ရှမ်းပြည်နယ်၊ နမ့်စန်မြို့အနီးမှာ ပြင်းအား ရစ်ချ်တာစကေး ၄ ဒသမ ၂ အဆင့်ရှိ အင်အားအနည်းငယ်ရှိတဲ့ မြေငလျင်တစ်ခု ဇူလိုင် ၇ ရက် ဒီနေ့မနက်က ထပ်မံ လှုပ်ရှားသွားတယ်လို့ မိုးဇလဌာနက ထုတ်ပြန်ပါတယ်။
ဒီနေ့မနက် ၁၁ နာရီ၊ ၂၈ မိနစ်၊ ၂၉ စက္ကန့်အချိန်လောက်က တောင်ကြီးမြေငလျင်စခန်းမှ အရှေ့-အရှေ့မြောက်ဘက် ၅၂ မိုင်ခန့်ကွာဝေးတဲ့ မြန်မာပြည်တွင်း နမ့်စန်မြို့ရဲ့ အရှေ့-အရှေ့မြောက်ဘက် ၆ မိုင် ခန့်အကွာ အနက် ၇ ကီလိုမီတာကို ဗဟိုပြုပြီး မြေငလျင်လှုပ်သွားတာလို့ ဆိုပါတယ်။
ဒီမနက် ၆ နာရီ၊ ၅၃ မိနစ်ကျော်လောက်ကလည်း နမ့်စန်မြေငလျင်စခန်းမှ တောင်ဘက် ၃၈ မိုင်ခန့်ကွာဝေးတဲ့ လင်းခေးမြို့ရဲ့ အနောက်ဘက် ၁၂ မိုင်ခန့်အကွာ ဗဟိုပြုပြီး အင်အားရစ်ချ်တာ စကေး ၃ ဒသမ ၇ အဆင့်ရှိ ငလျင်လှုပ်ခတ်သွားခဲ့ပါတယ်။
ဒါ့အပြင် ဇွန်လ ၆ ရက် ညနေ ၄ နာရီကျော်လောက်ကလည်း နမ့်စန်မြို့အနီး မြောက်ဘက် ၅ မိုင်ခန့်အကွာမှာလည်း အင်အားရစ်ချ်တာ စကေး ၃ ဒသမ ၇ အဆင့်ရှိ အင်အားအနည်းငယ်ရှိ မြေငလျင်တခုလှုပ်ခတ်ခဲ့ပါတယ်။
အခုရက်ပိုင်းအတွင်း မြန်မာပြည်တွင်း ရန်ကုန်တိုင်း၊ လှိုင်မြို့နယ်နဲ့ မကွေးတိုင်း သရက်မြို့နယ်တွေမှာလည်း အင်အားအနည်းငယ်ရှိ မြေငလျင်တွေ ဆက်တိုက် လှုပ်ခတ်သွားပါတယ်။
အဆိုပါ မြေငလျင်တွေကြောင့် လူတွေထိခိုက်တာနဲ့ အဆောက်အဦတွေ ပျက်စီးမှု သတင်းတွေကတော့ မရရှိပါဘူး။
ရှမ်းပြည်နယ်တောင်ပိုင်း၊ နမ့်စန်မြို့အခြေစိုက် အလွတ်တန်း သတင်းထောက်ဟောင်း ကိုသန်းစိုးအောင်ကို စစ်ကောင်စီက မတ်လ ၇ ရက်၊ ညပိုင်းမှာ သူရဲ့နေအိမ်ကနေ လာရောက်ဖမ်းဆီးသွားခဲ့တယ်လို့ နီးစပ်သူတွေက ပြောပါတယ်။
အကြမ်းဖက်စစ်ကောင်စီတပ်က သတင်းထောက်ဟောင်း ကိုသန်းစိုးအောင်ကို အကြမ်းဖက်မှုတိုက်ဖျက်ရေး ဥပဒေပုဒ်မ- ၅၂ နဲ့ အမှုဖွင့်ထားလို့လည်း ပြောပါတယ်။
"ကိုသန်းစိုးအောင်ကို မတ်လ ၇ ရက်နေ့ညက သူရဲ့နေအိမ်မှာလာဖမ်းသွားတယ်။ သူကို စစ်ကောင်စီက အမှုဖွင့်ထားတယ်"လို့ သူ့ရဲ့ မိတ်ဆွေတဦးက ပြောပါတယ်။
စစ်အာဏာသိမ်းပြီးနောက်ပိုင်း ရှမ်းပြည်နယ်အခြေစိုက် သတင်းမီဒီယာသမား ၅ ယောက်ကို စစ်ကောင်စီက မတရားဖမ်းဆီးထားပါတယ်။
ဖမ်းဆီးခံရသူတွေကတော့ ရှမ်းပြည်နယ်တောင်ပိုင်းအခြေစိုက် ကမ္ဘောဇတိုင်းသတင်းဌာနက ၄ ဦးနဲ့ သံလွင်သွေးချင်းက ၁ ဦးတို့ကို ထောင်ဒဏ်တွေ အသီးသီးချထားပြီး ရှမ်းပြည်နယ်မြောက်ပိုင်းအခြေစိုက် ရွှေဖီမြေသတင်းဌာနက သတင်းသမား ၁ ဦးကတော့ အမှုရင်ဆိုင်နေရဆဲ ဖြစ်ပါတယ်။
