နိုက်ဂျာနိုင်ငံရဲ့ သမ္မတ မိုဟာမဒ် ဘက်ဇွန်ဟာ ဒီသီတင်းပတ် အစောပိုင်းက မြို့တော်ဝန် အပါအဝင် လူ ၆၉ ယောက် အသတ်ခံရတဲ့ ဘာနီဘန်ဂိုမြို့ကို နိုဝင်ဘာ ၆ ရက်က လာရောက်ကြည့်ရှု စစ်ဆေးပါတယ်။
ဘာနီဘန်ဂို မြို့တော်ဝန် ဦးဆောင်တဲ့ ကိုယ်စားလှယ်အဖွဲ့ဟာ နိုင်ငံအနောက်တောင်ပိုင်း မာလီနိုင်ငံနဲ့ နယ်စပ်နားက မြို့နဲ့ မိုင် ၃၀ အကွာမှာ လုပ်ကြံခံခဲ့ရတာပါ။
အဲဒီဒေသဟာ ဒီနှစ်အတွင်း ကျေးလက်ဒေသမှာ အရပ်သားရာချီကို သတ်ခဲ့တဲ့ အိုင်အက်စ် စစ်သွေးကြွတွေကို သစ္စာခံတဲ့ ဒေသခံ စစ်သွေးကြွတွေ ကြီးစိုးတဲ့ နယ်မြေလည်း ဖြစ်ပါတယ်။
လုပ်ကြံမှုအတွင်း လူ ၁၅ ယောက် ရှင်သန်ကျန်ရစ်ပြီး ရှာဖွေရေးလုပ်ငန်းတွေ ဆောင်ရွက်နေဆဲလို့ ပြည်ထဲရေးဝန်ကြီးက အစိုးရရုပ်သံကို ပြောပေမဲ့ ဒီလုပ်ရပ်အတွက် ဘယ်သူကမှ တာဝန်မခံပါဘူး။
သမ္မတကတော့ ဒေသတွင်း လုံခြုံရေး တိုးမယ်လို့ ဒေသခံတွေကို ပြောပါတယ်။
ဆင်းရဲမွဲတေပြီး ခြောက်သွေ့တဲ့ အနောက်အာဖရိက ဒေသထဲက နိုက်ဂျာ၊ မာလီနဲ့ ဘာကီနာဖှာဆို နိုင်ငံတွေမှာ လတ်တလော နှစ်တွေအတွင်း နယ်မြေထိန်းချုပ်နိုင်ရေး ကြိုးစားနေတဲ့ လက်နက်ကိုင် အုပ်စုတွေကြောင့် အကြမ်းဖက်မှု ထူပြောပါတယ်။
လက်နက်ကိုင်အုပ်စုတချို့ကတော့ အယ်လ်ကိုင်းဒါးတွေနဲ့ ပတ်သက်နေတာပါ။
၂၀၂၁ ခုနှစ်ထဲ နိုင်ငံအနောက်တောင်ပိုင်းမှာ အစ္စလာမ္မစ် အုပ်စုတွေက အရပ်သားတွေကို တိုက်ခိုက်လို့ လူ အယောက် ၅၃၀ ကျော် သေဆုံးခဲ့ပြီး မနှစ်ကထက် စာရင် ငါးဆကျော် တိုးလာတယ်လို့ နိုင်ငံရေးအကြမ်းဖက်မှုတွေကို သတင်းအချက်အလက် စုဆောင်းနေတဲ့ Armed Conflict Location & Event Data Project (ACLED) က ပြောထားပါတယ်။
