မွန်ပြည်နယ် ရေးမြို့အဏ္ဏဝါနန္ဒရပ်ကွက်ပိုင် နယ်ထိန်းရဲတပ်ဖွဲ့ဝင် ကိုဟိန်းသူရကို နန္ဒာရပ်ရေခဲစက်နားမှာ ဇန်နဝါရီ ၂၁ ရက် ညနေ ၃ နာရီလောက် ရေးဘီးလူးအဖွဲ့က ပစ်ခတ်ရှင်းလင်း လိုက်တယ်လို့ ရေးဘီးလူးအဖွဲ့ခေါင်းဆောင်က ပြောပါတယ်။
လုံခြုံရေးတွေ တင်းကြပ်ထားတဲ့ကြားက အမှတ် ၁၉ စစ်ဆင်ရေးကွပ်ကွဲမှုဌာနချုပ်နဲ့လည်း ၅ ဖာလုံ လောက်သာဝေးတဲ့နေရာ မြို့ပေါ်ရပ်ကွက်မှာ နယ်ထိန်းရဲက ဆိုင်ကယ်နဲ့ နယ်မြေသတင်း စုံစမ်းနေစဥ်မှာ လက်နက်ငယ်နဲ့ ၁၆ ချက်လောက် ပစ်ခတ်လိုက်တယ်လို့ ရေးဘီးလူးအဖွဲ့ ခေါင်းဆောင်က ပြောပါတယ်။
ဒေသခံတယောက်က “နယ်ထိန်းရဲတယောက် ပစ်ခတ်ခံရအပြီးမှာ အမှတ် ၁၉ စစ်ဆင်ရေး ကွပ်ကွဲမှုဌာနချုပ်က လက်နက်ကြီးနဲ့ ၁၀ ချက်လောက်ပစ်တယ်။ ပြီးတော့ ကျောင်းရွာ အခြေစိုက် တပ်ရင်းဘက်ကလည်း ၃ ချက်လောက် လှမ်းပစ်တယ်။ လက်နက်ကြီးကျည်က ကျုံလောင်းရွာ ဟောင်း ကျေးရွာဘက်မှာ ကျရောက်ပေါက်ကွဲသလို ထိခိုက်ဒဏ်ရာရတာတွေတော့ မသိရ သေးဘူး” လို့ ဆိုပါတယ်။
စစ်ကောင်စီတပ်ဟာ မြို့ဝင်အထွက်အားလုံးကို ပိတ်ဆို့စစ်ဆေးနေပြီး ပုံမှန်သွားလာနေကြတဲ့ သူတွေတောင် အစစ်ဆေးခံရတယ်လို့ စျေးသည်တယောက်က ပြောပါတယ်။
ရေးဘီးလူးအဖွဲ့ဟာ ကျုံလောင်းရွာဟောင်းကျေးရွာကို ထိန်းချုပ်ထားသလို ပြီးခဲ့တဲ့လတွေက ရေး-ထားဝယ်ကားလမ်းမကြီးပေါ်မှာ ရဲစခန်းမှူးအပါဝင်ရဲတပ်ဖွဲ့ဝင် ၃ ယောက်ကို ကားနဲ့ လာ နေစဥ် ကြားဖြတ်တိုက်ခိုက်ခဲ့ပါတယ်။
မန္တလေးတိုင်း၊ ဝမ်းတွင်းမြို့ မြို့မရဲစခန်းရဲ့ နယ်ထိန်းခေါင်းဆောင် ရဲအုပ် စောနိုင်ဦးကို အောက်တိုဘာ ၉ ရက်ညက အမှတ် ၁ ရပ်ကွက်အုပ်ချုပ်ရေးရုံးအနီးမှာ သေနတ်နဲ့ ပစ်သတ်ခဲ့တယ်လို့ ဝမ်းတွင်းမြို့နယ်တော်လှန်ရေးအင်အားစု (WTRF)က ထုတ်ပြန်ပါတယ်။
စစ်ကောင်စီရဲ့ ဒေါက်တိုက် ယာယီစခန်းမှူးတာဝန်ယူထားသူဖြစ်တဲ့ ရဲအုပ် စောနိုင်ဦး(ခ)ဗိုလ်စောကို သေနတ်နဲ့ ၆ ချက်ပစ်ပြီး သတ်ခဲ့တာလို့ ဝမ်းတွင်းမြို့နယ် တော်လှန်ရေးအင်အားစု(Wundwin Township Revolution Force-WTRF) ကဆိုပါတယ်။
ဝမ်းတွင်းဒေသခံတဦးကလည်း “သေနတ်သံတွေ ကြားရတယ်၊ သွားတော့မကြည့်ရဲဘူး။ ပြောသံကြားတာတော့ နယ်ထိန်းခေါင်းဆောင် ပစ်သတ်ခံရတာ၊ နေရာမှာတင် သေဆုံးသွားတယ်တဲ့။”လို့ ပြောပါတယ်။
ပစ်ခတ်မှုဖြစ်ပွားပြီးနောက် အဲနေရာအနီးတဝိုက်မှာ စစ်ကောင်စီတပ်ဖွဲ့တွေက ရှာဖွေစစ်ဆေးနေတယ်လို့ သိရတယ်။ အဆိုပါပစ်ခတ်မှုနဲ့ ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။
