မန္တလေးတိုင်း၊ ကျောက်ဆည်ခရိုင်၊ ကူမဲမြို့ ရန်ကုန် - မန္တလေးလမ်းဟောင်းမှာ စစ်ကောင်စီလက်အောက်ခံ ရဲတပ်ဖွဲ့ဝင်တယောက်ကို သုတ်သင်ရှင်းလင်းခဲ့တယ်လို့ ကျောက်ဆည်ခရိုင်ကာကွယ်ရေးတပ်ဖွဲ့(K.D.D.F)က ထုတ်ပြန်ပါတယ်။
ဇူလိုင် ၁၄ ရက် မနက် ၉ နာရီ ခွဲဝန်းကျင်က ကူမဲမြို့၊ ရန်ကုန် - မန္တလေးလမ်းဟောင်းပေါ်မှာ ယူနီဖောင်းဝတ်ပြီး ဆိုင်ကယ်နဲ့ သွားလာနေတဲ့ စစ်ကောင်စီတပ်ဖွဲ့ဝင် ရဲတယောက်ကို ပူးပေါင်းမဟာမိတ်အဖွဲ့က သေနတ်နဲ့ ပစ်ခတ် ရှင်းလင်းခဲ့ရာ နေရာမှာတင် သေဆုံးသွားတယ်လို့ သိရပါတယ်။
ပစ်ခတ်ခံရတဲ့ ရဲတပ်ဖွဲ့ဝင်ဟာ ကူမဲမြို့ ရဲစခန်းမှာ တာဝန်ကျတဲ့ နယ်ထိန်းရဲတပ်ကြပ်ကြီး လှမိုးခိုင်ဖြစ်ပြီး ကူမဲမြို့ အနောက်ဘက်ရှိ သာလွန်ကျေးရွာမှာ ဂိတ်ချပြီးပိုက်ဆံတောင်းနေတဲ့သူပါ။
သေနတ်နဲ့ သေချာပစ်ခတ်ခဲ့လို့ နေရာမှာတင် သေသွားတယ်လို့ ကျောက်ဆည်ခရိုင်ကာကွယ်ရေးတပ်ဖွဲ့ ( K.D.DF.) တာဝန်ရှိသူက ပြောပါတယ်။
