ထိုင်းနိုင်ငံ ချင်းရိုင်း၊ ချင်းမိုင်၊ နခွန်းနာယုတ်၊ ဖစ်ချ်ဘွန်း၊ ဗိစနုလုတ်နဲ့ လွေးစတဲ့ခရိုင်က နေရာတချို့မှာ တောမီးလောင်မှုတွေဖြစ်နေပြီး အရှေ့မြောက်ပိုင်း နခွန်းနာယုဒ်ခရိုင်မှာဆိုရင် ဒီကနေ့ထိ အဆိုးရွားဆုံး ဆက်လောင်နေတယ်လို့ ထိုင်းသတင်းတွေမှာ ဖော်ပြပါတယ်။

တခြားခရိုင်က တောမီးတွေကို မတ်လ ၂၉ နဲ့ ဒီကနေ့  မတ်လ ၃၀  ရက်မှာ ထိန်းချုပ်နိုင်ခဲ့ပေမဲ့ နခွန်းနာယုတ်ခရိုင် ဖရကျူလာကျွမ်ကောက် ဗိုလ်သင်တန်းကျောင်းအနောက်ဘက်က တောင်တန်းတွေမှာတော့ ထိုင်းစံတော်ချိန် မွန်းလွဲ ၂ နာရီခွဲထိ လောင်နေတုန်းပဲလို့ တောင်ခြေကနေ တိုက်ရိုက်ထုတ်လွှင့်နေတဲ့ ချနယ်လ် ၃ သတင်းထောက်က ပြောပါတယ်။ 

တောမီးဟာ မနေ့ညနေပိုင်းက ခေါင်လဲမ်တောင်ထိပ်ပေါ်မှာ လောင်ကျွမ်းခဲ့ပြီး အနီးက ချဖူးလ်တောင်ကိုပါ ကူးစက်သွားကြောင်း၊ စစ်တပ်က ရဟတ်ယာဉ် ၂ စီးနဲ့ ရေတွေဖျန်းချတဲ့အတွက် တောင် ၂ လုံးပေါ်မီးငြိမ်းသွားပေမယ့် နောက်ထပ် ခေါဝ်နန်းဒမ် ခေါ် တာ့ပက်တောင်ဆီ ကူးစက်လောင်နေတယ်လို့ ဆိုပါတယ်။

မနေ့ညက ခေါင်လဲမ်တောင်ထိပ်ပေါ်မှာ လောင်ကျွမ်းစဉ် အဆိုပါတောင်ဟာ မတ်စောက် လွန်းတာကြောင့် တောင်တက်ဖို့မလွယ်ကူကြောင်း၊ ညအချိန်လည်းဖြစ်ပြီး တောကောင်တွေပါ ထွက်လာတာမို့ မီးသတ်သမားနဲ့ ကယ်ဆယ်ရေးအဖွဲ့တွေရဲ့ အသက်အန္တရာယ်ငဲ့ကွက်ကာ တောင်ခြေတဝိုက် လူနေအိမ်ခြေတွေမကူးအောင်သာ ကာကွယ်ခဲ့ရတယ်လို့ နခွန်းနာယုတ်ခရိုင်ဝန် နိုင်း ဘန်းချား ချောဝ်းဝါးလင်းက သတင်းထောက်တွေကို ပြောပါတယ်။

မနေ့ညက ခေါင်လဲမ်တောင်ရော အနီးရှိ ချဖူးလ်တောင်ကိုပါ ကူးစက်လောင်ကျွမ်းပြီး ကနေ့မနက်မှာ ထိုင်းစစ်တပ်က ရဟတ်ယာဉ် ၂ စီးနဲ့ ရေတွေသွားဖျန်းခဲ့ကြောင်း၊ ဒီနေ့မွန်းလွဲပိုင်းမှာ တာ့ပက်တောင်ဆီဆက်ကူးနေပြီး အဲဒီတောင်ပေါ်ကိုလည်း လူမတက်နိုင်ဘူးလို့ ဆိုပါတယ်။ 

အဆိုပါတောင်ပေါ်ကမီးဟာ အောက်က တောင်ကြော၊ တောင်ခပန်းနဲ့ တောအုပ်တွေထိ ဧကပေါင်း ၃၀၀ ကျော် ကူးစက်လောင်ကျွမ်းခဲ့တယ်လို့ ဆိုပါတယ်။

လေတွေလည်းတိုက်နေတာကြောင့် လူနေအိမ်ခြေတွေမကူးစက်အောင်လို့ တောင်အောက်မှာ မီးသတ်ကားတွေတန်းစီပြီး အရံသင့်ကာကွယ်ထားတယ်လို့ နယ်မြေသတင်းထောက်က ပြောပါတယ်။

အဆိုပါတောင်တန်းမှာ နှစ်တိုင်းတောမီးလောင်လေ့ရှိပြီး ဒီနှစ်အဆိုးရွားဆုံးဖြစ်ကြောင်း၊ တောမီးကြောင့် လူတွေရွှေ့ပြောင်းရတာတော့ မရှိသေးဘူးလို့ ဒေသခံတွေက သတင်းထောက်ကို ပြောသွားပါတယ်။

ချင်းမိုင်မြို့  ဆုထိပ်တောင်ပေါ်မှာလည်း ဒီကနေ့မှာ တောမီးလောင်နေတာကြောင့်  တောင်ပေါ်ဘုရားလှေကားတက်လမ်းတလျှောက်မှာ မီးခိုးမြူမှုန်တွေ ပိတ်နေပါတယ်။ 

ကိုးကား - nationtv.tv