ပဲခူးတိုင်း၊ ပဲခူးခရိုင်၊ ကဝမြို့နယ် သရက်ကုန်းကျေးရွာမှာ ပျူစောထီးခေါင်းဆောင် တယောက်ကို သရက်ကုန်းဈေးထဲ ဆက်ကြေးကောက်ယူနေစဉ် မတ်လ ၁၀ ရက် ဒီနေ့မနက် ၇ နာရီခွဲမှာ ကဝမြို့နယ်ပကဖ က နန်းထိုက်အောင်စစ်ဆင်ရေးအဖြစ် သေနတ်ဖြင့် ပစ်ခတ်ခဲ့တယ်လို့ ပဲခူး PDF က ပြောပါတယ်။

အဆိုပါပစ်ခတ်မှုကြောင့် ပျူစောထီးခေါင်းဆောင် တင်မြင့် နေရာမှာပင် သေဆုံးသွားခဲ့ပြီး အခုအခါ သရက်ကုန်းကျေးရွာမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေက ပိတ်ဆို့ရှာဖွေနေတယ်လို့လည်း ပဲခူး PDF တွေက ပြောပါတယ်။

သရက်ကုန်းကျေးရွာမှာ စစ်ကောင်စီတပ်ဖွဲ့ဝင် ၁၀ ယောက်လောက် အမြဲတမ်းတပ်စွဲထားပြီး အုပ်ချုပ်ရေးမှူး၊ ပျူစောထီးတွေနဲ့ ပူးပေါင်းကာ ပြည်သူလူထုကို ဒုက္ခမျိုးစုံပေးနေတယ်လို့ ပဲခူး PDF က ဆိုပါတယ်။

ပျူစောထီးခေါင်းဆောင် တင်မြင့်ဟာ သရက်ကုန်းရွာမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေ တခြားကျေးရွာတွေကို ဆိုင်ကယ်နဲ့ လှည့်လည်ရာမှာ သူကိုယ်တိုင် သေနတ်လွယ် ဆိုင်ကယ်မောင်းပြီး နေ့ရောညပါ သတင်းပေး လမ်းပြပြုလုပ်တာ၊ သရက်ကုန်းကျေးရွာဈေးနဲ့ လောင်းကစားဒိုင်တွေမှာ ဆက်ကြေးကောက်တာနဲ့ ပြည်သူကို ခြိမ်းခြောက်ဖိနှိပ်ငွေညှစ်၊ မတရားစွပ်စွဲဖမ်းဆီး ထောင်ချခိုင်းတာတွေကြောင့် နန်းထိုက်အောင် စစ်ဆင်ရေးအဖြစ် ပစ်ခတ်ခဲ့တာလို့ ကဝမြို့နယ်ပကဖက ထုတ်ပြန်ပါတယ်။

ပဲခူးတိုင်း၊ သာယာဝတီခရိုင်၊ အုတ်ဖိုမြို့နယ်မှာလည်း ထန်းပင်ကုန်းကျေးရွာရှိ ရာအိမ်မှူး ပျူစောထီး မျိုးဝင်းနေအိမ်မှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေကို မတ်လ ၉ ရက် မနက် ၂ နာရီ ၁၅ မိနစ်က သာယာဝတီခရိုင် PDF တပ်ရင်း-၃၈၀၂၊ တပ်ခွဲ-၄ နဲ့ တပ်ခွဲ-၅ တို့ပူးပေါင်းပြီး သွားရောက်ပစ်ခတ်တိုက်ခိုက်ခဲ့တယ်လို့ ပဲခူး PDF ပြန်ကြားရေးတာဝန်ရှိသူက ပြောပါတယ်။

အပြန်အလှန်ပစ်ခတ်မှုဖြစ်ပွားခဲ့ပြီး စစ်ကောင်စီဘက်က ထိခိုက်သေဆုံးမှုကို ဆက်လက်အတည်ပြု စုံစမ်းနေသလို ရာအိမ်မှူး ပျူစောထီးမျိုးဝင်းဟာ မိသားစုဝင်တွေနဲ့ ခမရ-၆ ထဲ ပြောင်းရွှေ့နေထိုင်နေတယ်လို့ ဆိုပါတယ်။

ရာအိမ်မှူး ပျူစောထီးမျိုးဝင်းရဲ့ နေအိမ်ကို စစ်ကောင်စီတပ်ဖွဲ့ဝင်တွေအတွက် ကင်းစခန်းအဖြစ် အသုံးပြုခွင့်ပေးထားပြီး သူဟာ စစ်ကောင်စီတပ်ရဲ့ အမာခံ လက်ရုန်းပျူစောထီးတဦး ဖြစ်တယ်လို့ သိရပါတယ်။

အဆိုပါစစ်ဆင်ရေးမှာ တော်လှန်ရေးတပ်ဖွဲ့ဝင်တွေ အထိအခိုက်မရှိဘဲ အောင်မြင်စွာ ဆုတ်ခွာနိုင်ခဲ့တယ်လို့ ပဲခူး PDF က ဆိုပါတယ်။

ပဲခူး သာယာဝတီခရိုင်ဘက်က စစ်ကောင်စီတပ်တွေကို ပဲခူး PDF တွေက မကြာခဏ အလစ်အငိုက် ဝင်ရောက်တိုက်ခိုက်လေ့ရှိပြီး စစ်ကောင်စီဘက်က ထိခိုက်ကျဆုံး များပြားနေပါတယ်။

နန်းထိုက်အောင် စစ်ဆင်ရေးအနေနဲ့ ပဲခူးတိုင်း၊ ကျောက်တံခါးမြို့နယ်၊ တောကျွဲအင်း (အောင်မြင်) မြို့မှာ ဇန်နဝါရီ ၇ ရက်မနက်ပိုင်းက ပျူစောထီးခေါင်းဆောင် မင်းအောင်ကို ကျောက်တံခါးမြို့နယ် ပကဖ၊ ဗိုလ်ကျောက်ခဲ မြို့ပြပျောက်ကြားအဖွဲ့တွေက သုတ်သင်ရှင်းလင်းခဲ့ကြတယ်လို့ ထုတ်ပြန်ပါတယ်။

ဒါ့အပြင် အဲဒီဖြစ်စဉ်ကို လာရောက်စုံစမ်းကြတဲ့ အကြမ်းဖက်စစ်ကောင်စီ တောကျွဲအင်းနယ်‌မြေရဲစခန်းက ရဲတပ်ဖွဲ့ဝင်တွေကိုလည်း ဗိုလ်‌ကျောက်ခဲ မြို့ပြပျောက်ကြားအဖွဲ့က ထပ်မံမိုင်းဆွဲတိုက်ခိုက်ခဲ့တာကြောင့် ဒုရဲအုပ်ရန်နိုင်ဟာ စိုးရိမ်ရတဲ့ လက်တစ်ဖက်ပြတ်ကျဒဏ်ရာရရှိခဲ့ပြီး ရဲတပ်သားနေဇော်မှာ ဦးခေါင်းထိမှန်ဒဏ်ရာနဲ့ ရဲတပ်သားမောင်မြင့်မှာ လက်ချောင်းတွေ ပြတ်တောက် ဒဏ်ရာတွေ ရရှိခဲ့ကြတယ်လို့ ဆိုပါတယ်။

ဒီစစ်ဆင်ရေးမှာတော့ ဗိုလ်ကျောက်ခဲ ဦးဆောင်တဲ့ တော်လှန်ရေးတပ်ဖွဲ့ဝင်တွေ ဘေးအန္တရာယ်မရှိဘဲ အောင်မြင်စွာ ဆုတ်ခွာနိုင်ခဲ့ကြပြီး အကြမ်းဖက်စစ်ကောင်စီ ရဲတပ်ဖွဲ့ဝင်တွေ ထိခိုက်ဒဏ်ရာရရှိမှုနဲ့ ပတ်သက်ပြီးတော့ နောက်ဆက်တွဲအခြေအနေတွေကို ထပ်မံအတည်ပြု စုံစမ်းနေတယ်လို့ ပဲခူးတိုင်းဒေသကြီး ပြည်သူ့ကာကွယ်ရေးတပ်ဖွဲ့ Bago Region PDF က ပြောပါတယ်။

လတ်တလောမှာတော့ အာဏာသိမ်းစစ်အုပ်စုရဲ့ ပြည်သူလူထုအပေါ် အကြမ်းဖက် ဖိနှိပ်ဖမ်းဆီး တိုက်ခိုက်သတ်ဖြတ်နေမှုတွေကို ပြည်သူတရပ်လုံးက အသက်ရှင်သန်ရေးအတွက် ခုခံကာကွယ်ပိုင်ခွင့်အရ ပြည်သူ့ခုခံစစ်ကို ဆင်နွှဲနေကြပြီး နိုင်ငံတဝန်းမှာတော့ မြန်မာပြည်သူတွေဟာ စစ်အာဏာရှင်စနစ် မြန်မာ့မြေပေါ်မှ အပြီးတိုင်ချုပ်ငြိမ်းရေးနဲ့ ဖက်ဒရယ်ဒီမိုကရေစီ တည်ဆောက်ရေးအတွက် ငြိမ်းချမ်းစွာဆန္ဒပြတဲ့ လူထုသပိတ် တိုက်ပွဲတွေ တိုင်းဒေသကြီးနဲ့ ပြည်နယ်တွေအနှံ့အပြား ပြုလုပ်နေကြသလို ဒေသခံ ပြည်သူ့ကာကွယ်ရေးတပ်တွေ၊ တိုင်းရင်းသား လက်နက်ကိုင်တပ်တွေနဲ့ စစ်ကောင်စီတပ်တွေကြား တိုက်ပွဲတွေ ပြင်းထန်နေပါတယ်။

NUG အစိုးရကတော့ ပြည်သူ့ခုခံတွန်းလှန်စစ်ပွဲ စတင်ခဲ့တဲ့ ၁ နှစ်အတွင်း အကြမ်းဖက် စစ်ကောင်စီဘက်က တပ်ဖွဲ့ဝင်ပေါင်း ၂၀,၁၅၀ ကျော်သေဆုံးကာ ဒဏ်ရာရသူ ၇,၀၀၀ ကျော်လောက်ရှိလာပြီး စစ်ကောင်စီ စိုးမိုးအုပ်ချုပ်နိုင်တဲ့နေရာဟာ တိုင်းပြည် နယ်မြေအကျယ်အဝန်းရဲ့ ထက်ဝက်တောင် မရှိတော့ဘူးလို့ NUG ယာယီသမ္မတ ဒူဝါလရှီးလက ပြောကြားထားပါတယ်။

မြန်မာပြည်အနှံ့ တိုက်ပွဲတွေမှာ တပ်ဖွဲ့ဝင်တွေ သေဆုံးဒဏ်ရာရမှု အခြေအနေနဲ့ ပတ်သက်လို့ အကြမ်းဖက် စစ်ကောင်စီဘက်ကတော့ သတင်းထုတ်ပြန်တာ မရှိပါဘူး။

ဒါ့အပြင် စစ်ကောင်စီရဲ့ အဆိုးဆုံး အကြမ်းဖက်တာခံခဲ့ရတဲ့ စစ်ကိုင်းတိုင်းနဲ့ မကွေးတိုင်းထဲက မြန်မာပြည်အထက်ပိုင်း လမ်းပိုင်းတွေရဲ့ ၉၀ ရာခိုင်နှုန်းကို PDF တွေက ထိန်းချုပ်ထားနိုင်ပြီလို့ NUG အစိုးရက ပြောထားပြီး လက်ရှိ မြေပြင်မှာ အကြမ်းဖက်ခံနေရတဲ့ ကျေးရွာတွေဟာ စစ်ကောင်စီနဲ့ PDF တွေ နှစ်ဖက်စလုံး မထိန်းချုပ်နိုင်သေးတဲ့ ကြားနယ်မြေတွေ ဖြစ်တယ်လို့ ဆိုပါတယ်။