ရန်ကုန်တိုင်း၊ ဆိပ်ကြီးခနောင်တိုမြို့နယ်၊ ဆမားဒူးဝါးရပ်ကွက်အနီးမှာ ဒီနေ့ မနက် ၁၁ နာရီလောက်က ကင်းလှည့်နေတဲ့ ရဲတပ်ဖွဲ့ဝင်တစ်ဦး ဓားနဲ့ခုတ်ခံရ​တယ်လို့ မြို့ခံတွေက ပြောပါတယ်။

ဓားခုတ်ခံရသူမှာ ဒုတပ်ကြပ်တင်ထွန်းအောင်ဖြစ်ပြီး မြို့နယ်တွင်းလုံခြုံရေး လှည့်ကင်းလှည့်နေချိန် ဆမားဒူးဝါးရပ်ကွက်၊ ငုဝါလမ်းအရောက်မှာ နောက်ဆုံးဆိုင်ကယ်နဲ့လိုက်ပါလာစဥ် ဓားနဲ့ခုတ်ခံရတာလို့ ဆိုပါတယ်။ 

ဒုတပ်ကြပ် တင်ထွန်းအောင်ကို မြို့နယ်ဆေးရုံ တင်ပို့ထားရတယ်လို့ သိရပါတယ်။ ဓားနဲ့ခုတ်ခဲ့တဲ့ အမျိုးသားကို ဖမ်းဆီးရမိရေး စစ်တပ်နဲ့ရဲတွေက အပူတပြင်း  ရှာဖွေနေတယ်လို့ သိရပါတယ်။

မန္တလေးတိုင်း၊ မြင်းခြံမြို့နယ်၊ ဇလပ်ကုန်းရွာက စစ်ကောင်စီခန့်အပ်ထားတဲ့ အုပ်ချုပ်ရေးမှူးတစ်ယောက် ဇွန် ၉ ရက် ညနေ ၅ နာရီလောက်က လည်ပင်း ဓားဒဏ်ရာနဲ့သေဆုံးသွားပါတယ်။

ဇလပ်ကုန်းနဲ့ မြင်းခြံကြားက ဆည်တာဘောင်နားမှာ လည်ပင်းပြတ်ရှ ဒဏ်ရာနဲ့ သေဆုံး နေတာဖြစ်ပြီး ဘယ်သူကခုတ်တယ်ဆိုတာ မသိရသေးပါဘူးလို့ ဒေသခံတစ်ယောက်က ပြောပါတယ်။

မြင်းခြံမြို့နယ်မှာ  စစ်ကောင်စီက ခန့်အပ်တာဝန်ပေးထားတဲ့  ရပ်ကွက်ကျေးရွာ အုပ်ချုပ်ရေးမှူးတွေ သေနတ်နဲ့ပစ်သတ်ခံရတာ၊ ဓားထိုး၊ ဓားခုတ်ခံရလို့ သေဆုံးတာတွေ ဆက်တိုက်ဖြစ်ပွားနေတာ ဖြစ်ပါတယ်။