ရှမ်းပြည်နယ်မြောက်ပိုင်း၊ နမ့်ခမ်းမြို့နယ်မှာ  အောက်တိုဘာ ၁၁ ရက်ညနေက လက်နက်ကြီး ကျည်ဆန်ကျရောက် ပေါက်ကွဲတာကြောင့်  ရွာထဲမှာ ထင်းခွေနေတဲ့ ကလေး ၃ ယောက် အနက်  ၁၂ နှစ်အရွယ်ကလေးငယ် တယောက် သေဆုံးခဲ့ပြီး ၂ ယောက် ထိခိုက်ဒဏ်ရာရသွားပါတယ်။

အသက် ၅ နှစ်အရွယ်ကလေးတစ်ယောက်၊ အသက် ၁၂ ရွယ်မိန်းကလေးတစ်ယောက်နဲ့ အသက် ၁၉ နှစ်အရွယ်ကလေးတစ်ယောက် စုစုပေါင်း ၃ ယောက် ထိခိုက်ဒဏ်ရာရခဲ့တာဖြစ်ပြီး အသက် ၁၂ အရွယ်မိန်းကလေးကတော့ ဆေးရုံလာတဲ့လမ်းမှာ သေဆုံးသွားခဲ့တယ်လို့ ဒေသခံ က ပြောပါတယ်။

"ရွာထဲမှာက လူကြီးတွေမရှိကြဘူး။ အလုပ်သွားကြတော့ ညနေ ၄ နာရီလောက်မှ အိမ်ပြန်ရောက်တော့ လူကြီးတွေကမသိကြဘူး၊ ကလေးတွေက ထင်းသယ်ရင်းနဲ့ မောလို့ဆိုပြီး ထိုင်နေတာ။ အဲ့နေရာကို ဗုံး ကျလာပြီး ပေါက်ကွဲတာ" လို့ ဒေသခံတယောက်က ပြောပါတယ်။

လက်နက်ကြီးကျည်ကျတဲ့ ကျေးရွာက နမ့်ခမ်းမြို့နယ်ထဲက အောက်ခြေရွာဖြစ်ပြီး တောလမ်းနဲ့နီးတာကြောင့် ဘယ်အဖွဲ့က ပစ်တဲ့ လက်နက်လဲဆိုတာကိုမသိရဘူးလို့ဆိုပါတယ်။

“ရွာက အောက်ခြေရွာ၊ ပြီးတော့ တောလမ်းနဲ့လည်း နီးတယ်၊ အရင်က တောဘက်တွေမှာတော့ စစ်ကောင်စီက လူတွေနဲ့တိုက်ပွဲ ဖြစ်ကြတယ်။ ခုလို ရွာထဲကို လက်နက်ကြီးကျတာတော့ တခါမှမဖြစ်ဖူးဘူး" လို့ ဒေသခံတစ်ဦးက ဆိုပါတယ်။

ဒီနေ့ အဆိုပါနေရာနားမှာ စစ်ကောင်စီတပ်သားတွေကိုပဲ မြင်တွေ့ရလေ့ရှိပြီး အခုအချိန်ထိ တိုက်ပွဲ ဖြစ်တာတွေ မရှိခဲ့သေးဘူးလို့ သိရပါတယ်။

ထိခိုက်ဒဏ်ရာရထားတဲ့အသက် ၁၉ နှစ်အရွယ် ယောက်ျားလေးတစ်ယောက်က မွေးရာပါ စကား မပြောတတ်သူလို့သိရပြီး လက်ရှိ မူဆယ်ဆေးရုံမှာ ဆေးကုသမှုခံယူနေပြီး ဒဏ်ရာအခြေအနေ မစိုးရိမ်ရဘူးလို့ သိရပါတယ်။

ရှမ်းပြည်မြောက်ပိုင်း၊ မူဆယ်ခရိုင်၊ နမ့်ခမ်းမြို့နယ်ထဲမှာ အခုရက်ပိုင်း မိုးရက်ဆက်ရွာသွန်းနေတာကြောင့် ရွှေလီမြစ်ရေ တရိပ်ရိပ်တက်နေပြီး ဟင်းသီးဟင်းရွက် သီးနှံစိုက်ခင်းတွေနဲ့ ကြက်မွေးမြူရေးခြံ တချို့လည်း ရေလွှမ်းနေပါတယ်။ 

နမ့်ခမ်းမြို့နယ် မန့်ဆွမ်းရွာမှာဆိုရင်  ပြောင်းခင်း၊ ခရမ်းချဉ်ပင်၊ ဘူးပင်၊ သခွါးပင်တွေ ရေမြုပ်နေသလို ကြက်ခြံတွေလည်း ရေလွှမ်းနေကြောင်း၊ နောက် ၁ ရက် ၂ ရက်အတွင်း မြစ်ရေမကျပါက စိုက်ခင်းတွေ ပျက်စီးဖွယ်ရှိပြီး မြစ်ကမ်းဘေးရှိ ရပ်ရွာတွေထဲလည်း ရေတွေဝင်ရောက်လာနိုင်တယ်လို့ ဒေသခံတွေက လူမှုကွန်ရက်မှာ လိုက်ဖ်လွှင့်ပြောပါတယ်။

ဒီကိစ္စနဲ့ ပတ်သက်ပြီး မန့်ဆွမ်းရွာသားတစ်ယောက်ကလည်း သူတို့ဆီမှာ မိုးဆက်တိုက်ရွာနေတာ တပတ်လောက်ရှိပြီဖြစ်ကြောင်း၊ ရွှေလီမြစ်ရေကြီးတာကတော့ ခါတိုင်းနှစ်တွေထက်ဒီနှစ် အဆိုး ဆုံးဖြစ်တယ်လို့ ဒီဗွီဘီကို ပြောပါတယ်။ 

“ မိုးက တစိမ့်စိမ့်ရွာနေတာ တပတ်ကျော်ပြီ ဒီနေ့ပါဆို ၈ ရက်မြောက်ပေါ့၊ မြစ်ရေကလည်း တဖြည်းဖြည်းမြင့်လာတယ်။ နွေရာသီတုန်းကနဲ့စာရင် လူတစ်ရပ်ကျော်တော့ ရှိမယ်ခင်ဗျ။ ကူးတို့ ဆိပ်လည်း ရေနစ်နေတော့ ဘယ်မှသွားလို့လဲမရဘူး။ နဂိုကမှ ကိုဗစ်-၁၉ ရောဂါကြောင့် ရွာကနေ အဝင်အထွက်ပိတ်ထားတာ။ ဒါပေမဲ့ ဈေးမရောင်းရင် ဝင်ငွေလုံးဝမရှိလို့ ၃ ရက်တစ်ခါ ဝင်ထွက်ခွင့်ရဖို့ သက်ဆိုင်ရာကိုခွင့်တောင်းထားတယ်၊ အခုရေကြီးလာတော့ မသွားရမလာရတော့ ပိုခက်ခဲတာပေါ့။ နောက်ထပ် ၂ ရက်ထိ မိုးမတိတ်ရင် စိုက်ခင်းတွေလည်း ပျက်စီးနိုင်တယ်။ ရွာထဲလည်းရေဝင်နိုင်တယ်။  ကျနော်တို့ရွာရယ်၊ ကွန်ကျိုင်းရယ်၊ ကောင်းနောင်ရွာရယ်ပေါ့။ ”

မန့်ဆွမ်းရွာဟာ စိုက်ပျိုးရေးအဓိကလုပ်ကိုင်ပြီး ခြံထွက်သီးနှံတွေကို ခါတိုင်းတရုတ်ပြည်ကို တင်ပို့ရောင်းချပေမယ့် ကိုဗစ်ကြောင့် တရုတ်ဘက်ကို ပို့လို့မရတာ ၂ နှစ်ရှိပြီး နမ့်ခမ်းမြို့ပေါ်နဲ့ ရွာမြောက်ဘက် ကချင်ပြည်နယ်စပ်ဆီသာ သွားရောင်းရကြောင်း၊ ခုလိုဖြစ်တော့ ဘယ်မှမရောင်းနိုင်ဘူးလို့ ဆိုပါတယ်။ 

နောက်ရွာသားတစ်ဦးကလည်း သူတို့ပြောင်းခင်းဟာ ဆွတ်ခူးချိန်တန်ပေမယ့် မိုးရွာပြီး ရေထဲနစ်နေလို့ မခူးနိုင်ကြောင်း၊ ပြောင်းပင်တွေ ရေတိုက်စားသွားမှာလည်း စိုးရိမ်ကြောင်း ပြောပါတယ်။ 

ရွှေလီမြစ်ဟာ တရုတ်နိုင်ငံ၊ ယူနန်ပြည်နယ်ကနေ မြစ်ဖျားခံပြီး မြန်မာနယ်စပ် မူဆယ်၊ နမ့်ခမ်းမြို့နယ်ဘက်စီးဆင်းတာကြောင့် ဒီထက်ရေကြီးလာရင် အဆိုပါမြို့နယ် ၂ ခုက ဧကပေါင်း ရာနဲ့ချီတဲ့စိုက်ခင်းတွေအတွက် ရေနစ်မြုပ်ပျက်စီးမယ့်အရေး  စိုးရိမ်စရာရှိနေပါတယ်။