နိုင်ဂျီးရီးယားနိုင်ငံမှာ ပြန်ပေးဆွဲသူတွေကို ရှင်းလင်းတဲ့ လုံခြုံရေးဆိုင်ရာစစ်ဆင်ရေးတခု စတင်လုပ်ဆောင်ပြီးနောက် နိုင်ဂျီးရီးယားလုံခြုံရေးအေဂျင်စီတွေဟာ နိုင်ငံအနောက်မြောက်ပိုင်း Zamfara ပြည်နယ်မှာ လက်နက်ကိုင်ဂိုဏ်းတွေရဲ့ ဖမ်းဆီးခြင်းကိုခံရတဲ့ လူ ၁၈၇ ဦး ကို ကယ်တင်နိုင်ခဲ့တယ်လို့ ရဲတပ်ဖွဲ့က ပြောပါတယ်။ 

အစိုးရဟာ ပြီးခဲ့တဲ့လက Zamfara နဲ့ တခြားပြည်နယ်များရှိ ဆက်သွယ်ရေး ၀န်ဆောင်မှုတွေကို ပိတ်ချထားလိုက်ပြီး ဂိုဏ်းအချင်းချင်းကြားကညှိနှိုင်းမှုကို အနှောင့်အယှက် ဖြစ်စေလိုက်ပါတယ်။ 

လက်နက်ကိုင်ဂိုဏ်းတွေဟာ အချိန်နဲ့အမျှ ရဲတင်းလာကြပြီး စစ်တပ်ကင်းစခန်းတွေကို တိုက်ခိုက်တာ၊ အကျဉ်းသားတွေကို ထောင်ဖောက်တာနဲ့ ဇူလိုင်လတုန်းက လေတပ်ဂျက်လေယာဉ်ကို ပစ်ချခြင်းတွေအထိပါ လုပ်ဆောင်လာကြတာပါ။ 

Zamfara ပြည်နယ်ကနေ မောင်းထုတ်လိုက်တဲ့ ဓားပြတွေဟာ နီးစပ်ရာနယ်မြေထဲကို ဝင်ရောက်ပြီး အနှောင့်အယှက်ပေးနေတယ်လို့ အိမ်နီးချင်းပြည်နယ်တွေရဲ့အာဏာပိုင်တွေက ဆိုပါတယ်။ 

မနှစ် ဒီဇင်ဘာလကစပြီး Zamfara ပြည်နယ်ဟာ ငွေနဲ့ပြန်ရွေးခိုင်းဖို့အတွက် ကျောင်းတွေ၊ ကျေးရွာတွေနဲ့ အဝေးပြေးလမ်းမကြီးတွေပေါ်မှာ ခရီးသွားနေတဲ့လူတွေကို ပစ်မှတ်ထားပြီး လက်နက်ကြီးတွေ ကိုင်ဆောင်ထားတဲ့ ဓားပြတွေက မကြာခဏပြန်ပေးဆွဲမှုတွေ ကျူးလွန်တတ်တဲ့နေရာ ဖြစ်လာပါတယ်။