ဘောလုံးပွဲစဉ်တပွဲမှာ ကစားသမား ၅ ယောက်အထိ လူစားလဲခွင့်ကို ပုံသေစည်းမျဉ်းအဖြစ် နိုင်ငံတကာဘောလုံးအဖွဲ့ချုပ်တွေက တရားဝင်သတ်မှတ်ပြဋ္ဌာန်းသွားတော့မယ်လို့ သိရပါတယ်။
မူလက ဘောလုံးဥပဒေအရ ကစားပွဲတပွဲမှာ လူစားလဲခွင့် ၃ ကြိမ်သာ သတ်မှတ်ပြဋ္ဌာန်းထားခဲ့ပေမဲ့ ကိုဗစ်-၁၉ ကပ်ရောဂါကာလမှာ စည်းမျဉ်းအပြောင်းအလဲဖြစ်ပေါ်ခဲ့တာပါ။
ကစားသမားတွေရဲ့ဘေးကင်းလုံခြုံစိတ်ချရမှုနဲ့ အင်ပြည့်အားပြည့် ကစားနိုင်စေဖို့ ရည်ရွယ်ပြီး လူစားလဲခွင့် ၃ ယောက်ကနေ ၅ ယောက် အထိပြောင်းလဲ သတ်မှတ်ခဲ့တာပါ။
ပြီးခဲ့တဲ့ရာသီအထိ အင်္ဂလန်ပြည်တွင်း လိဂ်ပွဲစဉ် တွေကလွဲရင် တခြားဘောလုံးပြိုင်ပွဲအသီးအသီးမှာ ၅ ယောက် အထိ လူစားလဲခွင့်ပေးခဲ့ပါတယ်။
အင်္ဂလန်မှာလည်း လာမယ့် ၂၀၂၂-၂၀၂၃ ဘောလုံးရာသီကစတင်ပြီး ကစားသမား ၅ ယောက်အထိ လဲခွင့်ပေးတော့မှာ ဖြစ်ပါတယ်။
နိုင်ငံတကာဘောလုံးအဖွဲ့ချုပ်များ ဘုတ်အဖွဲ့ဟာ ၅ ယောက် လူစားလဲခွင့်ကို ဘောလုံးဥပဒေအနေနဲ့ အတည်ပြုသတ်မှတ်ပြဋ္ဌာန်းနိုင်ဖို့ တွေ့ဆုံဆွေးနွေးမှုတွေလည်း လုပ်ဆောင်ခဲ့ပြီးဖြစ်ပါတယ်။
