ဖင်လန်နိုင်ငံဟာ ရုရှားခရီးသွားတွေကို နယ်စပ်ဝင်ခွင့် ပိတ်ပစ်လိုက်တော့မှာဖြစ်ကြောင်း စက်တင်ဘာ ၂၉ ရက်ကပြောကြားပါတယ်။
ယူကရိန်းစစ်ပွဲထဲ လိုက်ပါစစ်မှုထမ်းရမှာကို ရှောင်ရှားဖို့ ကြိုးပမ်းနေတဲ့ရုရှားနိုင်ငံသား ထောင်ပေါင်းများစွာအတွက် ဥရောပသမဂ္ဂဆီ ကုန်းတွင်းတိုက်ရိုက် နောက်ဆုံးလမ်းကြောင်းဖြစ်တဲ့ ဖင်လန်နယ်စပ်ကို ပိတ်ပစ်လိုက်တာလည်း ဖြစ်ပါတယ်။
မနေ့က ဗာလီမာနယ်စပ်ဖြတ်ကျော်ဂိတ်မှာ ကားတွေ တဖွဲဖွဲဝင်ရောက်လာခဲ့ပြီး အခုဆောင်ရွက်ချက်ကြောင့် နယ်စပ်ဖြတ်ကျော် သွားလာမှု သိသိသာသာ ကျဆင်းသွားနိုင်ကြောင်း အစိုးရက ပြောပါတယ်။
ဖင်လန်နိုင်ငံကို ခရီးသွားရည်ရွယ်ချက်နဲ့ ရုရှားနိုင်ငံသားတွေ ဝင်ရောက်လာမှုဟာ ဖင်လန်ရဲ့ နိုင်ငံတကာဆက်ဆံရေးကို အန္တရာယ်ဖြစ်စေတယ်လို့ နိုင်ငံခြားရေးဝန်ကြီး ပက်ကာ ဟားဗစ်စ်တို က သတင်းစာရှင်းလင်းပွဲမှာ ပြောကြားခဲ့ပါတယ်။
ဒီလိုဆုံးဖြတ်လိုက်ရတာကတော့ ဖင်လန်နိုင်ငံနဲ့ ဖင်လန်ကနေတဆင့် တခြား ဥရောပ Schengen နိုင်ငံတွေဆီ ဖြတ်ကျော်သွားရောက်နေတဲ့ ရုရှားခရီးသွားလုပ်ငန်းကို ရပ်တန့်ဖို့ဖြစ်ကြောင်း သူက ပြောပါတယ်။
မိသားစုလိုက် လည်ပတ်ခွင့်အပြင် အလုပ်လုပ်ခွင့်နဲ့ ကျောင်းတက်ခွင့်ကို ဝင်ခွင့်ပေးနေဆဲ ဖြစ်ကြောင်း သူက ပြောပါတယ်။
ဒီပိတ်ရက်အတွင်း ဖင်လန်နိုင်ငံကို နယ်စပ်ဖြတ်ကျော်ဝင်ရောက်လာတဲ့ ရုရှားနိုင်ငံသား ၁၇,၀၀၀ နီးပါး ရှိပြီး အရင်တစ်ပတ်ကထက် ၈၀ ရာခိုင်နှုန်းမြင့်တက်လာကြောင်း ဖင်လန်အာဏာပိုင်တွေက ပြောပါတယ်။
