ဘဏ္ဍာရေးဆိုင်ရာလုပ်ငန်း စည်းကမ်းထိန်းသိမ်းရေးအဖွဲ့ (Financial Action Task Force) က မြန်မာနိုင်ငံကို နာမည်ပျက်စာရင်းတင်သွင်းဖို့ ပြင်ဆင်နေတာကြောင့် ဒီသက်ရောက်မှုက ပြည်ပရင်းနှီးမြှုပ်နှံမှုလုပ်ငန်းတွေ ထွက်ခွာဖို့အတွက် အချက်ပေးခေါင်းလောင်းသံ ထိုးလိုက်တာလို့ သုတေသီတွေက ပြောပါတယ်။

ဘဏ္ဍာရေးဆိုင်ရာလုပ်ငန်း စည်းကမ်းထိန်းသိမ်းရေးအဖွဲ့ (FATF) ဟာ ပြင်သစ်နိုင်ငံ ပဲရစ်မြို့မှာ အခြေစိုက်ပါတယ်။

အဆိုပါအဖွဲ့ကို ၁၉၈၉ ခုနှစ်က ပဲရစ်မြို့မှာ ကျင်းပခဲ့တဲ့ G-7 ထိပ်သီးအစည်းအဝေးမှာ ငွေကြေးခဝါချမှု၊ အကြမ်းဖက်လုပ်ငန်းတွေအတွက် ငွေကြေးရှာဖွေသုံးစွဲမှု အစရှိတဲ့ ကမ္ဘာ့ဘဏ္ဍာရေးစနစ်ကို ခြိမ်းခြောက်လာနိုင်တဲ့ မသမာမှုတွေကို တိုက်ဖျက်ဖို့ ရည်ရွယ်ပြီး G-7 ၇ နိုင်ငံက စတင်ဖွဲ့စည်းခဲ့တာ ဖြစ်ပါတယ်။ လက်ရှိမှာတော့ ဥရောပသမဂ္ဂ အပါအဝင် အဖွဲ့ဝင်နိုင်ငံပေါင်း ၄၀ ရှိပြီ ဖြစ်ပါတယ်။

အဲဒီအဖွဲ့အစည်းက မြန်မာနိုင်ငံကို နာမည်ပျက်စာရင်းသွင်းမယ့် အဆိုပြုချက်ကိုတော့ လာမယ့် အောက်တိုဘာလ ပြင်သစ်နိုင်ငံ ပဲရစ်မြို့မှာ ကျင်းပမယ့် ဆွေးနွေးပွဲမှာ သဘောတူ ဆုံးဖြတ်ချက်ချမယ့် အလားအလာတွေ ရှိနေတယ်လို့ ဒီဖြစ်ရပ်နဲ့နီးစပ်တဲ့ အစိုးရအရာရှိတွေက ဆိုပါတယ်။

စီးပွားရေးသုတေသီတယောက်က “သက်ဆိုင်ရာ တိုင်းပြည်တခုကို သွားမယ်ဆိုရင် သူ့ရဲ့ rating ဘယ်လောက်ရှိလဲဆိုတာကို နိုင်ငံတကာမှ လွတ်လပ်တဲ့အဖွဲ့အစည်းတွေရဲ့ သုံးသပ်ချက်တွေကို ရင်းနှီးမြှုပ်နှံသူတွေက ကြည့်ကြတယ်။ ကြည့်တဲ့အခါ စွန့်စားရမှုတွေ များနေတယ်ဆိုရင် ရင်းနှီးမြှုပ်နှံမှုတွေကို အတားအဆီး ဖြစ်စေတယ်။ နောက်တချက်က ပြည်တွင်းမှာ ရောက်ပြီးသား အဖွဲ့အစည်းတွေ သူတို့ကိုလည်း သတိပေးလိုက်သလို ဖြစ်စေတယ်။ ဒီနိုင်ငံကတော့ ငွေရေးကြေးရေးနဲ့ပတ်သက်ပြီး စွန့်စားမှု အန္တရာယ်များနေပြီဆိုရင် နိုင်ငံခြားက အသစ်လာမယ့် ရင်းနှီးမြှုပ်နှံမှုတွေကို တွန့်ဆုတ်သွားစေမယ်။ ပြည်တွင်းမှာရှိတဲ့ နိုင်ငံခြားသား လုပ်ငန်းရှင်တွေအနေနဲ့က စီးပွားရေးဆက်လုပ်ဖို့ အများကြီး တွေဝေသွားစေတယ်။ နောက် ထိနိုင်တဲ့အချက်က ကုန်သွယ်ရေးပေါ့။ ဘာလို့လဲဆို ဒီနိုင်ငံက အယုံအကြည် မရှိဘူးဆိုရင် မြန်မာနိုင်ငံနဲ့ ကုန်သွယ်ရေးလုပ်တဲ့အခါ ငွေပေးချေတဲ့ payment တိုင်းမှာ လာထိတော့မှာ။ ဒီအချက်တွေက အဓိကတွေ့ကြုံရမယ့် ပြဿနာတွေပဲ” လို့ ဒီဗွီဘီကို ပြောပါတယ်။

စစ်ကောင်စီအနေနဲ့ အခုလို တွေ့ကြုံလာမယ့် ဘဏ္ဍာရေးပြဿနာကို အစားထိုး နည်းလမ်းတွေနဲ့ ဖြေရှင်းဖို့ လုပ်ဆောင်လာနိုင်ပေမဲ့ အကန့်အသတ်များစွာနဲ့ ရင်ဆိုင်ရဖို့ ရှိပါတယ်။

ဘဏ္ဍာရေးနဲ့ ငွေကြေးဆိုင်ရာ သုတေသီတယောက်ကလည်း “ဟိုတလောကဆိုရင် ကျနော်တို့ ကြားတာက ဒေါ်လာသုံးတဲ့နိုင်ငံတွေက ဒေါ်လာကို အသုံးပြုပြီး အနိုင်ကျင့်တယ်လို့ စစ်ကောင်စီဘက်က ပြောတာမျိုးတွေ ရှိလာတယ်။ အဲ့တော့ ဒေါ်လာမသုံးတဲ့ နည်းလမ်းတွေ စဉ်းစားလာမှာပေါ့။ အခုဆိုရင် ရုရှားကို သူ အားကိုးလာတယ်။ တရုတ်နဲ့ဆိုရင် တရုတ် ယွမ်ကို အားကိုးမယ်။ ထိုင်းနဲ့ဆိုရင် ထိုင်းဘတ်ကို အားကိုးမယ်။ တနည်းအားဖြင့် ဒေါ်လာကို မသုံးရမယ့် နည်းလမ်းမျိုး သူတို့ရှာမယ်ပေါ့။ ဒါပေမဲ့ ပြဿနာကို ဘယ်လောက် ကုစားနိုင်မလဲ ဆိုတာက အဓိကစိန်ခေါ်မှုပဲ။ ဘာကြောင့်လဲဆို ကမ္ဘာ့စီးပွားရေးမှာ ဘယ်ငွေကြေးက ဦးဆောင်နေလဲပေါ့။ ကမ္ဘာမှာ ဦးဆောင်နေတာက ဒေါ်လာကို ဘယ်ငွေကြေးမှ ဒီကနေ့အထိ မယှဉ်နိုင်သေးဘူးနော်။ နံပါတ်-၂ က ယူရိုငွေ။ အဲဒီတော့ ရုရှားက ဘယ်အဆင့်မှာရှိလဲဆိုရင် အဆင့် ၁၁ မှာသာရှိတယ်။ ပြီးတော့ သူ့ရဲ့ ရုရှားငွေသုံးတဲ့နိုင်ငံက လက်ချိုးရေတွက်လို့ ရတယ်။ အဲဒီတော့ သူ့ထက်စာရင် တရုတ်ယွမ်က နည်းနည်းကျယ်ပြန့်သေးတယ်။ ဒါပေမဲ့ အဲဒါတွေနဲ့ သွားလုပ်ရင်တော့ မြန်မာပြည်ဟာ နိုင်ငံတကာက လက်ခံတဲ့ ငွေကြေးကို မသုံးစွဲဘဲနဲ့ ကိုယ်သုံးချင်တဲ့ ငွေကြေးပဲ သုံးမယ်ဆိုရင် နိုင်ငံတကာနဲ့ အပေးအယူလုပ်လို့ မရတော့ဘူး” လို့ ဒီဗွီဘီကို ပြောပါတယ်။

FATF အဖွဲ့နဲ့ အဆက်အသွယ်ရှိတဲ့ အာရှဒေသမှ အစိုးရအရာရှိတယောက်က မြန်မာစစ်အာဏာရှင်တွေဘက်က အာဆီယံအပေါ် သဘောထားနဲ့ လတ်တလော တုံ့ပြန်မှုတွေကို ကြည့်ရင် FATF အဖွဲ့ဝင်နိုင်ငံတွေက မြန်မာနိုင်ငံကို နာမည်ပျက် စာရင်းသွင်းဖို့ သဘောတူကြမယ့် အလားအလာ ရှိနေတယ်လို့ ဆိုပါတယ်။

ဒီ့အပြင် အဆိုပါပုဂ္ဂိုလ်က ဆက်လက်ပြီး အဖွဲ့ဝင်နိုင်ငံတွေအားလုံးက သဘောတူညီကြရင်တော့ လက်ရှိဥက္ကဋ္ဌဖြစ်နေတဲ့ စင်ကာပူကလည်း အဖွဲ့ဝင်နိုင်ငံတွေရဲ့ သဘောတူညီချက်ကို ငြင်းနိုင်မှာမဟုတ်ဘူးလို့ ဆိုပါတယ်။ ဒါပေမဲ့ တဖက်မှာလည်း ခြွင်းချက်အနေနဲ့ အားလုံးရဲ့ သဘောတူညီချက်ကို ပယ်ဖျက်ဖို့အရေးမှာ သဘောမတူတဲ့နိုင်ငံ အနည်းဆုံး ၃ နိုင်ငံရှိဖို့ လိုပါတယ်။

လက်ရှိမှာတော့ ဘဏ္ဍာရေးဆိုင်ရာလုပ်ငန်း စည်းကမ်းထိန်းသိမ်းရေးအဖွဲ့ (Financial Action Task Force) က နာမည်ပျက်စာရင်းသတ်မှတ်ထားတဲ့ နိုင်ငံတွေက မြောက်ကိုရီးယားနဲ့ အီရန် နှစ်နိုင်ငံတည်းသာ ရှိပါတယ်။

ငွေကြေးခဝါချမှု၊ အကြမ်းဖက်လုပ်ငန်းတွေအတွက် ငွေကြေးရှာဖွေသုံးစွဲမှုတွေကြောင့် မြန်မာနိုင်ငံဟာ ကမ္ဘာ့ဘဏ္ဍာရေးရာဇဝတ်မှုစောင့်ကြည့်အဖွဲ့ရဲ့ နာမည်ပျက်စာရင်းသွင်းတာ ခံရပြီး စစ်အာဏာရှင်တို့ရဲ့ ပြိုလုလုဘဏ္ဍာရေးနဲ့ငွေကြေးဆိုင်ရာ သိက္ခာဒေါက်တိုင်ကို ပြင်းထန်စွာ ထိုးနှက်ခံရမယ့် အလားအလာရှိနေပါတယ်။

ဖွံ့ဖြိုးတိုးတက်ပြီးနိုင်ငံတွေရဲ့ အစိုးရချင်းချိတ်ဆက်ကာဆောင်ရွက်နေတဲ့ ပြင်သစ်နိုင်ငံ ပဲရစ်မြို့ အခြေစိုက်ဘဏ္ဍာရေးလုပ်ငန်းစည်းကမ်းထိန်းသိမ်းရေးအဖွဲ့ (FATF, Financial Action Task Force) ဟာ ၁၉၈၉ ခုနှစ်က ပဲရစ်မြို့မှာ ကျင်းပခဲ့တဲ့ G7 ထိပ်သီးအစည်းအဝေးမှာ ငွေကြေးခဝါချမှု၊ အကြမ်းဖက်လုပ်ငန်းများအတွက်ငွေကြေးရှာဖွေသုံးစွဲမှု အစရှိတဲ့ ကမ္ဘာ့ဘဏ္ဍာရေးစနစ်ကို ခြိမ်းခြောက်လာနိုင်တဲ့ မသမာမှုတွေကို တိုက်ဖျက်ဖို့ G7 ခုနှစ်နိုင်ငံက စတင်ဖွဲ့စည်းခဲ့တာဖြစ်ပြီး အခုဆိုရင် ဥရောပသမဂ္ဂအပါအဝင် အဖွဲ့ဝင်နိုင်ငံပေါင်း ၄၀ ရှိပြီဖြစ်ပါတယ်။

မြန်မာနိုင်ငံကို နာမည်ပျက်စာရင်းသွင်းမယ့်အဆိုပြုချက်ကို အောက်တိုဘာလ ပဲရစ်မြို့မှာကျင်းပမယ့် ဆွေးနွေးပွဲမှာ သဘောတူဆုံးဖြတ်ချက်ချမယ့် အလားအလာရှိနေတယ်လို့ ဒီဖြစ်ရပ်နဲ့ နီးစပ်တဲ့အစိုးရ အရာရှိတွေက ပြောပါတယ်။ 

အခုချိန်ထိ FATF အဖွဲ့ရဲ့ နာမည်ပျက်စာရင်းမှာ မြောက်ကိုရီးယားနဲ့ အီရန်နှစ်နိုင်ငံတည်းသာ ရှိနေတာဖြစ်ပြီး အမည်ပျက်စာရင်းသွင်းခံလိုက်ရရင် မြန်မာနိုင်ငံမှာ နိုင်ငံခြားရင်းနှီးမြှုပ်နှံမှု ရဖို့ခက်ခဲနေတဲ့ စစ်ခေါင်းဆောင်အာဏာရှင်တွေရဲ့ ဘဏ္ဍာရေးကိုပိုပြီး ထိခိုက်နစ်နာစေတော့မှာဖြစ်တယ်လို့ ဆိုပါတယ်။ 

မြန်မာစစ်အာဏာရှင်တွေရဲ့ အာဆီယံအပေါ်သဘောထားနဲ့ လတ်တလောတုန့်ပြန်မှုတွေကို ကြည့်ရင် FATF အဖွဲ့ဝင်နိုင်ငံတွေက မြန်မာနိုင်ငံကို အမည်ပျက်စာရင်းသွင်းဖို့ သဘောတူကြမယ့်အလားအလာ ရှိနေတယ်လို့ FATF နဲ့ အဆက်အသွယ်ရှိတဲ့ အာရှပိုင်း အစိုးရအရာရှိတစ်ယောက်က ပြောပါတယ်။

ဆက်လက်ပြီး အဖွဲ့ဝင်နိုင်ငံတွေ အားလုံးက သဘောတူညီကြရင်တော့ လက်ရှိဥက္ကဋ္ဌဖြစ်နေတဲ့ စင်္ကာပူကလည်း အဖွဲ့ဝင်နိုင်ငံတွေရဲ့ သဘောတူညီချက်ကို ငြင်းနိုင်မှာမဟုတ်ဘူးလို့ ဆိုပါတယ်။ အားလုံးရဲ့သဘောတူညီချက်ကို ပယ်ဖျက်ဖို့တအတွက် သဘောမတူတဲ့ နိုင်ငံ အနည်းဆုံး ၃ နိုင်ငံရှိရမှာဖြစ်တယ်လို့ သိရပါတယ်။

နာမည်ပျက်စာရင်းသွင်းလိုက်ရင် နိုင်ငံခြားရင်းနှီးမြှုပ်နှံမှုတွေရဖို့ ပိုမိုခက်ခဲသွားမှာ ဖြစ်သလို နိုင်ငံတကာဘဏ်တွေနဲ့ မြန်မာနိုင်ငံက ဘဏ်တွေကြား ချိတ်ဆက်လုပ်ဆောင်မှုတွေ ပိုမိုခက်ခဲသွားတော့မှာ ဖြစ်ပါတယ်။ မြန်မာ့ကျပ်ငွေတန်ဖိုးဟာလည်း အာဏာသိမ်းပြီးနောက်ပိုင်း ငွေတန်ဖိုးအနည်းဆုံးမှတ်တမ်းကို အကြိမ်ကြိမ်ဆက်တိုက် ချိုးဖျက်လာခဲ့ပြီး ၆၀ ရာခိုင်နှုန်းအထိ ထိုးကျလာခဲ့တာဖြစ်သလု နောက်ထပ်လည်းကျဆင်းနိုင်ပါသေးတယ်။ မြန်မာနိုင်ငံမှာ ၂၀၁၁ ခုနှစ်တည်းက စတင်ဖွင့်လှစ်ခဲ့တဲ့ နိုင်ငံခြားတိုက်ရိုက် ရင်းနှီးမြှုပ်နှံမှုတွေဟာ ၂၀၂၁ ခုနှစ်မှာတော့ အနည်းဆုံးဖြစ်သွားခဲ့ပါတယ်။

လက်ရှိနိုင်ငံရေး ပဋိပက္ခတွေ၊ နိုင်ငံခြားရင်းနှီးမြှုပ်နှံသူတွေနဲ့ အရာရှိအရာခံတွေအပေါ် စစ်အာဏာရှင်တွေရဲ့ ရန်လိုမှုတွေ၊ မကြာခဏမီးပျက်တာတွေ၊ နိုင်ငံခြားငွေကို မြန်မာကျပ်ငွေနဲ့ အတင်းအကြပ်ဖိအားပေးလဲခိုင်းနေတာတွေကြောင့် မြန်မာနိုင်ငံအတွက် အရေးပါတဲ့ နိုင်ငံခြားရင်းနှီးမြှုပ်နှံမှုတွေနဲ့ ပိုမိုဝေးကွာစေခဲ့ပါတယ်။

မြန်မာနိုင်ငံရဲ့ အသားတင်ထုတ်ကုန်တန်ဖိုး (GDP) ဟာ ၂၀၂၁ ခုနှစ်မှ ၂၀ ရာခိုင်နှုန်းကျဆင်းခဲ့ပြီး ဒီနှစ်မှာတော့ ရပ်တန့်နေလိမ့်မယ်လို့ ကမ္ဘာ့ဘဏ်က ခန့်မှန်းထားပါတယ်။ နိုင်ငံတကာအလုပ်သမားအဖွဲ့ကလည်း ၂၀၂၁ ခုနှစ်အတွင်း မြန်မာနိုင်ငံမှာ အလုပ်အကိုင်ပေါင်း ၁ ဒသမ ၆ သန်းခန့် ဆုံးရှုံးခဲ့ရတယ်လို့ ခန့်မှန်းထားပါတယ်။

FATF က နာမည်ပျက်စာရင်းသွင်းလိုက်တာကြောင့် မြန်မာနိုင်ငံနဲ့ ပတ်သက်တဲ့ ဘဏ်အကောင့်တွေဖွင့်ဖို့နဲ့ ထိန်းသိမ်းထားဖို့အပြင် နိုင်ငံတကာငွေပေးချေမှုတွေလုပ်ဆောင်ဖို့ ပိုမိုခက်ခဲသွားမှာဖြစ်တယ်လို ရန်ကုန်မှာရှိနေတဲ့ ကူသန်းရောင်းဝယ်ရေးလုပ်ငန်းတွေရဲ့ အရာရှိကြီးတွေက ပြောပါတယ်။ ဘဏ်တွေနဲ့ ဘဏ္ဍာရေးဝန်ဆောင်မှုပေးတဲ့လုပ်ငန်းတွေဟာ ခက်ခဲများပြားတဲ့ စာရွက်စာတမ်းလုပ်ငန်းစဉ်တွေကို လုပ်မယ့်အစား မြန်မာနိုင်ငံနဲ့ ပတ်သက်တဲ့ ငွေပေးငွေယူလုပ်ငန်းတွေကို ရှောင်သွားကြတော့မှာသာဖြစ်တယ်လို့ ဆိုပါတယ်။ 

မြန်မာနိုင်ငံဗဟိုဘဏ်ရဲ့ လုပ်ငန်းဆောင်ရွက်ချက်အစီရင်ခံစာကို စစ်ကောင်စီက ဇူလိုင်လထဲမှာ FATF ကို တင်သွင်းမှာဖြစ်ပြီး ဩဂုတ်လထဲမှာ FATF က စစ်ဆေးသွားမှာဖြစ်ကြောင်းနဲ့ နာမည်ပျက်စာရင်းသွင်းခံရမယ့် အလားအလာများကြောင်း ဉရောပအစိုးရ အရာရှိတစ်ယောက်က ပြောပါတယ်။

ဆက်လက်ပြီး “ဗဟိုဘဏ်မှာသူတို့တာဝန်ပေးထားတဲ့လူတွေကိုကြည့်လိုက်ဗျာ၊ စစ်တပ်ကလူတွေ၊ အရင် နိုင်ငံတော်တည်ငြိမ်ရေးနဲ့ ဖွံ့ဖြိုးတိုးတက်ရေးကောင်စီက လူတွေလိုတောင် ဟန်ဆောင်ပန်ဆောင်နဲ့ မလုပ်နိုင်ကြဘူး၊ ဘာတွေဖြစ်နေလဲဆိုတာကို နားမလည်ကြဘူး” ဆိုပြီး ၂၀၁၁ ခုနှစ်အထိ နိုင်ငံတော်တည်ငြိမ်ရေးနဲ့ ဖွံ့ဖြိုးတိုးတက်ရေးကောင်စီ နာမည်နဲ့ အုပ်ချုပ်ခဲ့တဲ့ စစ်အာဏာရှင်တွေကို ရည်ညွှန်ပြီး သူကပြောပါတယ်။

ငွေကြေးဖာင်းပွမှုနှုန်း ၁၇ ဒသမ ၇ ရာခိုင်နှုန်းနဲ့ မြန်မာကျပ်ငွေတန်ဖိုး ၆၀ ရာခိုင်နှုန်းကျဆင်းလာပြီးနောက်မှာ မြန်မာစစ်ကောင်စီဟာ လျှပ်စစ်ကဏ္ဍတစ်ခုတည်းမှာတင် မြန်မာငွေ ၁၃၁ ဘီလီယံ ဒါမှမဟုတ် အမေရိကန် ဒေါ်လာ ၆၂ သန်း ဆုံးရှုံးနေရတယ်လို့ အစိုးရအကြံပေးဟောင်းဖြစ်သူ ဂီယိုလန်ဒီလောင်းဂ်ပြောပါတယ်။

ဆက်လက်ပြီး ဝန်ကြီးဌာနတွေကလည်း အကြွေးမပေးလို့ဆိုပြီး ဌာနတစ်ခုနဲ့တစ်ခု တရားဆွဲဖို့ပြင်ဆင်နေကြသလို အခြေခံအဆောက်အဦ ဆောက်လုပ်ရေးလုပ်ငန်းတွေအတွက် နိုင်ငံခြားငွေပမာဏ များများချေးယူထားကို စိုးရိမ်ပူပန်မှုတွေရှိနေကြောင်း ပြောပါတယ်။ မြန်မာငွေတန်ဖိုးနဲ့ စီးပွားရေးကိုတည်ငြိမ်အောင် ချက်ချင်းမလုပ်နိုင်ရင် အိမ်နီးချင်းနိုင်ငံတွေက အကြွေးတွေပြန်တောင်းလာကြမှာဖြစ်တယ်လို့လည်း သူကပြောပါတယ်။ 

နာမည်ပျက်စာရင်းသွင်းလိုက်မယ်ဆိုရင် နိုင်ငံတကာနဲ့ သိက္ခာရှိရှိ ဆက်သွယ်လုပ်ကိုင်နေကြတဲ့ ကူးသန်းရောင်းဝယ်ရေးလုပ်ငန်းတွေထိခိုက်လာပြီး စီးပွားရေးအသိုင်းအဝိုင်းတစ်ခုလုံးကို ရိုက်ခတ်လာမယ်လို့  အကြီးတန်းဘဏ်လုပ်ငန်းရှင်တစ်ဦး ပြောပါတယ်။