မကွေးတိုင်း၊ ပေါက်မြို့နယ်တောင်ပိုင်းမှာ ဇွန် ၁၆ ရက်ကနေ ဇွန် ၂၃ ရက်အထိ စစ်ကောင်စီတပ်တွေ စစ်ကြောင်းထိုးနေပြီး ကင်းမရွာက ဒေသခံပြည်သူ အယောက် ၃၀ လောက်ကို ဖမ်းဆီးထားတယ်လို့ ဒေသခံတွေထံက သိရပါတယ်။
စစ်ကောင်စီတပ်က အင်အား ၁၀၀ ကျော်လောက်နဲ့ စစ်ကြောင်းထိုးနေပြီး ကင်းမရွာက ဒေသခံပြည်သူ ၃၀ လောက်ကို ဖမ်းဆီးထားတယ်လို့ ကင်းမကျေးရွာ ဒေသခံတယောက်က ဒီဗွီဘီကို ပြောပါတယ်။
“တောင်မြင့်ရွာဘက်ကနေ စစ်ကြောင်းစထိုးပြီး အခု ကင်းမရွာမှာ တပ်စွဲထားတယ်။ စစ်(...)၊ ပျူ(...)တွေက ကျေးရွာတွေကို တရွာဝင်တရွာထွက် စစ်ကြောင်းထိုးပြီး နေအိမ်တွေကို ဖောက်ထွင်းဝင်ရောက်ပြီး အဖိုးတန်ပစ္စည်းတွေနဲ့ ငွေကြေးတွေကို ခိုးယူသလို ပြည်သူတွေရဲ့ အိမ်မွေးတိရစ္ဆာန်တွေကိုလည်း သတ်ဖြတ်စားသောက်ကြတယ်။ စစ်ရှောင်တဲတချို့နဲ့ နေအိမ်တွေလည်း မီးရှို့ဖျက်ဆီးခံထားရတယ်။”
ပေါက်မြို့နယ် ရေပြာရွာမှာလည်း ဇွန် ၂၀ ရက် မနက်ပိုင်းက ဒေသခံလူငယ်တယောက်ကို PDF လို့ စွပ်စွဲပြီး စစ်အုပ်စုတွေက ဖမ်းဆီးသွားသလို ဇွန် ၂၁ ရက်မှာလည်း ပလက်ဝမြို့နယ်က ခရီးသွားပြည်သူတယောက်ကို PDF လို့စွပ်စွဲပြီး ဖမ်းဆီးသွားတယ်လို့ သိရပါတယ်။
စစ်ကောင်စီတပ်တွေ စစ်ကြောင်းထိုးနေလို့ ပေါက်မြို့နယ်တောင်ပိုင်းက ကင်းဆုတ်၊ ကင်းမ၊ ဘို့မယ်၊ တောင်ဘက်၊ ဇီးတော၊ ထန်းတောလယ်၊ အင်းငယ်ဒေါင့်နဲ့ သစ်ညီနောင်ကျေးရွာတွေက ဒေသခံပြည်သူ ၁၀,၀၀၀ နီးပါးလောက် ဘေးလွတ်ရာကို ထွက်ပြေးတိမ်းရှောင်နေရပါတယ်။
စစ်ကောင်စီတပ်တွေ ရွာတွေကိုမီးရှို့ဖျက်ဆီးပြီး စစ်ကြောင်းတွေ ထိုးနေတာကြောင့် မြိုင်မြို့နယ်က ပြည်သူ ၂၀,၀၀၀ လောက်၊ ပေါက်မြို့နယ်က ပြည်သူ ၂၀,၀၀၀ လောက်လောက်၊ ပခုက္ကူမြို့နယ်က ပြည်သူ ၉,၀၀၀ လောက်၊ ရေစကြိုမြို့နယ်က ပြည်သူ ၇,၀၀၀ ကျော်လောက်နဲ့ ဆိပ်ဖြူမြို့နယ်က ပြည်သူ ၆,၀၀၀ ကျော်လောက် နေရပ်စွန့်ခွာ ထွက်ပြေးနေကြရပြီး မိုးကာ၊ အဝတ်အထည်၊ စားနပ်ရိက္ခာနဲ့ ဆေးဝါး အကူအညီတွေ အပ်နေတယ်လို့ သိရပါတယ်။
မကွေးတိုင်းအတွင်းမှာ ပြီးခဲ့တဲ့ မေလတလအတွင်း စစ်ကောင်စီတပ်တွေ ဝင်ရောက်မီးရှို့ ဖျက်ဆီးခဲ့လို့ နေအိမ် ၉၂၄ လုံး မီးလောင်ကျွမ်းခဲ့တယ်လို့ Data For Myanmar က ထုတ်ပြန်ထားပါတယ်။
မွန်ပြည်နယ်၊ ကျိုက်ထိုမြို့နယ်မှာ ပြည်သူ့ကာကွယ်ရေးတပ်ဖွဲ့ PDF တာဝန်ခံ ဦးအေးမင်းထွန်းရဲ့ မိသားစုဝင် ၃ ယောက်ကို စစ်ကောင်စီတပ်က ဓားစာခံအဖြစ် ဖမ်းဆီးသွားတယ်လို့ ဒေသခံတွေက ပြောပါတယ်။
ကျိုက်ထိုမြို့နယ်၊ ကျူချောင်ကျေးရွာမှာ နေထိုင်နေတဲ့ ဦးအေးမင်းထွန်းရဲ့ မိသားစုဝင် ၃ ဦးကို စစ်ကောင်စီတပ်ဖွဲ့တွေက ဇွန် ၁၄ ရက် မနက် ၁၁ နာရီလောက်မှာ လာရောက် ဖမ်းဆီးသွားတာပါ။
စစ်ကောင်စီတပ်ဖွဲ့ဝင်တွေဟာ ဦးအေးမင်းထွန်းရဲ့ မိခင်ဖြစ်သူ ဒေါ်နော်ဆပ်တဖူး (ခ) ဒေါ်တင်ရွှေ၊ ညီဖြစ်သူ ကိုကျော်စိုးအေးနဲ့ ညီမဖြစ်သူ မခိုင်ခိုင်အေးတို့ကို ဖမ်းဆီးသွားတာဖြစ်ပြီး ဘယ်နေရာမှာ ဖမ်းဆီးထိန်းသိမ်းထားလဲဆိုတာ မသိရသေးပါဘူး။
“ကျနော်တို့ဘက်က စကစကို တော်လှန်ဖို့ပဲ ဆုံးဖြတ်ပေမဲ့ စကစရဲ့ မိသားစုတွေကို ထိခိုက်မှုတွေမလုပ်ဖို့ သစ္စာပြုထားပါတယ်။ အခု သူတို့ဘက်က ကျနော့်မိသားစုကို ထိလာပြီပေါ့။ အပြစ်မရှိတဲ့ မေမေရယ်၊ ကျနော့်ညီရယ်၊ ကျနော့်ညီမရယ်ကို သူတို့အနေနဲ့ ဘာဆက်လုပ်ကြမလဲဆိုတာ စောင့်ကြည့်မယ်။ သက်ရောက်မှုတိုင်းမှာ တန်ပြန်သက်ရောက်မှု ရှိတယ်ဆိုတာ သူတို့ကို သိစေချင်ပါတယ်” လို့ ဦးအေးမင်းထွန်းက ပြောပါတယ်။
မွန်ပြည်နယ် မှုခင်းနှိမ်နင်းရေးဌာနမှာ ရဲတပ်ကြပ်ကြီးအဖြစ် တာဝန်ထမ်းဆောင်ခဲ့တဲ့ ဦးအေးမင်းထွန်းဟာ စစ်တပ်အာဏာသိမ်းပြီးနောက် အာဏာဖီဆန်ရေး CDM လုပ်ဆောင်မှုမှာ ပါဝင်ခဲ့ပြီးနောက် စစ်အာဏာရှင် တော်လှန်ရေးမှာ KNLA/KNU တပ်မဟာ (၁) PDF တာဝန်ခံအဖြစ် တာဝန်ထမ်းဆောင်နေတာပါ။
ဦးအေးမင်းထွန်းဟာ NLD အစိုးရလက်ထက်တုန်းက မွန်ပြည်နယ်ဝန်ကြီးချုပ် ဒေါက်တာအေးဇံရဲ့ PSO တဦးလည်း ဖြစ်သလို ဝန်ကြီးချုပ်ကို အနီးကပ် လုံခြုံရေးယူပေးခဲ့တာပါ။
ရဲတပ်ဖွဲ့မှာ ၂၂ နှစ်ကြာ တာဝန်ထမ်းဆောင်ခဲ့တဲ့ ဦးအေးမင်းထွန်းဟာ ရဲတပ်ဖွဲ့အတွင်း ဒုစရိုက်နှိမ်နင်းရေးမှာ တရားခံတွေကို ရှာဖွေဖမ်းဆီးရာမှာ နာမည်ကောင်းရသူတဦးလည်း ဖြစ်ပါတယ်။
