ကချင်ပြည်နယ်မှာ နိုင်ငံကူးလက်မှတ် ပတ်စ်ပို့လုပ်ဖို့ လျှောက်ထားရာမှာ အချိန်ကြာမြင့်စွာ စောင့်ဆိုင်းနေရသလို အေးဂျင့်တွေကို ကျပ်ငွေသိန်းချီ ပေးနေရတယ်လို့ မြစ်ကြီးနား မြို့ခံတွေထံက သိရပါတယ်။ 

မြစ်ကြီးနားမြို့ရှိ၊ နိုင်ငံကူးလက်မှတ် (ပတ်စ်ပို့) ထုတ်ပေးရေးရုံးခွဲမှာ မေလ ၁၃ ရက်အထိ တိုကင်ပြည့်နေတယ်လို့ သိရပြီး ပတ်စ်ပို့လုပ်သူတွေက အလျင်လိုမှုအပေါ် မူတည်ကာ ငွေကျပ် ၁ သိန်းခွဲကနေ ၃ သိန်းထိ ပေးရတာရှိတယ်လို့ အေးဂျင့်တဦးဆီက စုံစမ်းသိရှိရပါတယ်။

အေးဂျင့်တွေနဲ့ နီးစပ်သူတဦးက “မေလ ၁၃ ရက်နေ့ထိ တိုကင်နံပါတ် ပြည့်နေပါပြီ။ မေလ ၁၃ ရက် နောက်ပိုင်းအတွက် ဆိုရင်တောင် ဧပြီလ ၃ ရက်နေ့လောက် ကတည်းက နာမည်စာရင်းသွင်းထားရမှာပါ” လို့ ပြောပါတယ်။

ပတ်စ်ပို့အသစ်လုပ်ရင် တရားဝင် ရုံးသွင်းငွေ ၆၅၀၀၀ ခွဲလောက်ပေးရတယ်လို့လည်း သိရပါတယ်။ 

ပတ်စ်ပို့ရုံးတွေ ပိတ်တော့မယ်လို့ သတင်းရတုန်းက ပတ်စ်ပို့လုပ်နေဆဲသူတွေဟာ အေးဂျင့်နဲ့ ဆက်သွယ်ပြီး လုပ်တာတောင် မနက်အစောကြီးတန်းစီရပြီး ၂ ရက်လောက် တနေကုန် စောင့်လုပ်ခဲ့ရတာလို့ သိရပါတယ်။ 

ပွဲစားနဲ့ တခြားသူတွေ ရုံးထဲဝင်ခွင့်မရဘဲ အေးဂျင့်ကတဆင့်ပဲ လုပ်ရတာ အဆင်အပြေဆုံးလို့ မြစ်ကြီးနားဒေသခံက ပြောပါတယ်။

“ပတ်စ်ပို့ရုံးတွေ ပြန်ဖွင့်တဲ့အချိန်မှာ တိုကင်စနစ်ဖြစ်သွားပြီး တန်းစီလို့လည်း မရဘူးထင်လို့ အေးဂျင့်နဲ့ပဲ လုပ်လိုက်တာ။ ၂၀ ရက်နေ့လောက်ရမယ် ပြောတာပဲ။ ခုထိမရသေးဘူး” လို့ မတ်လ ဒုတိယပတ်ထဲမှာပဲ အေးဂျင့်နဲ့ ဆက်သွယ်လုပ်ခဲ့သူတဦးက ပြောပါတယ်။

မတ်လ ၂၇ ရက် တော်လှန်ရေးနေ့ ရုံးပိတ်ရက်ပြီးနောက်တရက်မှာ ပတ်စ်ပို့လုပ်ဖို့ လာသူတဦးကလည်း “ခု နာမည်စာရင်းသွင်းလို့မရဘူး။ ၄ လပိုင်း ၃ ရက်နေ့မှ ပြန်လာဖို့ပြောတယ်” လို့ ပြောပါတယ်။

PJ လာထုတ်တာ၊ တလကျော်လောက် လုပ်ရတယ်ပြီး အရင်တခေါက်အသုတ်ထဲ မပါလို့။ ဒီနေ့လာစောင့်တာလို့ ရုံးအပြင်မှာ စောင့်ဆိုင်းနေသူတဦးက ပြောပါတယ်။

စစ်တပ်အာဏာသိမ်းပြီးနောက်ပိုင်း လူငယ်အများစုဟာ ပြည်တွင်းမှာ အလုပ်အကိုင် အခွင့်အလမ်းမရှိလို့ အိမ်နီးချင်းပြည်ပနိုင်ငံတွေကို နည်းမျိုးစုံနဲ့ ထွက်ခွာဖို့ ကြိုးပမ်းနေကြတာ ဖြစ်ပါတယ်။

နည်းပညာတက္ကသိုလ်၊ ဆေးတက္ကသိုလ်၊ ပညာရေးတက္ကသိုလ် စတဲ့ အသက်မွေးဝမ်းကျောင်း တက္ကသိုလ်တွေက ဘွဲ့ရတွေဖြစ်ပါက ရန်ကုန်၊ မြန်မာနိုင်ငံကူးလက်မှတ် ထုတ်ပေးရေးရုံးမှာ  ပတ်စ်ပို့ရရှိဖို့ သက်ဆိုင်ရာ နယ်မြေရဲစခန်းတွေမှာ ခံဝန်ချက် ရေးထိုးနေရတဲ့အပြင် ပတ်စ်ပို့ရုံး ဝန်ထမ်းတွေရဲ့ ပိုက်ဆံတောင်းတာခံခဲ့ရတယ်လို့ ပတ်စ်ပို့ ပြုလုပ်နေသူ‌တွေဆီက သိရပါတယ်။

ပတ်စ်ပို့လျှောက်ထားသူတဦးက “အွန်လိုင်းဖောင်ဖြည့်တော့ B.E လို့ ရေးတင်လိုက်တာ၊ ရုံးရောက်တော့ ဘွဲ့ရဆိုပြီး လျှောက်လွှာပြင်ရေးလိုက်တယ်။ အဲ့မှာ ဘာဘွဲ့လဲ မေးတယ်။ GTU ကဆိုတော့ စခန်းမှာ ခံဝန်ရေးပြီး ပြန်လာဖို့ ပြောတယ်။ သူငယ်ချင်းတယောက်လည်း ဘွဲ့ရလို့ပဲ ရေးတာ။ ကောင်တာက ဘာဘွဲ့လဲမေးတော့ အဝေးသင်ဆို ဘာမှဆက်မမေးဘူး။ B.A, B.Sc တို့ဆိုလည်း ဘာမှမတောင်းဘူး။ စခန်းက ခံဝန်ယူပြီး ပြန်လာ‌တော့ အလှူငွေဆိုပြီး တောင်းတယ်၊ ၅,၀၀၀ ပေးတာမရဘူး၊ ၁၀,၀၀၀ လောက်တော့ လှူပါဆိုလို့ ပေးခဲ့ရတယ်။ လျှောက်ထားတာကလည်း PV ပါပဲ” လို့ ပြောပါတယ်။

ပတ်စ်ပို့ရုံးက ခံဝန်ချက်ထိုးခိုင်းတဲ့ စာသားမှာ လက်ရှိတွင် မည်သည့်အစိုးရဌာနဆိုင်ရာတွင်မှ အစိုးရဝန်ထမ်းအဖြစ် တာဝန်ထမ်းဆောင်ခဲ့ဖူးခြင်း မရှိဘဲ အခြားလုပ်ငန်းဖြင့် အသက်မွေးဝမ်းကျောင်း ပြုလုပ်လျက်ရှိပါသည်၊ လွဲမှားသော အကြောင်းအရာများကို ဖော်ပြ၍ နိုင်ငံကူးလက်မှတ် လျှောက်ထားမိပါက တည်ဆဲဥပဒေများ (သို့မဟုတ်) ဝန်ထမ်း စည်းမျဉ်းစည်းကမ်းများအရ အရေးယူခံရမည်ကို သိရှိကြောင်း ဝန်ခံကတိပြုပါသည် စတဲ့အချက်တွေ ပါရှိတာကို တွေ့ရပါတယ်။

ပတ်စ်ပို့ရုံးနဲ့ နီးစပ်သူတဦးက  “အခုအခြေအနေက အခွန်က ပုံမှန်ပါပဲ။ ၃၅,၀၀၀ ကို Kpay ကနေ သွင်းရတယ်။ ကိုယ့်ဖုန်း ကိုယ့်အကောင့်ဆို ပိုကောင်းတာပေါ့။ ပျောက်ဆုံးဆို ၇၅,၀၀၀ ပါ။ ဝန်ထမ်းမှာမှ ကုမ္ပဏီတို့ ဘာတို့ဆိုရင် ခံဝန်မလိုဘူး။ ပတ်စ်ပို့သတင်းရဲရုံးခန်းမှာ ခံဝန်ဖောင်ရှိတယ်။ အဲ့ကနေ ထောက်ခံစာ ပြန်လုပ်ပေးရတယ်။ နောက်တခုက ထောင်ကျဖူးလား ဆိုတဲ့ဟာ၊ ထောင်ထွက်လက်မှတ်မူရင်း မပါရင် အထဲမှာ ရစ်တယ်။ ဝန်ထမ်းက အင်ဂျင်နီယာဆို CDM လား၊ ဒါမှမဟုတ် အခု တာဝန်ထမ်းဆောင်နေပြီး သူတို့ဌာနတွေကို အသိမပေးဘဲ ပြည်ပကို ထွက်ချင်တာလား၊ အဲ့ဒါကြောင့် ခံဝန်ဆိုပြီး ရဲစခန်းမှာ လက်မှတ်ထိုးခိုင်းနေတာ။ PJ ဆိုလည်း ပြည်ပက အလုပ်ခေါ်စာကို တော်တော်လေးစစ်နေတယ်။ တန်းစီတဲ့ အမှတ်စဉ်တွေကို ပိုက်ဆံယူပြီး ရှေ့ကိုခေါ်သွားတာတို့၊ ရုံးထဲရောက်မှ အလှူခံတယ်ဆိုပြီး ငွေကောက်တာတို့ဆို တိုင်ဖို့ ဖုန်းနံပါတ်တွေ ရုံးထဲရော၊ ရုံးပြင်မှာရော ရှိပြီးသားပါ” လို့ ပြောပါတယ်။

ပြီးခဲ့တဲ့ ဖေဖော်ဝါရီလတုန်းက လျှောက်ထားသူ ၅၂,၀၀၀ ကျော်နဲ့ ရက်ချိန်းယူမှု ကန့်သတ်ခဲ့ရာက မတ်လ ၅ ရက် ညပိုင်းမှာ ပြန်ဖွင့်လှစ်ပေးခဲ့ပြီး ဧပြီလ ၅ ရက်အထိ ရက်ချိန်းယူမှု ကန့်သတ်လိုက်ပြီလို့ နိုင်ငံကူးလက်မှတ်ထုတ်ပေးရေးရုံးက ကြေညာထားတာကို တွေ့ရပါတယ်။

လက်ရှိမှာ ပတ်စ်ပို့အမျိုးအစား ၆ မျိုးအထိ ခွင့်ပြုပေးထားတယ်လို့ သိရပြီး ၂၀၂၃ မတ်လ ၆ ရက်ကနေ တနင်္လာမှ သောကြာအထိ တနေ့ကို ပတ်စ်ပို့လျှောက်ထားသူ ၂,၀၀၀ ကျော်ခန့် ရှိတယ်လို့ သိရပါတယ်။