တရုတ်နိုင်ငံခြားရေးဝန်ကြီးဌာနက အမေရိကန်ပြည်ထောင်စုဟာ နိုင်ငံတကာ အာကာသ သဘောတူစာချုပ်တွေမှာပါတဲ့ ဥပဒေစည်းကမ်းတွေကို မလိုက်နာဘဲ လျစ်လျူရှုနေတယ်လို့ ပုံမှန်ပြုလုပ်နေကျ ဒီဇင်ဘာ ၂၈ နေ့ သတင်းစာရှင်းလင်းပွဲမှာ ပြောပါတယ်။
ဒီနှစ်ထဲမှာ အမေရိကန် ဘီလီယံနာသူဌေးကြီး အီလွန်မတ်စ် လွှတ်တင်ထားတဲ့ Starlink ဂြိုဟ်တုတွေက တရုတ်အာကာသစခန်းကို နှစ်ကြိမ် ထိပ်တိုက်တိုးလုနီးနီး ဖြစ်ခဲ့တာကြောင့် တရုတ်အာကသယာဉ်မှူးတွေအတွက် အန္တရာယ်ရှိတယ်လို့ စွပ်စွဲပါတယ်။
အခုရက်ပိုင်း တရုတ်လူမှုမီဒီယာပေါ်တွေမှာလည်း သူတို့ရဲ့ အာကသစခန်းကို မတိုက်မိစေဖို့ အီလွန်မတ်စ်ရဲ့ Starlink ဂြိုဟ်တုတွေ ရှောင်ရှားပေးပါဆိုပြီး ဝိုင်းဝန်းဖိအားပေး ရေးသားကြပါတယ်။
ဇူလိုင်နဲ့ အောက်တိုဘာလမှာ တရုတ်က အဲဒီပြဿနာကို အထောက်အထားတွေနဲ့ ကုလသမဂ္ဂ အာကာသအေဂျင်စီကို တိုင်ကြားခဲ့ပါတယ်။
နိုင်ငံခြားရေးဝန်ကြီးဌာ နပြောရေးဆိုခွင့်ရှိသူ ကျောက်လီကျန်က “အမေရိကန်အနေနဲ့ သူတို့ ပြောလေ့ရှိတဲ့ အာကာသဆိုင်ရာ နိုင်ငံတကာစနစ်တွေကို ကိုယ်တိုင်လိုက်နာသင့်ပါတယ်။ အခုလို အာကာသမှာ ထိပ်တိုက်တိုးမှုတွေ မဖြစ်အောင် ကြိုတင်ကာကွယ်ပေးပါ၊ အာကာသယာဉ်မှူးတွေရဲ့ ဘေးကင်းလုံခြုံရေးကို ကာကွယ်ပါ” လို့ ပြောပါတယ်။
အမေရိကန်နဲ့ တရုတ်တို့ဟာ စီးပွားရေးနဲ့ စစ်ရေးမှာသာ ပြိုင်ဆိုင်နေရုံတာမဟုတ်ဘဲ ကမ္ဘာ့အပြင်ဘက် အာကာသမှာလည်း တနေ့တခြား ပြိုင်ဆိုင်မှုတွေ ကြီးမားလာနေတာပါ။
အီလွန်မက်စ်ရဲ့ Tesla လျှပ်စစ်ကားတွေဟာ တရုတ်မှာ အများဆုံးထုတ်ပြီး၊ တရုတ်ဈေးကွက်မှာပဲ အများဆုံး ရောင်းချနေတာမို့ အခု အာကာသပြဿနာက သူ့စီးပွားရေးကို ထိခိုက်လာဖွယ် ရှိပါတယ်။
