မန္တလေး၊ မဟာအောင်မြေမြို့နယ်၊ ရဲမွန်တောင်ရပ်ကွက်၊ ၅၅လမ်း၊ (၄၂× ၄၃ )လမ်းကြားရှိ V9 KTV မှာ ဧပြီလ ၂၃ ရက် ညပိုင်းက သေနတ်ပစ်ခတ် ဓားခုတ်မှုဖြစ်ပွားခဲ့တာကြောင့် လူ ၂ ဦးထိခိုက်ဒဏ်ရာ စိုးရိမ်ရ ရရှိခဲ့တယ်လို့ မြို့ခံကယ်ဆယ်ရေးအသင်းက ပြောပါတယ်။
အဆိုပါည ၇ နာရီလောက်က ချမ်းမြသာစည်မြို့နယ်နေ အမျိုးသား ၂ ဦးအပါအဝင် လူ ၈ ဦးက KTV က ပြန်ထွက်လာချိန် ကားပါကင်နေရာမှာ ပုသိမ်ကြီးမြို့နယ်နေအမျိုးသား ၂ ဦးပါဆိုင်ကယ်တစ်စီးနဲ့တိုက်မိပြီး စကားများရာကနေ ပစ်ခတ်မှုတွေ ဖြစ်ပွားခဲ့တာပါ။
V9 KTV နဲ့ နီးစပ်သူတစ်ဦးက “ည ၇ နာရီလောက်က စကားများကြပြီး လမ်းမပေါ်တင် ဖြစ်ကြတာ၊ ရဲကချက်ချင်းရောက်လာပါတယ်၊ ထိသွားတဲ့ ၂ ဦးကို rescue က လာသယ်ပေးသွားတယ်” လို့ ပြောပါတယ်။
ချမ်းမြသာစည်မြို့နယ်နေ ဘချစ်(ခ)မြင့်ဇော်ဦး ဆိုသူက ဘေးလွယ်အိတ်ထဲကနေ တူရကီထုတ် ပစ္စတိုသေနတ်နဲ့ တစ်ချက် ပစ်ခတ်ပြီး နေလင်းဦး(ခ)ဂျိုးဂျိုးက ဓားနဲ့ခုတ်ခဲ့တာကြောင့် ပုသိမ်ကြီးမြို့နယ်နေ ဆိုင်ကယ်စီး အသက် ၃၀ အရွယ် အမျိုးသားမှာ ဦးခေါင်းနောက်စေ့ ပြတ်ရှဒဏ်ရာ၊ အသက် ၂၃ နှစ်အရွယ် အမျိုးသားမှာ ဘယ်ဘက်ရင်ညွန့်အောက် ကျည်ဖောက်ဝင်ဒဏ်ရာတွေနဲ့ ရရှိခဲ့တယ်လို့ သိရပါတယ်။
ကယ်ဆယ်ရေးအဖွဲ့ဝင် တဦးက “ဝဲဘက် ရင်ဘက်အောက်ပိုင်းလေးမှာ တစ်ချက်ထိထားတယ်၊ သူကတော့ စိုးရိမ်ရပါ၊ နောက်တစ်ဦးက နောက်စေ့ကို ၂ လက်မနီးပါး ပြတ်ရှထားတယ်၊ ဆေးရုံကြီး ပို့ဆောင်ပေးထားပါတယ်” လို့ ဆိုပါတယ်။
ထိခိုက်သူတွေကို မန္တလေးဆေးရုံကြီးကို စိုးရိမ်ရလူနာအဖြစ် အရေးပေါ်ပို့ဆောင်ခဲ့ရပြီး စစ်ကောင်စီ ရဲတပ်ဖွဲ့ဘက်က ချက်ချင်းလာရောက်စစ်ဆေးမှုတွေ ပြုလုပ်ခဲ့တယ်လို့ သိရပါတယ်။
အဲ့ဒီညမှာပဲ သေနတ်ပစ်ခတ် ဓားခုတ်သူ ၂ ဦးကို ချမ်းမြသာစည်မြို့နယ်၊ ၁၀၇ လမ်း ( ၅၅× ၅၆ ) လမ်းမှာ ရှိတဲ့ နှင်းဆီဝေဧည့်ရိပ်မွန်မှာ ပစ္စတိုသေနတ်တစ်လက်၊ ကျည်ဆန် ၂၇ တောင့်နဲ့အတူ ဖမ်းဆီးရမိခဲ့ပြီး မဟာအောင်မြေမြို့နယ်ရဲစခန်းကို ပို့ဆောင်စစ်ဆေးနေတယ်လို့ သိရပါတယ်။
ဓာတ်ပုံ( PAN )
ပဲခူးတိုင်းအနောက်ပိုင်း ပြည်မြို့၊ ကိုးသောင်းပဒေသာရပ်ကွက်၊ ရွှေတစ်ချောင်းလမ်းက နေအိမ်တအိမ်ှာ မတ် ၁၂ ရက် မနက်အစောပိုင်းက ဓားခုတ်မှု ဖြစ်ပွားခဲ့တာကြောင့် လူ ၃ ယောက် ပြတ်ရှ ဒဏ်ရာတွေနဲ့ ဆေးရုံပို့ဆောင်ပေးခဲ့ရတယ်လို့ ပြည်အခြေစိုက်လူမှုကူညီရေးအသင်းဆီက သိရပါတယ်။
မတ် ၁၁ ရက်ညပိုင်းမှာ အခင်းဖြစ်နေအိမ်က အသက် ၂၀ အရွယ် လူငယ် အမျိုးသားဟာ သူငယ်ချင်း ဖြစ်သူနဲ့အတူ အရက်သွားသောက်ကြတာဖြစ်ပြီး မတ် ၁၂ ရက် မနက် ၁ နာရီ မထိုးခင် နေအိမ်ပြန်လာခဲ့တယ်လို့ သိရပါတယ်။
မနက် ၁ နာရီလောက်မှာ အရက်သောက်ဖက် သူငယ်ချင်း အမျိုးသားက အဖော်အမျိုးသား တ ယောက်နဲ့အတူ ဓားကိုင်လာပြီး အိမ်၊ ဆိုင်ကယ် ၂ စီးနဲ့ မိသားစုဝင် ၃ ယောက်ကို ဓားနဲ့ ခုတ်ခဲ့ တာပါ။
ပြည်မြို့လူမှုကူညီရေးအသင်းဝင် တဦးက "သူငယ်ချင်းတွေ အရက်သောက်ပြီး အချင်းချင်း ရန်ဖြစ် ကြတယ်လို့ ပြောတယ်။ ကောင်လေးက ညပိုင်းက သူ့သူငယ်ချင်းတွေနဲ့ သွားသောက်တာ။ နောက်ပြီး သူ ပြန်လာတယ်။ သိပ်မကြာဘူး။ ဟိုဘက်က ဓားကိုင်ပြီး လာခုတ်တာ။ အစ်မတွေက ကြားက ဝင်ဆွဲတော့ သူတို့က ပါးနဲ့ ခေါင်းမှာ ဓားဒဏ်ရာတွေ ရသွားတယ်။ ရဲစခန်းက ခုတ်တဲ့ သူတွေ ကို ဖမ်းမိသွားပါပြီ " လို့ ဆိုပါတယ်။
အခင်းဖြစ်နေအိမ်မှာ ဖခင်ဖြစ်သူအပါအဝင် အသက် ၂၅ နှစ်အရွယ်အစ်မ ၂ ယောက်နဲ့ လူငယ် အမျိုးသားတို့ နေထိုင်တာဖြစ်ပြီး ဓားခုတ်ခံရလို့ အစ်မဖြစ်သူတွေမှာ မျက်နှာပြတ်ရှ၊ လက်ချောင်းပြတ်ရှ၊ ခေါင်းထိခိုက်ဒဏ်ရာတွေ ရရှိခဲ့ပြီး လူငယ်အမျိုးသားနဲ့ ဖခင်ဖြစ်သူတို့ ထိခိုက်ဒဏ်ရာ အနည်းငယ်သာ ရရှိခဲ့တယ်လို့ သိရပါတယ်။
ဓားခုတ်မှု ဖြစ်ပွားခဲ့ပြီး နာရီဝက်ခန့်အကြာမှာပဲ ပြစ်မှုကျူးလွန်သူတွေကို ပြည်ရဲစခန်းက ဖမ်းဆီး ရမိခဲ့တယ်လို့ သိရပြီး ထိခိုက်ဒဏ်ရာရရှိသူတွေကို ပြည်မြို့ဆေးရုံကြီးကို ပို့ဆောင်ထားတယ်လို့ သိရပါတယ်။
ဓာတ်ပုံ ( ပြည် rescue)
