင်းခံခဲ့ပေမဲ့ အကူအညီပေးတာမျိုး မရှိတာကြောင့် ကိုယ့်နည်းကိုယ့်ဟန်နဲ့သာ ဖြေရှင်းနေရတယ်လို့ ဒေသခံတောင်သူတယောက်က ပြောပါတယ်။

လက်ရှိမှာလည်း ပြောင်းစိုက်တောင်သူတွေကို စစ်ကောင်စီ စိုက်ပျိုးရေးဝန်ကြီးဌာနက စိုက်ပျိုးစရိတ်ချေးငွေ မပေးတဲ့အတွက် ‌တောင်သူတွေအနေနဲ့ ငွေတိုးချေးငှားပြီး စိုက်ပျိုးနေရတာဖြစ်လို့ ချေးငွေပြန်မဆပ်နိုင်ဘဲ အတိုးများပြားလာမှာကို စိုးရိမ်နေကြပါတယ်။

ဓနုဖြူမြို့နယ်ထဲမှာ ကိုင်းကျွန်းမြေ ၆,၀၀၀ ကျော်ရှိပြီး လယ်ကြွက်တွေဖျက်ဆီးလို့ ပျက်စီးတဲ့ စိုက်ပျိုးဧကပေါင်း ၁,၀၀၀ ကျော်ရှိတယ်လို့လည်း သိရပါတယ်။

၂၀၁၉ ခုနှစ်က ကောက်ခံထားတဲ့ စာရင်းတွေအရ ဓနုဖြူမြို့နယ်ထဲမှာ လူဦးရေ ၁၉၀,၀၀၀ ကျော်ရှိပြီး အများစုက ကျေးလက်နေပြည်သူတွေဖြစ်ကာ ဆန်စပါး၊ ပြောင်း၊ ငရုတ်နဲ့ ပဲအမျိုးမျိုးကို အဓိကထား စိုက်ပျိုးနေကြတာလည်း ဖြစ်ပါတယ်။

ဧရာဝတီတိုင်း၊ ဓနုဖြူမြို့နယ်မှာရှိတဲ့ စစ်ကောင်စီလက်အောက်ခံ ခမရ အမှတ် ၁၀၈ တပ်ရင်းထဲမှာ မေလ ၂၀ ရက် ညပိုင်းက မိုင်း ၆ လုံးပေါက်ကွဲခဲ့တယ်လို့ ဒေသခံကာကွယ်ရေးတပ်ဖွဲ့တွေထံက သိရပါတယ်။ 

ခမရ ၁၀၈ ဂိတ်မှာ မိုင်း ၂ လုံးဖောက်ခွဲပြီး စစ်ကောင်စီတပ်သားတွေအလာကိုစောင့်ကာ ဝင်ပေါက် ထွက်ပေါက်မှာနောက်ထပ် မိုင်း ၄ လုံး တပြိုက်နက်တည်းဖောက်ခွဲခဲ့တာလို့ ဧရာနဂါးညီနောင်အဖွဲ့က သတင်းထုတ်ပြန်ပါတယ်။

ဧရာနဂါးညီနောင်အဖွဲ့ဝင်တယောက်က “၆ လုံးခွဲတာ ၂ လုံးကအရင်ခွဲတာ ပြီးမှ နောက် ၄ လုံးထပ်ခွဲတာ အစောင့်ဂိတ်ကတော့ ထိခိုက်မှုရှိတယ် ကျန်တဲ့ နေရာတွေက မှောင်နေတော့ သေချာမမြင်လိုက်ရဘူး”လို့ ပြောပါတယ်။ 

ခမရ ၁၀၈ တပ်ရင်းကို မိုင်းခွဲချိန်မှာ စစ်ကောင်စီတပ်သား တချို့ထိခိုက်ဒဏ်ရာရတာမျိုးရှိပြီး ပြီးတာနဲ့ အားလုံးဘေးကင်းအောင်ပြန်လည်ဆုတ်ခွာခဲ့လို့ ထိခိုက်တဲ့စာရင်းကို အတည်အကျ မသိရသေးဘူးလို့လည်းဆိုတယ်။

အခုလိုတိုက်ခိုက်မှုနဲ့ပတ်သက်ပြီး ဒေသခံတွေကို စစ်တပ်က စွပ်စွဲဖမ်းဆီးတာတွေ ပြုလုပ်နိုင်တာကြောင့် သတိထားနေထိုင်ဖို့နဲ့ ပြည်သူတွေအနေနဲ့ စစ်ကောင်စီတပ်တွေနဲ့  နီးစပ်တဲ့နေရာတွေကို မသွားဖို့လည်း သတိပေးထားပါတယ်။