နော်ဝေနိုင်ငံ ဦးဆောင်တဲ့ နိုင်ငံပေါင်း ၂၇ နိုင်ငံက စစ်သည်အင်အား ၃၀၀၀၀ ကျော်ဟာ ၂ နှစ် တကြိမ် ဆင်နွှဲတဲ့ Cold Response 2022 စစ်ရေးလေ့ကျင့်မှုမှာ မတ် ၁၄ ရက်က စတင်ပါဝင် လေ့ကျင့်နေပါတယ်။
နော်ဝေနိုင်ငံရဲ့ ဆောင်းရာသီမှာ အေးခဲနေတဲ့ ရာသီဥတု သဘာဝပတ်ဝန်းကျင်ကို စိန်ခေါ်ရင်း နေရာအမျိုးမျိုးမှာ နေတိုးစစ်ရေးမဟာမိတ်အဖွဲ့နဲ့ မိတ်ဖက်နိုင်ငံတွေက စစ်သည်တွေ ဧပြီ အစောပိုင်းထိ ပါဝင်လေ့ကျင့်ကြမှာပါ။
လေကြောင်း၊ ပင်လယ်ရေကြောင်းနဲ့ ကြည်းတပ်တို့ရဲ့ စွမ်းရည်ကို စမ်းသပ်မှာလည်း ဖြစ်ပြီး အရပ်ဘက် အေဂျင်စီတချို့လည်း ပါဝင် လေ့ကျင့်နေပါတယ်။
စစ်သည်အင်အား ၃၀၀၀၀ ထဲမှာ ၁၄,၀၀၀ က ကြည်းတပ်ဖြစ်ပြီး ၈,၀၀၀ က ရေတပ်နဲ့ နောက် ၈,၀၀၀ က လေတပ်ကဖြစ်ပါတယ်။
နော်ဝေနိုင်ငံ စစ်တပ်အခြေစိုက်စခန်းအသီးသီးမှာ အခြေချတဲ့ ဝန်ထမ်းအမျိုးမျိုးလည်း ပါတယ်လို့ နော်ဝေ ကာကွယ်ရေးတပ်က ဆိုပါတယ်။
ဒီစစ်ရေးလေ့ကျင့်မှုအတွက် ပြင်ဆင် သင်တန်းပေးဖို့ ၂၀၂၁ ဆောင်းဦးကတည်းက တပ်တွေ အများအပြား နော်ဝေမှာ ရောက်နေခဲ့တာလို့လည်း ရိုက်တာသတင်းဌာနက ပြောပါတယ်။
