ပြည်ထောင်စုရဲ့ ပြဿနာတွေကို ပါဝင်သင့်တဲ့ Stakeholder အားလုံးပါဝင်တဲ့ နိုင်ငံရေးတွေ့ဆုံ ဆွေးနွေးမှုနဲ့ အဖြေရှာဖို့လိုအပ်တယ်လို့ ချင်းတိုင်းရင်းသားလက်နက်ကိုင်အဖွဲ့တဖွဲ့ဖြစ်တဲ့   ချင်းအမျိုးသားတပ်ဦး (CNF) က ထုတ်ပြန်ကြေညာလိုက်ပါတယ်။

တိုင်းရင်းသားလက်နက်ကိုင်တော်လှန်ရေးအဖွဲ့တွေရဲ့ ခေါင်းဆောင်တွေနဲ့ တွေ့ဆုံဆွေးနွေးဖို့ ဧပြီ ၂၂ ရက်က အာဏာသိမ်းစစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ဖိတ်ခေါ်ထားတာနဲ့ ပတ်သက်လို့  ချင်းအမျိုးသားတပ်ဦး ဗဟိုအလုပ်အမှုဆောင်ကော်မတီက မေလ ၆ ရက်နေ့စွဲနဲ့ ထုတ်ပြန်ကြေညာလိုက်တာပါ။

“ပြည်ထောင်စုရဲ့ ပြဿနာတွေကို နိုင်ငံရေးတွေ့ဆုံဆွေးနွေးမှုနဲ့ အဖြေရှာရေးဟာ မိမိတို့ အစဉ်တစိုက် ပြောဆိုခဲ့တဲ့ အရာဖြစ်တယ်။ နိုင်ငံရေးတွေ့ဆုံဆွေးနွေးမယ်ဆိုရင် ပါဝင်သင့်တဲ့  Stakeholder တွေအားလုံးပါဝင်ဖို့၊ နိုင်ငံတကာမှ ကြားဝင်စေ့စပ်ပေးဖို့၊ နိုင်ငံရေးပြဿနာတွေကို အမှန်တကယ် အဖြေရှာဖို့ လိုအပ်တယ်”လို့ ချင်းအမျိုးသားတပ်ဦးရဲ့ ထုတ်ပြန်ချက်မှာ ဖော်ပြပါတယ်။

ဒါကြောင့်  ပြည်ထောင်စုရဲ့ ပြဿနာတွေကို ပါဝင်သင့်တဲ့ တွေအားလုံးပါဝင်တဲ့ နိုင်ငံရေးတွေ့ဆုံ ဆွေးနွေးမှုနဲ့ အဖြေရှာဖို့ လိုအပ်ကြောင်းနဲ့ ချင်းအမျိုးသားတပ်ဦးအနေနဲ့ ပြည်သူလူထုနဲ့ အတူ ရပ်တည်သွားမှာ ဖြစ်ကြောင်းလည်း  ထုတ်ပြန်ကြေညာထားပါတယ်။

အာဏာသိမ်း စစ်ခေါင်းဆောင်ဖိတ်ခေါ်ထားတဲ့ ငြိမ်းချမ်းရေးဆွေးနွေးပွဲနဲ့ပတ်သက်လို့ ကရင်နီအမျိုးသားတိုးတက်ရေးပါတီ (ကေအန်ပီပီ)ကလည်း  လက်ရှိအချိန်မှာ ငြိမ်းချမ်းရေးဆွေးနွေးဖို့ အချိန်ကောင်း မဟုတ်သေးဘူးလို့ တုံ့ပြန်ထားပါတယ်။

လက်ရှိနိုင်ငံရေး အကျပ်အတည်းတွေကို ဖြေရှင်းနိုင်ဖို့ တာဝန်ယူမှု၊ တာဝန်ခံမှု အပြည့်နဲ့ တိုင်းပြည် လူထုရဲ့မျက်နှာကို  မျက်မှောက်ပြုပြီး  ပါဝင်သင့်ပါဝင်ထိုက်တဲ့ အင်အားစုတွေ ပါဝင်ဖို့ လိုအပ်သလို ထိုးစစ်ဆင်မှုတွေကို ခြွင်းချက်မရှိ အမြန်ဆုံး ရပ်တန့်ဖို့နဲ့ စစ်အင်အား ဖြည့်တင်းနေတာ ချက်ချင်း ရုပ်သိမ်းဖို့လည်း တောင်းဆိုထားပါတယ်။

ကချင်လွတ်မြောက်ရေးအဖွဲ့ (KIO) ကတော့ အာဏာသိမ်း စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင် ဖိတ်ခေါ်ထားတဲ့ ငြိမ်းချမ်းရေးဆွေးနွေးပွဲကို မတက်ဘူးလို့ ထုတ်ပြန်ကြေညာထားပါတယ်။

ငြိမ်းချမ်းရေးဆွေးနွေးပွဲမှာ ပါဝင်သင့်တဲ့သူတွေ အားလုံးပါဝင်နိုင်ပြီး နိုင်ငံရဲ့ အရေးအရာတွေကို တန်းတူဆွေးနွေးနိုင်မယ့် အချိန်အခါ၊ အခင်းအကျင်းရောက်မှသာ ပါဝင်ဆွေးနွေးနိုင်မယ်လို့ ကေအိုင်အိုထုတ်ပြန်ချက်မှာ ဖော်ပြထားပါတယ်။

အန်စီအေ အပစ်ရပ်တိုင်းရင်းသားလက်နက်ကိုင်အဖွဲ့တချို့ကတော့  စစ်ခေါင်းဆောင်နဲ့ တွေ့ဆုံရာမှာ ဘာတွေ ဆွေးနွေးလဲဆိုတာညှိနှိုင်းဖို့ အစည်းအဝေးကျင်းပနေပြီး UWSA ‘ဝ’ တပ်ဖွဲ့ ခေါင်းဆောင်တဲ့  အန်စီအေလက်မှတ်မထိုးရသေးတဲ့ အဖွဲ့တွေကတော့ ဒီကိစ္စ မဆုံးဖြတ်ရသေး ဘူးလို့ ပြောပါတယ်။  

နိုင်ငံရေးပြဿနာကို တွေ့ဆုံဆွေးနွေးလိုတဲ့ နိုင်ငံရေးဆန္ဒ (Political will) မရှိ သရွှေ့ နိုင်ငံရေးတွေ့ဆုံဆွေးနွေးမှုအပေါ် မျှော်လင့်ချက်တွေထားလို့မရနိုင်ကြောင်း ကရင်အမျိုးသားအစည်းအရုံး (ကေအန်ယူ) ဥက္ကဋ္ဌ ဗိုလ်ချုပ်ကြီး စောမူတူးစေဖိုးက ပြောကြားလိုက်ပါတယ်။ 

ဒီကနေ့ ဩဂုတ်လ ၁၂ ရက်နေ့ မှာ ကျရောက်တဲ့ ကရင်အမျိုးသားအာဇာနည်နေ့အတွက် ပေးပို့တဲ့ သဝဏ်လွှာမှာ ပြောကြားလိုက်တာဖြစ်ပြီး ကေအန်ယူအနေနဲ့ နိုင်ငံရေးပြဿနာကို နိုင်ငံရေးအရ အဖြေရှာနိုင်ရေးအတွက် တွေ့ဆုံဆွေးနွေးမှုတွေကို ခေတ်အဆက်ဆက် လုပ်ဆောင်လာခဲ့ပေမယ့် ၂၀၂၁ ခု ဖေဖော်ဝါရီ  ၁ ရက်နေ့မှာ အာဏာသိမ်းမှုကြောင့် နိုင်ငံရေး နောက်ကြောင်းပြန်လည့်ရပြီလို့ လည်း  ဗိုလ်ချုပ်ကြီး စောမူတူးစေဖိုးက ပြောကြားပါတယ်။ 

စစ်တပ်က အာဏာသိမ်းပြီးနောက်  ပြည်သူလူတွေကို ညှဉ်းပန်းနှိပ်စက်မှုတွေနဲ့ သတ်ဖြတ်မှုတွေက မြို့ကြီးပြကြီးအထိ ပျံ့နှံ့ဖြစ်ပေါ်နေတဲ့အပြင်  ညှဉ်းပန်းနှိပ်စက်မှုတွေနဲ့ သတ်ဖြတ်မှုတွေဟာ အခုထိတိုင် အတောမသတ်နိုင်ရှိနေကြောင်း ပြောဆိုထားပါတယ်။

နိုင်ငံရေးပြဿနာကို တွေ့ဆုံဆွေးနွေးလိုတဲ့ နိုင်ငံရေးဆန္ဒမရှိသရွေ့ နိုင်ငံရေးတွေ့ဆုံဆွေးနွေးမှု အပေါ်မျှော်လင့်ချက်တွေ ထားလို့မရနိုင်တဲ့အတွက် မိမိတို့အနေနဲ့ နိုင်ငံရေး တွေ့ဆုံဆွေးနွေးမှုအတွက် လမ်းဖွင့်ထားပြီး တဘက်မှာလည်း မိမိပြည်သူ လူထုရဲ့ အသက်၊ အိုးအိမ်၊ စည်းစိမ်တွေကို မိမိတို့ရဲ့ နေရပ်ဒေသကို ကာကွယ်ရမှာဖြစ်ကြောင်းလည်း သဝဏ်လွှာမှာ ပြောထားပါတယ်။ 

ကရင်အမျိုးသားတွေဟာ မိမိကိုယ်ပိုင် သမိုင်း၊ ယဉ်ကျေးမှုနဲ့ ဓလေ့ ထုံးတမ်းတွေရှိတဲ့ လူမျိုးတမျိုးဖြစ်ပြီး မိမိတို့ရဲ့ ကိုယ်ပိုင်သမိုင်း၊ ယဉ်ကျေးမှုနဲ့ ဓလေ့ထုံးတမ်းတွေကို ထိပါး နှောက်ယှက်ဖျက်ဆီးစေမယ့် အရာမှန်သမျှကို ကာကွယ်တွန်းလှန်နိုင်တဲ့အခွင့်အရေးနဲ့ တာဝန်ရှိကြောင်း ပြောဆိုပါတယ်။

ဒါ့အပြင် မိမိတို့ ကရင့်အမျိုးသားတွေရဲ့ စည်းစိမ်ဥစ္စာနဲ့ ဖွံ့ဖြိုးတိုးတက်မှုကို ထိပါးနှောက်ယှက်လာမယ့် အရာမှန်သမျှကို  ကာကွယ်တွန်းလှန်ရမှာဖြစ်ပြီး မိမိတို့ ကရင့်အမျိုးသားတွေရဲ့ အသက်အန္တရာယ်နဲ့ နေရာဒေသကို ကာကွယ်နိုင်တဲ့ အခွင့်အရေး အပြည့်အဝရှိကြောင်း ပြောပါတယ်။ 

ဒါ့ကြောင့် ကရင်အမျိုးသားတွေအနေနဲ့ ကရင့်အမျိုးသားတွေရဲ့ ရည်မှန်းချက်ပန်းတိုင်နဲ့ မိမိတို့ ကရင့်အာဇာနည်တွေရဲ့ ရည်မှန်ချက်ပန်းတိုင်တွေ ပြီးမြောက်အောင်မြင်စေဖို့ စည်းစည်းလုံးလုံး ညီညီညွတ်ညွတ်နဲ့ အတူတကွ ကြိုပမ်းအားထုတ်ဖို့လည်း တိုက်တွန်းပြောဆိုထားပါတယ်။