တိုက်စစ်မှူး ဘာလိုတယ်လီဟာ နည်းစနစ်ပိုင်း ကောင်းမွန်သူဖြစ်တယ်လို့ အီတလီနည်းပြမန်ချီနီ က ချီးကျူးသွားပါတယ်။
မန်ချီနီဟာ တူရကီကလပ် အဒမ်နာဒီမာစပေါ်အသင်းမှာ ခြေစွမ်းပြနေတဲ့ ဘာလိုတယ်လီကို ၂၀၁၈ ခုနှစ်နောက်ပိုင်း အီတလီလက်ရွေးစင်မှာ ပြန်လည်ရွေးချယ်ခဲ့တာပါ။
အသက် ၃၁ နှစ်ရှိ ဘာလိုတယ်လီဟာ တူရကီလိဂ်မှာ ၁၉ ပွဲကစားအပြီးမှာ ၈ ဂိုး သွင်း ၃ ကြိမ်ဂိုးဖန်တီးမှုပြုလုပ်နိုင်ခဲ့ပါတယ်။
ဘာလိုတယ်လီဟာ နည်းစနစ်ပိုင်းမှာ အမြဲတမ်းကောင်းမွန်ပြီး ကြံ့ခိုင်မှုနဲ့ပတ်သက်ပြီးတော့ပဲ စောင့်ကြည့်သွားရမယ်လို့ အီတလီနည်းပြ မန်ချီနီကပြောပါတယ်။
“လာမယ့်ရက်အနည်းငယ်အတွင်းမှာ မာရီယိုလို လက်ရွေးစင်မှာ မပါခဲ့တာကြာနေပြီဖြစ်တဲ့ ကစားသမားတွေရဲ့ခြေစွမ်းကို အကဲခတ်သွားပါမယ်။ မာရီယိုအနေနဲ့ ပြန်လည်ရွေးချယ်ခံရတဲ့အပေါ် ကျေနပ်လိမ့်မယ်လို့ ထင်ပါတယ်။ သူ့ဘက်က လက်တဖက်ကမ်းနိုင်မလားဆိုတာကတော့ စောင့်ကြည့်သွားရမှာပါ” လို့ နည်းပြမန်ချီနီက ပြောပါတယ်။
နည်းပြမန်ချီနီဟာ လက်ရွေးစင်နဲ့ဝေးကွာနေတဲ့ ကစားသမားသစ် ၇ ဦးအထိရွေးချယ်ခဲ့တာပါ။
အီတလီအသင်းဟာ မတ်လ ၂၅ ရက်မှာ မြောက်မက်ဆီဒိုးနီးယားနဲ့ ကစားရမယ့် ကမ္ဘာ့ဖလားပလေးအော့ဖ်ပွဲစဉ်အတွက် ကြိုတင်လေ့ကျင့်ပြင်ဆင်မှာဖြစ်ပါတယ်။
အပြောင်းအရွှေ့ကာလ နောက်ဆုံးနေ့မှာ ခေါ်ယူလိုက်တဲ့ ဂျပန်နောက်ခံလူ တိုမီယာဆုဟာ နည်းစနစ်ပိုင်း ထူးချွန်ပြီး နေရာစုံရတဲ့ ကစားသမားဖြစ်တယ်လို့ အာဆင်နယ်နည်းပြ အာတီတာက ချီးကျူးပါတယ်။
အာဆင်နယ်အသင်းဟာ ဘယ်လာရင်ကို စပိန်ကလပ် ရီးရဲလ်ဘက်တစ်အသင်းဆီ အငှားချခဲ့ပြီးနောက် အီတလီကလပ် ဘိုလော့ညာအသင်းက ဂျပန်နောက်ခံလူ တာကီဟီရို တိုမီယာဆုကို ပေါင် သန်း ၂၀ ဝန်းကျင်နဲ့ ခေါ်ယူနိုင်ခဲ့တာ ဖြစ်ပါတယ်။
“တိုမီယာဆုက စီးရီးအေနဲ့ နိုင်ငံတကာ အတွေ့အကြုံတွေရှိတဲ့ ခံစစ်မှူးတစ်ယောက် ဖြစ်ပြီး ခံစစ်အရည်အသွေးကောင်းတွေနဲ့အတူ စွယ်စုံရတဲ့သူတစ်ဦး ဖြစ်ပါတယ်။ ပြီးတော့ နည်းစနစ်ပိုင်း စွမ်းဆောင်ရည် မြင့်မားပြီး ဘောလုံးနဲ့ အတူလည်း ကောင်းကောင်းကစားနိုင်သူ ဖြစ်တယ်။ သူက ကျနော်တို့အသင်းရဲ့ အရေးပါတဲ့သူတစ်ဦး ဖြစ်လာမှာ ဖြစ်ပြီး နိုင်ငံတကာပွဲတွေအပြီးမှာ အသင်းနဲ့ ပူးပေါင်းမှာ ဖြစ်ပါတယ်” လို့ နည်းပြအာတီတာက ပြောပါတယ်။
နည်းစနစ်ဒါရိုက်တာ အီဒူးကလည်း တီုမီယာဆုကို သေချာစောင့်ကြည့်ပြီးမှ ခေါ်ယူခဲ့တာဖြစ်ပြီး အသင်းလူစာရင်းမှာ အရေးပါတဲ့သူ ဖြစ်လာလိမ့်မယ်လို့ ချီးကျူးသွားခဲ့ပါတယ်။
အသက် ၂၂ နှစ်ရှိ တိုမီယာဆုဟာ ညာနောက်ခံလူနေရာနဲ့ ဗဟိုခံစစ်မှူး နေရာတွေအပြင် ကွင်းလယ်ခံစစ်နဲ့ ဘယ်နောက်ခံလူ နေရာတွေမှာလည်း ကစားခဲ့ဖူးပါတယ်။
