ရန်ကုန်၊ ဒေါပုံမြို့နယ်၊ ကျည်စုရပ်ကွက်၊ ရန်အောင်ကားမှတ်တိုင်မှာ ဖေဖော်ဝါရီ ၂၄ ရက်ညပိုင်းက လိုင်းကားစီးဖို့စောင့်နေတဲ့ အမျိုးသမီးတယောက်ဆီကနေ အမျိုးသားတယောက်က ပိုက်ဆံအိတ် လုယူတာမရလို့ ဓားနဲ့ထိုးသွားတယ်လို့ ရပ်ကွက်နေသူတွေဆီက သိရပါတယ်။
မနေ့ည ၈ နာရီက မင်းနန္ဒာလမ်းမကြီးပေါ်ရှိ ရန်အောင်မှတ်တိုင်မှာ အမျိုးသားတယောက်နဲ့ အမျိုးသမီးတယောက်တို့ YBS ဘတ်စ်ကား စောင့်နေချိန် အမည်မသိအမျိုးသားတယောက်က ပိုက်ဆံအိတ်ဝင်လုခဲ့တာဖြစ်တယ်လို့ ရပ်ကွက်နေသူတစ်ဦးက ပြောပါတယ်။
"ပိုက်ဆံအိတ်ဝင်လုတော့ ကောင်မလေးက အော်ပြီးအကူအညီတောင်းတာ။ အော်ရမလားဆိုပြီး ဓားနဲ့ထိုးသွားတာ။ လက်နဲ့ခါးကို ထိုးသွားတာ။ မင်းမဲ့စရိုက်ဆန်ဆန်ပဲ။”
ကားမှတ်တိုင်မှာ ဓားဒဏ်ရာတွေနဲ့လဲကျနေတဲ့ အသက် ၂၀ အရွယ်အမျိုးသမီးကို ရှင်သန်ရေးလူမှုကူညီရေးအသင်းကကားနဲ့ ဆေးရုံကိုပို့ဆောင်ပေးခဲ့တယ်လို့ ရပ်မိရပ်ဖတစ်ဦးက ဒီဗွီဘီကို ပြောပါတယ်။
"ကောင်မလေးကို လက်တွေရော၊ ခါးရော ဓားနဲ့ထိုးသွားတာ ရန်ကုန်ဆေးရုံကြီးကို ပို့လိုက်တယ်။ ပိုက်ဆံအိတ်ကတော့ ပါမသွားဘူး"လို့ ပြောပါတယ်။
အဆိုပါလုယက်မှုဖြစ်စဉ်မှာ ဓားနဲ့ထိုး လုယက်မှုကျူးလွန်တဲ့ အမျိုးသားကိုတော့ စစ်ကောင်စီ ရဲတွေက ဖမ်းဆီးရမိတာမရှိဘူးလို့ ရပ်ကွက်နေသူတွေဆီက သိရပါတယ်။
ပြီးခဲ့တဲ့ရက်ပိုင်းကလည်း အင်းစိန်မြို့နယ်၊ တညင်းကုန်းရပ်ကွက်၊ ၁၄ လမ်းဆုံအနီးမှာ အလုပ်ကနေ စက်ဘီးနဲ့ ပြန်လာတဲ့လူငယ်တယောက်ကို လုယက်သူတွေက ဓားနဲ့ထိုးပြီး ဖုန်းနဲ့ ပိုက်ဆံအိတ်လုသွားခဲ့ပါတယ်။
(AC)Photo/Crd
ရှင်သန်ရေးလူမှုကူညီရေးအသင်း
ရခိုင်ပြည်နယ်၊ စစ်တွေမြို့၊ စက်ရုံစုရပ်ကွက်မှာ အောက်တိုဘာ ၂၈ ရက်က အသက် ၃၀ အရွယ် ကိုယ်ဝန်ဆောင်အမျိုးသမီး တယောက် ဓားထိုးခံရတယ်လို့ ရပ်ကွက်နေသူတွေက ပြောပါတယ်၊
မနေ့ နေ့လယ် ၂ နာရီလောက်မှာ အဲဒီရပ်ကွက်နေ ကိုယ်ဝန် ၄ လရှိ ဒေါ်စောသန္တာမှာ ဓားထိုးခံရပြီးနောက် ဆေးရုံကို ပို့ဆောင်ခဲ့ပေမယ် ကိုယ်ဝန်ပျက်ကျပြီး အသက်အန္တရာယ်ပါ စိုးရိမ်ရတယ်လို့ ရပ်ကွက်နေသူ တဦးက ပြောပါတယ်။
"ကိုယ်ဝန်က ပျက်ကျသွားတယ်။ ဒဏ်ရာက ပြင်းတယ်။အသက်အန္တရာယ်လဲ့ စိုးရိမ်ရတယ်လို့ ဆရာဝန်က ပြောတယ်။ ပိုက်ဆံချေးထားတာလည်းပြန် မဆပ်နိုင်သေးလို့ ဟိုက အရက်မူးမူးနဲ့ ဓားနဲ့ ထိုးသွားတာ"လို့ ပြောပါတယ်။
ဓားထိုးခံရသူ ဒေါ်စောသန္တာမှ နောက်ကျော ဓားဒဏ်ရာ ၄ ချက်၊ ပေါင်တွင် ၁ ချက်နဲ့ ဘယ်လက် တွင် ၁ ချက် ဓားထိုးခံခဲ့ရတယ်လို့ သိရပါတယ်။
မျက်မြင်ဒေသခံ တဦးက "ကိုယ်ဝန်ဆောင်ကို ဓားနဲ့ထိုးတဲ့သူက သူတို့နဲ့ အိမ်နီးချင်း ကိုကျားခို။ ကိုယ်ဝန်ဆောင် အမျိုးသမီးက ကိုကျားခို အမျိုးသမီးဆီက ငွေချေးထားတယ်လို့ သိရတယ်။ အကြွေးတောင်းတာ မရတော့ လင်ဖြစ်သူ အရက်မူးလာတဲ့အချိန်မှာ အကြွေးသွားတောင်းတော့ ဟိုက မဆပ်နိုင်လို့ ဓားထိုး ခံလိုက်ရတာ"
ဓားထိုး တရားခံဖြစ်တဲ့ ကိုကျားခို လင်မယားဟာ ထွက်ပြေးနေပြီး ဖမ်းဆီး ရရှိဖို့ ကြိုးစားနေတယ်လို့ စစ်တွေအမှတ်(၁)ရဲစခန်းက သိရပါတယ်။
အောက်တိုဘာ ၁၂ ရက်ကလည်း စစ်တွေမြို့၊ စက်ရုံစုရပ်ကွက်မှာ အမျိုးသား တယောက် ဓားထိုး ခံခဲ့ရတယ်လို့ ရဲမှတ်တမ်းအရ သိရပါတယ်။
