ရန်ကုန်အပါအဝင် တခြားမြို့ကြီးတွေရှိ ရုပ်ရှင်ရုံတွေကို စစ်ကောင်စီက အတင်းအကျပ် ပြန်လည်ဖွင့်လှစ်စေခဲ့တာ အချိန် ၁ နှစ်နီးပါး ရှိလာပြီဖြစ်ပေမဲ့ လာရောက်ကြည့်ရှုတဲ့ ပရိသတ်တွေ မရှိသလောက် နည်းပါးနေဆဲဖြစ်တယ်လို့ ရုပ်ရှင်ရုံနဲ့နီးစပ်သူတွေထံက သိရပါတယ်။

စစ်အာဏာရှင်ကိုဆန့်ကျင်တဲ့အနေနဲ့ ပြည်သူအများစုက ရုပ်ရှင်ရုံတွေမှာ သွားမကြည့်ဘဲ သပိတ်မှောက်ထားတာကြောင့် ခုအချိန်အထိ ကြည့်ရှုသူ အရမ်းနည်းနေတုန်းပဲလို့ ရန်ကုန်မြို့က ရုပ်ရှင်ရုံဝန်ထမ်းတစ်ဦးက ပြောပါတယ်။

ရုပ်ရှင်လက်မှတ်ခတွေလည်း ကျပ်  ၃၀၀၀/ ၆၀၀၀ ဝန်းကျင်အထိ မြင့်တက်သွားပြီး ရုံတွေမှာ လူအဝင်နည်းလို့ ဝန်ထမ်းအင်အားတွေလည်း လျှော့ချထားရတယ်လို့လည်း ဆိုပါတယ်။ 

ရန်ကုန်မြို့ခံပြည်သူတစ်ဦးက “ရုပ်ရှင်လက်မှတ်ခတွေကလည်း စျေးကြီးသလို သွားလာစရိတ်ကလည်း စျေးကြီးတယ်။ ပြီးတော့ လုံခြုံရေးအရလည်း Safety ဖြစ်လားဆိုတာ စဉ်းစားစရာဖြစ်လာတယ်။ စားဝတ်နေရေး၊ နိုင်ငံရေး အခြေအနေတွေကြောင့် အများစုက သွားမကြည့်ကြတော့တာပေါ့”လို့ပြောပါတယ်။

နွေဦးတော်လှန်ရေးမှာ ပြည်သူဘက်ကရပ်တည်ပါဝင်တဲ့ အနုပညာရှင်တွေ အခက်အခဲဖြစ်နေကြပြီး တော်လှန်ရေးမှာမပါဝင်တဲ့ အနုပညာရှင်တွေကို အားမပေးချင်ဘူးလို့လည်း ပြောပါတယ်။

ကိုဗစ်ရောဂါမဖြစ်ခင်နဲ့ စစ်အာမဏာမသိမ်းခင်အရင်က ရန်ကုန်အပါအဝင် တခြားမြို့ကြီးတွေရှိ ရုပ်ရှင်ရုံတွေမှာ တစ်ရက်ကို ပွဲစဉ် ၅ ပွဲ ပြသခဲ့ရာက စစ်ကောင်စီ လက်ထက်မှာ အချိန်ပိုင်းစနစ်နဲ့ ရတဲ့ လျှပ်စစ်မီးအခြေအနေတွေကြောင့် ရုပ်ရှင်ရုံတွေမှာ ပြသချိန် အနည်းဆုံး ၂ ပွဲကနေ အများဆုံး ၄ ပွဲအထိသာ ပြသနေရတယ်လို့ ဆိုပါတယ်။

စစ်ကောင်စီဟာ ဝါဒဖြန့်ရုပ်ရှင်တွေရိုက်ပြီး ရုပ်ရှင်ရုံတွေမှာ ပြသနေကာ လာရောက်ကြည့်ရှုသူ မရှိတဲ့အတွက် စစ်ကောင်စီပြန်ကြားရေးဝန်ကြီးကိုယ်တိုင် ရုပ်ရှင်သွားကြည့်တာရှိသလို ဌာနဆိုင်ရာ ဝန်ထမ်းတွေကိုလည်း အတင်းအကျပ် ရုပ်ရှင်ကြည့်ခိုင်းနေပါတယ်။

လက်ရှိ ရုံတင်ပြသတဲ့ မြန်မာရုပ်ရှင်ကားတွေအနေနဲ့လည်း ဇာတ်လမ်း အရည်အသွေး မပြည့်မီတာတွေကြောင့်လည်း အားမပေးတာလို့ ရုပ်ရှင်ကြည့်ပရိသတ်တချို့ကတော့ဆိုပါတယ်။

ကိုယ်နေထိုင်တဲ့ လူမှုဝန်းကျင်ကို ထင်ဟပ်တဲ့၊ အမှန်တရားပါတဲ့ ရုပ်ရှင်ကိုပဲ ရိုက်ချင်တဲ့အကြောင်းနဲ့ အဲဒါမှလည်း ရုပ်ရှင်စစ်တယ်လို့ ထင်ကြောင်း တော်လှန်ရေးမှာ ပါဝင်နေတဲ့  ဒါရိုက်တာဏကြီးက  သူ့ရဲ့လူမှုကွန်ရက်မှာ ရေးသားထားပါတယ်။ 

“ကိုယ်နေထိုင်တဲ့ လူမှုဝန်းကျင်ကို ထင်ဟပ်တဲ့၊ အမှန် တရားပါတဲ့ ရုပ်ရှင်ကိုပဲ ကျွန်တော် ရိုက်ချင်ပါတယ်။ အဲဒါမှလည်း ရုပ်ရှင်စစ်တယ်လို့ ထင်တယ်။ စစ်အာဏာရှင် လက်အောက်မှာတော့ အမှန်တရားပါတယ်ဆိုရင် ရုပ်ရှင်ဖြစ်ဖြစ်၊ ကဗျာဖြစ်ဖြစ်၊ သီချင်းဖြစ်ဖြစ် ရှင်သန်ဖို့ ခက်ပါတယ်။ ဘာဖြစ်လို့လဲဆိုတော့ စစ်အာဏာရှင်က အမှန်တရားကိုကြောက်ပြီး မလိုလားလို့ပါ။”

မြန်မာနိုင်ငံမှာ ကိုဗစ်-၁၉ ပထမလှိုင်းကတည်းက အရပ်သားအစိုးရလက်ထက်မှာ ပိတ်ထားခဲ့တဲ့ ရုပ်ရှင်ရုံတွေကို အာဏာသိမ်းစစ်ကောင်စီက ၂၀၂၂ ခုနှစ် ဧပြီ ၁၇ ရက်ကစပြီး တနိုင်ငံလုံးက ရုပ်ရှင်ရုံ ၇၀ နီးပါးကို ဖိအားပေး ဖွင့်လှစ်ခိုင်းခဲ့တာဖြစ်ပါတယ်။ 

စစ်ကောင်စီဟာ နိုင်ငံတော်အာဏာကို တရားမဝင်သိမ်းပြီးနောက်  ရုပ်ရှင်လောကသားတွေ အပါအဝင် အနုပညာရှင်တွေကို မတရားဖမ်းဆီးထောင်ချခဲ့ပြီး ပြည်သူတွေကို နေ့စဉ်သတ်ဖြတ်နေတဲ့အတွက် ပြည်သူလူထုက စစ်အာဏာရှင်တွေကို နည်းလမ်းပေါင်းစုံနဲ့ ဆန့်ကျင်နေကြတာ ဖြစ်ပါတယ်။

စစ်ကောင်စီက အခုနှစ်မေ ၁၂ ရက်မှာ ပြန်ဖွင့်ခဲ့တဲ့ ရန်ကုန်မြို့က  တက္ကသိုလ်တွေမှာ ဒီနေ့အထိ ကျောင်းတက်ရောက်သူ နည်းပါးနေဆဲဖြစ်တယ်လို့  CDM ကျောင်းသား၊ ကျောင်းသူ အချို့က ​ပြောပါတယ်။

ရန်ကုန်တက္ကသိုလ်၊ ရန်ကုန်နည်းပညာတက္ကသိုလ်၊ ရန်ကုန်စီးပွားရေးတက္ကသိုလ်၊ ရန်ကုန်နိုင်ငံခြား ဘာသာတက္ကသိုလ်၊ ဆေးတက္ကသိုလ် (၁) တို့မှာ ကျောင်းတက်ရောက်သူဦးရေဟာ တက္ကသိုလ်တွေ ပြန်လည်ဖွင့်လှစ်ချိန်ကအတိုင်း ကျောင်းတက်သူ မရှိသလောက် ဖြစ်နေတာပါ။

ဒဂုံတက္ကသိုလ်မှာတော့ ကျောင်းပြန်လည် ဖွင့်လှစ်ချိန်က ကျောင်းသား၊ ကျောင်းသူ ၇၀၀ လောက် ကျောင်း ပြန်တက်ခဲ့ကြပြီး ကျောင်းအပ်ရာသီနောက်ပိုင်း ပထမနှစ် ကျောင်းသား၊ ကျောင်းသူတွေ ထပ်မံ ဝင်ရောက်လာတာကြောင့် အခုဆိုရင် ကျောင်းတက်တဲ့သူ ထောင်ဂဏန်းလောက် ရှိပြီလို့ CDM ကျောင်းသားတယောက်က ပြောပါတယ်။

ဒါပေမဲ့ ရန်ကုန်မှာရှိတဲ့ တက္ကသိုလ်တွေမှာ တက်ရောက်နေတဲ့ ကျောင်းသားအရေအတွက်ဟာ တကျောင်းကို သောင်းဂဏန်းလောက် ရှိပြီး လက်ရှိ တက်နေတဲ့ ကျောင်းသားအရေအတွက် နဲ့ နှိုင်းယှဥ်ကြည့်မယ်ဆိုရင်တော့ စစ်ဖိနပ်အောက် မရောက်တဲ့ အရေအတွက်က အများဆုံး ဖြစ်နေသေးတယ် လို့ သူက ဆက်ပြောပါတယ်။

စစ်ကောင်စီဟာ တက္ကသိုလ်တွေ ပြန်ဖွင့်စဥ်ကလည်း လုံခြုံရေးကို တင်းတင်းကြပ်ကြပ် ချထားခဲ့ ပြီး အခုအခါမှာလည်း ကျောင်းထဲကို သင်တန်းကိစ္စ၊ ကျောင်းကိစ္စတွေ စုံစမ်းမယ်ဆိုရင် သက်သေခံ အထောက်အထားတခုခု ပါရှိမှသာ ကျောင်းထဲဝင်ခွင့်ပြုတော့တဲ့အထိ လုံခြုံရေး တင်းကြပ်ထားတယ်လို့ ရန်ကုန်တက္ကသိုလ်ကို သွားရောက်ခဲ့သူတယောက်က ပြောပါတယ်။

အခုအခါမှာ အရင်က ကျောင်းတက်ခဲ့တဲ့ ကျောင်းသားတွေထဲက တချို့က လွတ်မြောက်နယ်မြေ တွေမှာ လက်နက်ကိုင်ပြီး အာဏာသိမ်းစစ်ကောင်စီကို တော်လှန်နေကြပြီဖြစ်သလို မြို့ပေါ်မှာ ကျန်ရှိနေတဲ့ ကျောင်းတက်လက်စဖြစ်နေတဲ့ ကျောင်းသားတွေ နဲ့ ကျောင်းသားဟောင်းတွေက လည်း အခါအခွင့်သင့်တိုင်း သပိတ်တိုက်ပွဲတွေနဲ့ တော်လှန်နေကြဆဲ ဖြစ်ပါတယ်။