ဧရာဝတီတိုင်း၊ မအူပင်မြို့မှာ ဇန်နဝါရီ ၂၁ ရက်မနက်ပိုင်းက မြို့မရဲစခန်းက နယ်ထိန်းရဲတပ်ဖွဲ့ဝင် တယောက်  ဓားနဲ့ခုတ်ခံရလို့ ဆေးရုံပို့ဆောင်ထားရတယ်လို့ သိရပါတယ်။ 

မအူပင်မြို့မရဲစခန်းက နယ်ထိန်းရဲအဖွဲ့ဟာ အမှတ် ၃ ရပ်ကွက်နေ  အော်လေးဆိုသူကို မူးယစ်ဆေးဝါးသုံးစွဲတဲ့သတင်းရလို့ လာရောက် ဖမ်းဆီးရာကနေ ဓားနဲ့ပြန်ခုတ်တာခံရတာလို့ ဒေသခံတွေက ပြောပါတယ်။ 

မျက်မြင်တွေ့တဲ့ဒေသခံတဦးက“ရဲတွေက အရပ်ဝတ်တွေနဲ့ အော်လေးကိုလာဖမ်းတာ။ အော်လေးက ဓားနဲ့ပြန်ခုတ်တာ ရဲတွေက အော်လေးကို သေနတ်နဲ့ပစ်ဖမ်းတယ်။ နောက်တော့ နှစ်ယောက်လုံးကို ဆေးရုံကားနဲ့ ခေါ်သွားတယ်”လို့  ပြောပါတယ်။ 

ရဲတွေလာရောက်ဖမ်းဆီးချိန်မှာ ဓားနဲ့ပြန်ခုတ်ခဲ့သလို ရဲတွေသေနတ်ပစ်တာလည်းခံခဲ့ရတာကြောင့် အော်လေးနဲ့ နယ်ထိန်းရဲ မောင်မောင်တို့ကို ဆေးရုံကား ၂ စီးနဲ့ လာခေါ်သွားတာတွေ့ရတယ်လို့ ဆိုပါတယ်။

ဓားနဲ့ခုတ်တာခံခဲ့ရတဲ့  နယ်ထိန်းမောင်မောင်ဟာ  မအူပင်မြို့မှာ ကိုယ်ဝန်ဆောင် မတင်မော်လင်းကို ခိုးမှုနဲ့ဖမ်းဆီး ရိုက်နှက်စစ်ဆေးပြီး သတ်ဖြတ်တဲ့အထဲမှာ ပါဝင်ခဲ့တဲ့ ရဲတဦးလည်းဖြစ်ပါတယ်။

မန္တလေးတိုင်း ကျောက်ဆည်မြို့ရှိ ကျောက်ဆည်တက္ကသိုလ်အနီး တောမရွာမှာ တရုတ်ဓာတ်ငွေ့ပိုက်လိုင်းကို လုံခြုံရေးယူနေတဲ့ အကြမ်းဖက်စစ်အုပ်စုကို  မေ ၅ ရက် မနက် ၅ နာရီလောက်မှာ အမည်မသိလူတစ်စုက ဓားတွေနဲ့  ဝင်ခုတ်ရာ ၃ ဦး  ပွဲချင်းပြီးသေဆုံးသွားတယ်လို့ သိရပါတယ်။

ကျန်စစ်အုပ်စုအဖွဲ့ဝင်တွေကတော့ သေနတ်ပစ်ဖောက်ပြီး ထွက်ပြေးသွားကြပြီး ဒီဖြစ်စဉ်ကြောင့် တောမရွာထဲကို စစ်ကားအလုံးအရင်းနဲ့ ဝင်ရောက်စီးနင်းရှာဖွေနေပြီလို့ ရွာခံတွေက ပြောပါတယ်။

တောမရွာက ဒလန်တွေကိုလည်း အကြမ်းဖက်စစ်သားတွေက “ ဒီလိုလာသတ်သွားတဲ့သူကို မသိရကောင်းလား'' ဆိုပြီး သေနတ်ဒင်နဲ့ ထုသွားတယ်လို့ မျက်မြင်ရွာသားတွေက ပြောပါတယ်။ 

ဒါ့အပြင် တောမရွာက ပညာနန်းတော် ကျူရှင်ဆရာ ဦးမျိုးမင်းသော်ရဲ့ နေအိမ်ကို ဝင်ရောက် ဖျက်ဆီးသွားပြီး ပစ္စည်းအချို့ကို လုယက်ယူငင်သွားကြပါတယ်။

“ဒါပေမဲ့ ဆရာကိုတော့ အကြမ်းဖက်တွေ မိမသွားဘူးလို့သိရပါတယ်။  အကယ်၍ ဆရာ့ကို တွေ့ခဲ့ရင် တစ်ခါထဲ ပစ်သတ်မယ်လို့ ကြိမ်းသွားတယ်” လို့  ရွာသားတစ်ဦးက ပြောပြပါတယ်။

ဒီနေ့ မနက် ၁၁ နာရီကျော်အထိ ရွာထဲမှာ သေနတ်ပစ်ဖောက်နေကြဆဲလို့ သိရပါတယ်။ ကျောက်ဆည် တက္ကသိုလ်ကျောင်းဝင်းထဲက  Non CDM ဆရာ ဆရာမတွေနဲ့  ဝန်ထမ်းတွေကတော့ သေနတ်သံတွေကြောင့်  အလွန်စိုးရိမ်ကြောက်လန့်နေကြတယ်လို့ ဆိုပါတယ်။

တရုတ်ဓာတ်ငွေ့ ပိုက်လိုင်းနဲ့ စစ်အာဏာရှင်ယန္တရားကို အသက်သွင်းပေးနေတဲ့ ဆရာ ဆရာမတွေနဲ့ ဝန်ထမ်းတွေရဲ့ အသက်အန္တရာယ်ကို အာမမခံကြောင်း  သတိပေးစာတစ်စောင် မကြာသေးခင်  ရက်ပိုင်းအတွင်းက ကျောက်ဆည်ခရိုင်ပြည်သူ့ကာကွယ်ရေးတပ်ဖွဲ့ (KDDF)က ထုတ်ပြန်ထားထားပါတယ်။