စစ်ကိုင်းတိုင်း ရွှေဘိုမြို့နယ် နမစားရစ်ရွာက လူနေအိမ်တွေကို စစ်ကောင်စီတပ်က ဖေဖော်ဝါရီ ၂၅ ရက်နေ့ မနက် ၅ နာရီလောက် မီးရှို့နေတယ်လို့ ဒေသခံတွေက ပြောပါတယ်။
အဆိုပါစစ်တပ်ဟာ ရွာအတွင်းကို လက်နက်ကြီးတွေနဲ့ ပစ်ခတ်ဝင်ရောက်ခဲ့တယ်လို့ ရွာသားတဦးက ပြောပါတယ်။
“ကျနော်တို့ နေစရာအိမ်မရှိတော့ပါဘူးဗျာ။ ဒီလောက်အထိ မရက်ဆက်သင့်ပါဘူး။ ရွာကတော့ လက်ရှိအချိန်အထိ မီးလောင်နေတာ အဝေးကနေပဲ ကြည့်နေရတယ်။ ဘယ်လုံးမီးလောင်ပြီး ဘယ်နှလုံး ကျန်မယ်တော့မသိဘူးဗျာ။ ကျနော်တို့ရွာသားတွေလည်း သူတို့လာကတည်းက ရွာအပြင်ထွက်ပြေးနေရတယ်။”
စစ်ကောင်စီတပ်တွေဟာ ဖေဖော်ဝါရီ ၂၄ ရက်နေ့ကလည်း ရွှေဘိုမြို့နယ်အရှေ့ပိုင်းက ငပိအိုးကျေးရွာကို မီးရှို့ခဲ့တာကြောင့် အိမ်ခြေ ၁၄၀ ကျော် မီးလောင်းဆုံးရှုံးခဲ့ရသလို အဲဒီရွာအနီးနားမှာရှိတဲ့ ဇီးဖြူကုန်းကျေးရွာနဲ့ မြို့လှကျေးရွာတွေကိုလည်း ဝင်ရောက်ရှာဖွေဖျက်ဆီးနေတာကြောင့် ပြည်သူ ထောင်ချီ ထွက်ပြေးတိမ်းရှောင်နေကြရတယ်လို့ ဒေသခံတွေက ပြောပါတယ်။
စစ်ကိုင်းတိုင်းအတွင်း ကျေးရွာတွေကို စစ်ကောင်စီတပ်က ရွာလုံးကျွတ်မီးရှို့ ဖျက်ဆီးနေတာကြောင့် ဒေသခံအများအပြား အိုးမဲ့အိမ်မဲ့ဖြစ်ပြီး စားဝတ်နေရေး ခက်ခဲနေကြ ရပါတယ်။
ပုံ- မီးရှို့ခံနေရသည့် နမစားရစ်ရွာ
