ဘိုင်ယန်မြူးနစ်အသင်းဟာ နည်းပြနာဂယ်စ်မန်းကို ထုတ်ပယ်လိုက်ပြီးနောက် ချဲလ်ဆီးနည်းပြ ဟောင်း သောမက်စ်တူချယ်ကို အစားထိုးခန့်အပ်ခဲ့ပါတယ်။
ဘိုင်ယန်မြူးနစ်ဟာ နောက်ဆုံး ၁၀ ရာသီဆက်တိုက် ဘွန်ဒက်စ်လီဂါချန်ပီယံဖြစ်ခဲ့ပေမဲ့ အခုနှစ်ရာသီမှာ ဒေါ့မွန်အသင်းနဲ့ တစ်မှတ် အကွာ အဆင့်နှစ်နေရာကိုရောက်ရှိနေတာပါ။
ဒီအခြေအနေကြောင့် နာဂယ်စ်မန်းကိုထုတ်ပယ်ဖို့ ဘိုင်ယန်အသင်းတာဝန်ရှိသူတွေက ဆုံးဖြတ်ခဲ့ပြီး ဒေါ့မွန်၊ ပီအက်စ်ဂျီနဲ့ ချဲလ်ဆီးနည်းပြဟောင်း တူချယ်ကို ၂၀၂၅ ခုနှစ်အထိ စာချုပ်နဲ့ခေါ်ယူခန့်အပ်ခဲ့တာပါ။
နာဂယ်စ်မန်းကို နှစ်ရှည်ကိုင်တွယ်စေဖို့ ရည်ရွယ်ခဲ့ပေမဲ့ ကမ္ဘာ့ဖလားပြိုင်ပွဲအပြီးမှာ စွမ်းဆောင်ရည်ကျဆင်းပြီး စွဲဆောင်မှုရှိတဲ့ကစားပုံလည်း မရှိခဲ့တာကြောင့် လမ်းခွဲဖို့ ဆုံးဖြတ်ခဲ့တာဖြစ်ကြောင်း ဘိုင်ယန်အမှုအောင်အရာရှိချုပ် အိုလီဗာခမ်းက ပြောပါတယ်။
ဘိုင်ယန်နည်းပြသစ်ဖြစ်လာတဲ့ သောမက်စ်တူချယ်ဟာ လာမယ့် ဧပြီ ၁ ရက်မှာ အသင်းဟောင်း ဒေါ့မွန်နဲ့ပွဲကို ဘိုင်ယန်နည်းပြဘဝပထမဆုံးပွဲစဉ်အဖြစ် တာဝန်ယူသွားရမှာဖြစ်ပါတယ်။
ဘွန်ဒက်စ်လီဂါထိပ်သီးကလပ် ဘိုင်ယန်မြူးနစ်အသင်းဟာ လက်ရှိနည်းပြ ဂျူလီယန် နာဂယ်စ်မန်းကို ထုတ်ပယ်ပြီး ချဲယ်လ်ဆီးနည်းပြဟောင်း သောမတ်စ် တူချယ်နဲ့ အစားထိုးမှာ ဖြစ်တယ်လို့ မတ်လ ၂၄ ရက်က ဂျာမန်မီဒီယာတွေမှာ သတင်းဖော်ပြထားပါတယ်။
အမှတ်ပေးဇယား ထိပ်ဆုံးတနေရာအတွက် ဒေါ့မွန်အသင်းနဲ့ ယှဉ်ပြိုင်ကစားရမယ့် ပွဲစဉ်မတိုင်ခင် ရက်အနည်းငယ်အလိုမှာပဲ နာဂယ်စ်မန်းကို ရာထူးက ထုတ်ပယ်လိုက်ပြီ ဖြစ်ကြောင်း ဘိုင်ယန်မြူးနစ်အသင်းအနေနဲ့ အသိပေးခဲ့တယ်လို့ ဆိုပါတယ်။
ဘိုင်ယန်မြူးနစ်အသင်းဘက်က ဒီဆုံးဖြတ်ချက်အပေါ် တရားဝင်အတည်ပြုခြင်း မရှိသေးပေမဲ့ ချဲလ်ဆီး၊ ပီအက်စ်ဂျီနဲ့ ဒေါ့မွန်အသင်းတွေရဲ့ နည်းပြဟောင်းဖြစ်သူ သောမတ်စ် တူချယ်ကို ခေါ်ယူဖို့ လျာထားတယ်ဆိုပြီး ဂျာမနီနိုင်ငံမှာ သတင်းတွေ ကျယ်ကျယ်ပြန့်ပြန့် ထွက်ပေါ်နေပါတယ်။
အသက် ၃၅ နှစ်အရွယ်သာရှိနေတဲ့ နာဂယ်စ်မန်းဟာ ၂၀၂၁ ခုနှစ် နွေရာသီမှာ ဘိုင်ယန်မြူးနစ်အသင်းကို စတင်ကိုင်တွယ်ခဲ့တာဖြစ်ပြီး မနှစ်တုန်းကလည်း ဘွန်ဒက်စ်လီဂါ ချန်ပီယံဆုကို အရယူပေးနိုင်ခဲ့ပါတယ်။ ဒါပေမဲ့ ဒီနှစ်ဘောလုံးရာသီမှာတော့ ဒေါ့မွန်အသင်းနဲ့ တမှတ်အကွာက ဒုတိယနေရာမှာ ရပ်တည်နေပြီး ချန်ပီယံလိဂ်ပြိုင်ပွဲမှာလည်း ကွာတားဖိုင်နယ်အဆင့်ကို ရောက်ရှိနေပြီ ဖြစ်ပါတယ်။
လာမယ့် ဧပြီ ၁ ရက်နေ့မှာ ဒေါ့မွန်အသင်းနဲ့ ယှဉ်ပြိုင်ကစားဖို့ ရှိနေတဲ့ ဘိုင်ယန်မြူးနစ်အသင်းဟာ ချန်ပီယံလိဂ်ကွာတားပွဲစဉ်ကိုတော့ ဧပြီ ၁၂ ရက်နေ့မှာ မန်စီးတီးအသင်းနဲ့ ရင်ဆိုင်သွားရမှာ ဖြစ်ပါတယ်။
