နိုက်ဂျာနိုင်ငံနယ်စပ် မာရာဒီဒေသတောင်ပိုင်းမှာ လက်တူးရွှေတွင်း ပြိုကျလို့ လူ ၁၈ ယောက်ထက်မနည်း သေဆုံးပြီး အရေအတွက်ပိုတိုးလာနိုင်တယ်လို့ ဒန်အစ်ဆာ မြို့တော်ဝန် အဒါမောင်ဂွေရိုက နိုဝင်ဘာ ၈ ရက်မှာ ပြောပါတယ်။
မာရာဒီဒေသ အုပ်ချုပ်ရေးမှူးက တနင်္လာနေ့မှာ တွင်းပြိုရာ နေရာကို လာရောက်ကြည့်ရှုပြီး လုပ်ငန်းခွင်အတွင်း လူတွေအတွက် ပိုကောင်းတဲ့ အလုပ်အကိုင် အခြေအနေ ဖန်တီးပေးမယ်လို့ ကတိပြုခဲ့ပါတယ်။
“အလုပ်ရှာနေတဲ့ လူငယ်တွေဟာ သူတို့ဝမ်းရေးအတွက် ကြည့်နေရတယ်။ အရာရှိ တယောက် အနေနဲ့ ဒီလုပ်ငန်းခွင်ကို ဘယ်လိုပြန်ဖွဲ့စည်းမလဲဆိုတာ အကဲခတ်သွားမယ် လူတွေ တန်းတူညီမျှ ဂုဏ်သိက္ခာရှိရှိ အလုပ်လုပ်နိုင်တာ သေချာအောင် လုပ်မယ်။ သူတို့ ဘေးကင်းရေးအတွက် သတိထားသွားမယ်”လို့ သူက ပြောပါတယ်။
လူအားနဲ့ တူးဖောက်တဲ့ သတ္တုတွင်းလုပ်သားတွေဟာ ရှေးကျပြီး တူးဖော်ရေးစည်းမျဉ်းတွေ မထားဘဲ သတ္တုတူးနေကြလို့ လူသေတဲ့ မတော်တဆမှုတွေ မကြာခဏ ကြုံရလေ့ရှိပါတယ်။
သတ္တုဝယ်လိုအား တိုးနေပြီး ကုန်စျေးနှုန်းလည်း ပိုမြင့်လာနေလို့ ကမ္ဘာတလွှား ဆင်းရဲတဲ့ နိုင်ငံတွေမှာ လတ်တလောနှစ်တွေအတွင်း အသေးစား သတ္တုတွင်းလုပ်ငန်းတွေ ပေါများလာပါတယ်။
ခုလို ဖြစ်ရပ်တွေဟာ အနောက်အာဖရိကတဝန်း နေရာအများအပြားမှာ ဖြစ်နေကျလို့ ရိုက်တာ သတင်းဌာနက ဖော်ပြပါတယ်။
