မကွေးတိုင်း၊ မကွေးမြို့၊ အောင်စေတနာရပ်ကွက် တောင်တွင်းလမ်းနဲ့ အဝေရာလမ်းဆုံ မီးပွိုင့်ရှိ စစ်ကောင်စီတပ် စစ်ဆေးရေးဂိတ်မှာ နိုဝင်ဘာ ၂ ရက် ည ၉ နာရီကျော်လောက်က ဗုံးတလုံးပေါက်ကွဲခဲ့ပြီး စစ်ကောင်စီတပ်ဖွဲ့ဝင်တွေ ထိခိုက်သေဆုံးသူ ရှိနိုင်တယ်လို့ မကွေးမြို့ ဒေသခံတယောက်က ပြောပါတယ်။

ဒါ့အပြင် အထက ၁ လမ်းပေါ်က စစ်ကောင်စီတပ်ဖွဲ့ဝင်တွေ လုံခြုံရေးယူထားတဲ့ အ.ထ.က ၄ ကျောင်းရှေ့က ဘယ်ရီဂိတ်တွေချထားတဲ့ နေရာမှာလည်း ည ၉ နာရီကျော်လောက်က ဗုံးတလုံး ပေါက်ကွဲခဲ့တာလို့ ဆိုပါတယ်။

“ပေါက်ကွဲသံကတော့ အကျယ်ကြီး ကြားလိုက်ရတယ်ဗျ။ စစ်(...)တွေဘက်ကတော့ ထိခိုက်သေဆုံးသူ ရှိနိုင်ပေမဲ့ အတိအကျတော့ မသိရသေးဘူး။ မြို့ပေါ်က ပရဟိတ ကားတွေနဲ့တော့ မသယ်ဘူး။ ဒီလိုဖြစ်စဥ်မျိုးက သူတို့အစီအစဥ်နဲ့ပဲ သယ်လောက်တယ်။ ကျနော်တို့လည်း ညဘက်ဆိုတော့ အပြင်မထွက်ရဲဘဲ ကိုယ့်အိမ်မှာပဲ နေကြတာ။”

မကွေးမြို့မှာ အောက်တိုဘာ ၁၄ ရက် ညပိုင်းကလည်း တိုင်းဒေသကြီး ယာဥ်ထိန်းရဲတပ်ဖွဲ့မှူး ရဲမှူးစိန်ဝင်း သေနတ်နဲ့ ပစ်ခတ်ခံရပြီး သေဆုံးသွားပါတယ်။

မကွေးတိုင်းထဲက နတ်မောက်မြို့နယ် ဖက်တောရေကျေးရွာက ဒေသခံပြည်သူ ၁၀၀ ကျော်ကို စစ်ကောင်စီတပ်က နိုဝင်ဘာ ၃ ရက်အထိ ဖမ်းဆီးထားပြီး ဒေသခံပြည်သူတွေ ဘေးလွတ်ရာကို ထွက်ပြေးတိမ်းရှောင်နေကြရတယ်လို့ ဒေသခံတွေဆီကနေ သိရပါတယ်။

ဖက်တောရေရွာက ပြည်သူ ၁၂၅ ယောက်ကို စစ်ကောင်စီတပ်ဖွဲ့ဝင်တွေက အောက်တိုဘာ ၁၇ ရက်ကနေ ဒီနေ့အထိ ဖမ်းဆီးထိန်းသိမ်းထားပြီး ၈ ယောက်ကိုတော့ နတ်မောက်မြို့မရဲစခန်း စစ်ကြောရေးကို ပို့ဆောင်ထားကြတယ်လို့ ဖက်တောရေကျေးရွာက ဒေသခံ အမျိုးသမီးတယောက်က ပြောပါတယ်။

“ဖက်တောရေကျေးရွာနားမှာ အောက်တိုဘာလ ၁၆ ရက်နေ့က စစ်(...)စစ်ကြောင်းကို ဒေသကာကွယ်ရေးတပ်ဖွဲ့တွေ တိုက်ခိုက်ခဲ့ပြီးတဲ့နောက် အောက်တိုဘာ ၁၇ ရက်နေ့မှာ စစ်(...)တွေ ဝင်ရောက်တပ်စွဲပြီး အရင်ရက်တွေက နေအိမ် ၇ လုံးနဲ့ အောက်တိုဘာလ ၁၉ ရက်နေ့ ညနေပိုင်းမှာ နေအိမ် ၆ လုံးကို ထပ်မံမီးရှို့ခဲ့လို့ စုစုပေါင်း နေအိမ် ၁၃ လုံး မီးလောင်ကျွမ်းခဲ့တယ်။”

စစ်ကြောင်းထိုးတုန်းကတော့ စစ်ကောင်စီတပ် အင်အား ၁၀၀ လောက်ရှိပြီး အခုလက်ရှိ အင်အား ၃၀ လောက် ရွာမှာတပ်စွဲထားကာ ပြည်သူ ၁၀၀ ကျော်ကို ဘယ်မှသွားခွင့်မပေးဘဲ ဖမ်းဆီးထိန်းသိမ်းထားပြီး အောက်တိုဘာ ၁၇ ရက်နေ့မှာတော့ အသက် ၅၀ အရွယ် ဦးကျော်ဝေကို စစ်ကောင်စီတပ်ဖွဲ့ဝင်တွေက သေနတ်နဲ့ ပစ်သတ်ခဲ့ကြတယ်လို့ ဒေသခံက ပြောပါတယ်။

ဖက်တောရေကျေးရွာမှာ အိမ်ခြေ ၄၀၀ လောက်ရှိကာ ဒေသခံပြည်သူတွေ ဘေးလွတ်ရာကို ထွက်ပြေးနေရပြီး တောထဲတွေမှာ ဖြစ်သလိုနေထိုင်ကြရကာ စားဝတ်နေရေး အခက်အခဲတွေနဲ့ ရင်ဆိုင်ကြုံတွေ့နေရတယ်လို့ ဆိုပါတယ်။

အဲဒီ စစ်ကောင်စီတပ်ဖွဲ့ဝင်တွေဟာ လူမရှိတဲ့ နေအိမ်တွေကို စိတ်ကြိုက်မွှေနှောက်ပြီး အဖိုးတန်ပစ္စည်းတွေနဲ့ ငွေကြေးတွေကို ခိုးယူကြသလို ပြည်သူတွေမွေးမြူထားတဲ့ အိမ်မွေးတိရစ္ဆာန်တွေကို သတ်ဖြတ်စားသောက်တဲ့အပြင် မြို့ပေါ်ကို သယ်သွားပြီး ရောင်းစားပစ်ကြတယ်လို့ ဆိုပါတယ်။

ဖက်တောရွာနားမှာ အောက်တိုဘာ ၁၆ ရက် ည ၉ နာရီခွဲလောက်ကလည်း ဆိုင်ကယ် ၄ စီးနဲ့ ကင်းလှည့်လာတဲ့ စစ်ကောင်စီတပ်သား ၈ ယောက်နဲ့ ပျူစောထီးတွေကို ဒေသကာကွယ်ရေး ပူးပေါင်းတပ်ဖွဲ့တွေက တိုက်ခိုက်ခဲ့လို့ စစ်ကောင်စီဘက်က ၄ ယောက်သေဆုံးပြီး PDF ရဲဘော်တယောက် ဒဏ်ရာအနည်းငယ် ရရှိခဲ့ကာ သေနတ် ၂ လက် သိမ်းဆည်းနိုင်ခဲ့တယ်လို့ သိရပါတယ်။

မကွေးတိုင်း၊ နတ်မောက်မြို့နယ်က လက်ခုပ်ပင်ကျေးရွာမှာ စစ်ကောင်စီတပ်တွေက စက်တင်ဘာ ၁၆ ရက်နေ့ကတည်းက စတင်ဝင်ရောက် တပ်စွဲနေထိုင်ပြီး ကျေးရွာအတွင်းက ဒေသခံပြည်သူ တွေ ပိုင်ဆိုင်တဲ့ပစ္စည်းတွေကို လုယက်ခိုးယူနေတယ်လို့  ဒေသခံတွေဆီက သိရပါတယ်။

ဒေသခံတဦးက “ရွာက လူငယ်ပရဟိတခေါင်းဆောင် ကိုဖြူကြီးကို ဖမ်းဖို့လာတာတဲ့။ ရွာမှာက စစ်ကောင်စီက အုပ်ချုပ်ရေးမှူးခန့်တာ လုပ်မယ့်သူမရှိတာကို ကိုဖြူကြီးက အုပ်ချုပ်ရေးမှူးမလုပ်ကြဖို့ စည်းရုံးတယ်ထင်ပြီး ကိုဖြူကြီးကိုလာဖမ်းတာ။ သတင်းကြိုရလို့ မိသားစုလိုက် ရှောင်သွားလို့ လွတ်သွားတယ်။ အခု စစ်ကောင်စီတပ်သားတွေက ကိုဖြူကြီး အိမ်မှာ တပ်စွဲထားတယ်” လို့ ပြောပါတယ်။

လူငယ်ပရဟိတ ခေါင်းဆောင် ကိုဖြူကြီးဟာ ဇနီးနဲ့ အရွယ်မရောက်သေးတဲ့ သမီး ၂ ဦးတို့ တိမ်းရှောင်သွားတာကြောင့် အကြမ်းဖက်စစ်ကောင်စီတပ်ဖွဲ့ဝင်တွေဟာ ကိုဖြူကြီး နေအိမ်တံခါးသော့တွေကိုဖျက်ပြီး ဝင်ရောက်တပ်စွဲထားတာလို့ ဆိုပါတယ်။ 

ဒါ့အပြင် အိမ်မှာရှိနေတဲ့ ဆန်၊ ဆီနဲ့ အိမ်မှာမွေးမြူထားတဲ့ ကြက်၊ ဝက်တွေကိုပါ သတ်ဖြတ်စားသောက်နေတဲ့အပြင် ကျေးရွာအတွင်းက ဒေသခံပြည်သူတွေရဲ့ အိမ်မွေးတိရစ္ဆာန်တွေကိုပါ ခိုးယူလုယက်သတ်ဖြတ်စားသောက်နေကြောင်း သိရပါတယ်။

ကျေးရွာမှာနေထိုင်ကြတဲ့ ကိုဖြူကြီး နဲ့ မိသားစုအပါအဝင် ဒေသခံပြည်သူ ၂၀၀ နီးပါးဟာလည်း အကြမ်းဖက်စစ်ကောင်စီတပ်တွေရဲ့ ဖမ်းဆီးနှိပ်စက်ခံရမှာစိုးရိမ်တဲ့အတွက် ထွက်ပြေးတိမ်းရှောင်နေရတယ်လို့ သိရပါတယ်။

ထွက်ပြေးတိမ်းရှောင်နေသူလူငယ်တဦးက “အကြမ်းဖက်တပ်သားတွေက ရွာကကြက်ဝက်တွေကို သတ်စားနေပြီး လူမရှိတဲ့ အိမ်တွေက ဆိုင်ကယ်နဲ့ အဖိုးတန်ပစ္စည်းတွေကို ခိုးယူနေတယ်လို့ သိရတယ်။ သူတို့ရှိနေတော့ ကျနော်တို့လည်း အိမ်မပြန်ရဲသေးဘူး” လို့ ပြောပါတယ်။

နတ်မောက်မြို့နယ်၊ လက်ခုပ်ပင်ကျေးရွာဟာ အိမ်ခြေ ၁၀၀၀ နီးပါးရှိပြီး လူဦးရေ ၂၅၀၀ ရှိတဲ့ လျှပ်စစ်မီးရရှိတဲ့ ရွာကြီးတရွာဖြစ်တယ်လို့ သိရပါတယ်။