မန္တလေးတိုင်း အမရပူရမြို့နယ်၊ စစ်ကိုင်း- မန္တလေးသွား မြို့ပတ်လမ်း၊ ရှမ်းကလေးကျွန်းနဲ့ ကန်တော်ကြီးနားက Denko ဆီဆိုင်မှာ မေ ၆ ရက် မနက်အစောပိုင်းက ဆိုင်ကယ်စီး လူ ၃ ဦးက ဓားကိုင်ပြီး ကျပ်၂၅၆ သိန်းလေက် ဓားပြတိုက်သွားတယ်လို့ မြို့ခံတွေက ပြောပါတယ်။
မနေ့ မနက် ၂ နာရီခွဲလောက်က ဆိုင်ကယ် ၂ စီးနဲ့ လူ ၃ ဦး ဆိုင်ထဲရောက်လာပြီး ဆီထည့်လိုကြောင်း ပြောကာ အနားရောက်လာတဲ့ ဆိုင်လုံခြုံရေး ၂ ဦးကို ဓားနှောင့်နဲ့ ရိုက်နှက်၊ လက်ပြန်ကြိုးတုပ်ကာ မန်နေဂျာရုံးခန်းကို ခေါ်သွားခိုင်းခဲ့တာပါ။
မန္တလေးမြို့ခံတဦးက "ကမ်းနားလမ်းနဲ့ ကန်တော်ကြီးတောင်ဘက်က ဆိုင်။ စီစီတီဗွီရှိတယ်။ ဒေတာပါတဲ့ စက်ကို ယူသွားတယ်။ လာတာက ဆိုင်ကယ်က ၂ စီး ယောင်္ကျား ၃ ယောက်ပါတယ်။ လုံခြုံရေးဦးလေးကို လာမေးတာတဲ့ ဆီပြတ်သွားလို့ ထည့်လို့ ရလားဆိုပြီး အနားရောက်လာမှ ဓားနဲ့ထောက်ပြီး မန်နေဂျာဆီကနေ ပိုက်ဆံတွေ ယူသွားတာ။ အကုန်လုံးကို လက်ပြန်ကြိုးတွေ ချည်ထားခဲ့တာ။ သူတို့ ထွက်သွားတော့ မီးတွေ ပိတ်ခဲ့တယ်" လို့ ပြောပါတယ်။
ရုံးခန်းမှာ မန်နေဂျာဖြစ်သူ အမျိုးသားကို ဓားနဲ့ ရွယ်ထားတဲ့အပြင် ငွေသိမ်းခန်းထဲက မီခံသေတ္တာကို ဖွင့်ခိုင်းကာ ကျပ် ၂၅၆ သိန်း၊ စီစီတီဗွီစက်နဲ့ လက်ကိုင်ဖုန်း ၂ လုံး ယူဆောင်သွားပြီး လုံခြုံရေး ၂ ဦးနဲ့ မန်နေဂျာကိုပါ ကြိုးတုပ်ထားခဲ့ပြီး ဓားပြတွေက မြို့ပတ်လမ်းအတိုင်း ဆိုင်ကယ် မောင်းထွက်သွားတယ်လို့ သိရပါတယ်။
ဓားပြတိုက်မှုနဲ့ပတ်သက်ပြီး ရှမ်းကလေးကျွန်း Denko ဆီဆိုင်ကို ဖုန်းဆက်သွယ်မေးမြန်းပေမဲ့ ပြန်လည် ဖြေကြားခြင်း မရှိသလို အမရပူရမြို့နယ်ရဲတပ်ဖွဲ့က ဓားပြတိုက်မှု ကျူးလွန်သူတွေကို လတ်တလော ဖမ်းဆီးနိုင်ခြင်း မရှိသေးပါဘူး။
၂၀၂၂ ခုနှစ် ဒီဇင်ဘာ ၂၂ ရက်က ပုသိမ်ကြီးမြို့နယ်ရှိ အောင်သပြေရွှေဆိုင်မှာ ရွှေထည်ပစ္စည်း ခန့်မှန်း သိန်း ၁၅၀၀ ဖိုး ဓားပြမှုနဲ့ ၂၀၂၃ ခုနှစ် ဧပြီလ ၁၉ ရက်နေ့က မန္တလေး၊ ပြည်ကြီးတံခွန်မြို့နယ်က ထိပ်တန်းရွှေဆိုင်မှာ သိန်း ၂၇၀၀ ဖိုးခန့် ဓားပြမှုတို့ကတရားခံ ၆ ဦးနဲ့ ဆက်စပ်သူတွေကို ဖမ်းမိထားပြီလို့ စစ်ကောင်စီဘက်က မေ ၅ ရက်မှာ ထုတ်ပြန်ခဲ့ပါတယ်။
မန္တလေးမြို့ ပြည်ကြီးတံခွန်မြို့နယ် (ဇ) ရပ်ကွက် ၆၂ လမ်း၊ ၁၃၃ လမ်းနဲ့ ၁၃၄ လမ်းကြား စက်မှု (၁) စျေးရှေ့ရှိ ထက်ဝေယံ စိန်ရွှေရတနာဆိုင်ကို ဧပြီ ၂၈ ရက် မွန်းလွဲ ၁၂ နာရီခွဲလောက်က အမည်မသိ အမျိုးသား ၂ ဦးက ဓားပြတိုက်သွားတယ်လို့ စျေးသူစျေးသားတွေဆီက သိရပါတယ်။
စက်မှု ၁ စျေးထိပ်က ဦးကြင်ခဲပိုင် ထက်ဝေယံ စိန်ရွှေရတနာဆိုင်ကို အမည်မသိ အမျိုးသား၂ ဦးက လက်နက်တွေ ကိုင်ဆောင်ရောက်ရှိလာပြီး သေနတ်ပစ်ဖောက်ကာ ရွှေထည်ပစ္စည်းတွေကို ယူဆောင်သွားခဲ့တာလို့ ရွှေဆိုင်အနီးနေထိုင်သူတဦးက ပြောပါတယ်။
"စျေးထဲကနေ အမျိုးသား ၂ ယောက် သေနတ်တွေ ကိုင်ထွက်လာပြီး ရွှေဆိုင်ထဲဝင်သွားတာ တွေ့လိုက်တယ်၊ ဆိုင်ထဲရောက်တော့ ဆိုင်နံရံကို သေနတ် ၁ ချက်ပစ်ပြီး အားလုံးကိုဝပ်ခိုင်းတယ်။ နောက်ပြီး သူတိုထဲက တယောက်က ၁ ပေလောက်ရှိတဲ့ ဓားနဲ့မှန်ကောင်တာကို ရိုက်ခွဲပြီး ကောင်တာအတွင်းမှာရှိတဲ့ ရွှေတွေကို ဆာလာအိတ်ထဲထည့်ယူသွားပြီး စျေးထဲပြန်ပြေးဝင်သွားတယ်။"
ဓားပြတိုက်မှုကြောင့် ရွှေဆွဲကြိုး ဆိုဒ်စုံ ၁၈ ကုံး၊ ရွှေနားကပ် ၃၈ ရံ၊ရွှေနားဆွဲ ၉၀ ခု၊ စုစုပေါင်း ရွှေချိန် ၉၀ ကျပ်သားနီးပါး၊ ခန့်မှန်းတန်ဖိုး ကျပ်သိန်း ၂၅၂၀ လောက်ဆုံးရှုံးခဲ့တယ်လို့ ရွှေဆိုင်နဲ့ နီးစပ်သူဆီက သိရပါတယ်။
အခင်းဖြစ်ပွားရာကို စစ်ကောင်စီတပ်ဖွဲ့တွေ လာရောက် စစ်ဆေးသွားခဲ့ပေမဲ့ တရားခံတွေကို မဖမ်းဆီးနိုင်သေးတဲ့အပြင် စကစရဲ့ ဝါဒဖြန့် ချန်နယ်ကနေ အခုလုပ်ရပ်ဟာ PDF အဖွဲ့ကလူတွေ လုပ်ဆောင်တာလို့ စွပ်စွဲရေးသားထားပါတယ်။
စစ်အာဏာသိမ်းပြီးနောက်ပိုင်း မန္တလေးမြို့မှာ ဓားပြတိုက်မှု ပိုမိုများပြားလာခဲ့ရာ ဧပြီ ၁၉ ရက် နေ့လယ်ကလဲ စက်မှုစျေး စက်မှုရဲစခန်းအနီးက ထိပ်တန်းရွှေဆိုင် ဓားပြတိုက်ခံခဲ့ရသလို မတ် ၂၇ ရက် ညနေက စိန်ကျော်မိုးရွှေဆိုင် ဓားပြတိုက်ခံခဲ့ရပြီး ပြစ်မှုကျူးလွန်သူ ၂ ဦးကို ဖမ်းဆီးနိုင်ခဲ့ပါတယ်။
ဒါအပြင် မတ် ၁၂ ရက် ဒေါ်တောမုန့်တီဆိုင် ဓားပြမှုနဲ့ မတ် ၁၄ ရက်က မြရည်နန္ဒာရပ်ကွက် ကုန်စုံဆိုင်အနုကြမ်းစီးမှုအတွင်း ပြစ်မှုကျူးလွန်သူတွေကို ဒီကနေ့အထိ ဖမ်းဆီးရမိတာ မရှိသေးဘူးလို့ မြို့ခံပြည်သူတွေဆီက သိရပါတယ်။
