close

နိုင်ငံသားမှတ်ပုံတင်

close

March 16, 2023

နိုင်ငံသားမှတ်ပုံတင်ထုတ်ပေးမှ နေရပ်ပြန်မည်ဟု စစ်ကောင်စီကိုယ်စားလှယ်အဖွဲ့ထံ ရိုဟင်ဂျာဒုက္ခသည်များ တောင်းဆို

နေရပ်ပြန်ဖို့အတွက် နိုင်ငံသားမှတ်ပုံတင်ထုတ်ပေးဖို့ အပါအဝင် အချက် ၃ ချက်ကို ရိုဟင်ဂျာဒုက္ခသည်တွေက ဘင်္ဂလားဒေ့ရှ်နိုင်ငံမှာ ရောက်ရှိနေတဲ့ မြန်မာစစ်ကောင်စီကိုယ်စားလှယ်အဖွဲ့ထံ တောင်းဆိုခဲ့ကြကြောင်း ဒုက္ခသည်ခေါင်းဆောင်တွေက ပြောပါတယ်။

စစ်ကောင်စီဝန်ကြီး ဦးကိုကိုလှိုင် ခေါင်းဆောင်တဲ့အဖွဲ့ဟာ မတ်လ ၁၅ ရက်ကတည်းက မြန်မာ- ဘင်္ဂလားဒေ့ရှ်နယ်စပ် ကော့ဇ်ဘဇားရှိ ရိုဟင်ဂျာဒုက္ခသည်တွေကို သွားရောက်တွေ့ဆုံပြီး လူ ၁၀၀၀ ကျော်လောက်ကို  နေရပ်ပြန်ခေါ်ဖို့ စီစဉ်နေတာပါ။  

ဒုက္ခသည်တဦးက "ကျနော်တို့ကတော့ သူတို့ဆီကအချက် ၃ ခုတောင်းဆိုခဲ့ကြတယ်။ နိုင်ငံသားမှတ်ပုံတင်ကတ်ပြားထုတ်ပေးရမယ်။ မူလနေရာမှာပြန်ပြီး နေရာချပေးရမယ်။ တခြားတိုင်းရင်းသား ၁၃၅ မျိုးလို တရားမျှတမှုနဲ့ အသွားအလာ လွတ်လပ်ခွင့်ပေးရမယ်။လို့ တောင်းဆိုခဲ့တယ်။ သူတို့ကိုတော့ စစ်ကောင်စီက အခုအချိန်အထိ ဘာမှပြန်မပြောသေးဘူး။ သူတို့ ခွင့်မပြုရင် ပြန်မသွားနိုင်ဘူး"လို့ ပြောပါတယ်။

စစ်ကောင်စီက ဒုက္ခသည်တွေကို နေရပ်ပြန်ခေါ်တာမှာ နိုင်ငံတကာနဲ့ ပူးပေါင်းဆောင်ရွက်မှု မရှိသလို ပွင့်လင်းမြင်သာမှုလည်း မရှိဘူးလို့ ဒုက္ခသည်တွေကို ကူညီပေးနေသူတွေက ပြောပါတယ်။

နေရပ်ပြန်မယ့် စာရင်းမှာပါလာသူတွေကို မြန်မာနိုင်ငံမှာ နေထိုင်ခဲ့ဖူးခြင်း ရှိ၊ မရှိ လ.ဝ.က မှတ်တမ်းတွေအရ ၇ ရက်ခန့် စစ်ဆေးသွားမှာဖြစ်ပြီး ပြန်လာချင်သူတွေကို  သူတို့အဖွဲ့နဲ့အတူ တပါတည်းခေါ်ဆောင်ဖို့ ပြင်ဆင်ထားတယ်လို့ သိရပါတယ်။

ဒုက္ခသည်စခန်း တာဝန်ခံတစ်ဦးက “သူတို့တောင်းဆိုတဲ့အချက်တွေကို လက်ခံရင် ပြန်လာမယ်လို့ သိရတယ်။ တောင်းဆိုချက်တွေ လက်မခံရင်တော့ လာဖို့မသေချာပါဘူး။ သူတို့ကတော့ ဘင်္ဂလားဒေ့ရှ် ဒုက္ခသည်စခန်းတွေမှာ လူတွေကို လိုက်ပြီးမေးနေတယ်။ ဒုက္ခသည်တွေကလည်း သူတို့ရဲ့အခြေအနေတွေကို စောင့်ကြည့်နေကြတယ်။ သူတို့တောင်းဆိုတာကို လက်ခံရင် လာကြမယ်။ လက်မခံရင် မလာဘူးလို့ သိရတယ်။ သူတို့အဖွဲ့ကတော့ ဘင်္ဂလားမှာ ၇ ရက် တစ်ပတ်လောက် ကြာမယ်လို့ ကြားသိရတယ်။ ခေါ်လာရင် သူတို့နဲ့ တစ်ခါတည်း ခေါ်မယ်။ အိမ်ထောင်စုကတော့ ၇၀၊ လူဦးရေ ၁၀၀၀ ကျော်လို့သိရတယ်” လို့ ပြောပါတယ်။

ရိုဟင်ဂျာဒုက္ခသည်တချို့ကတော့ နေရပ်ပြန်ဖို့ စာရင်းပေးထားတာတွေရှိနေပြီး အဲ့ဒီလူစာရင်းကို ဘင်္ဂလားဒေ့ရှ်အစိုးရက မြန်မာဘက်ကို ပေးပို့ထားသလို မြန်မာဘက်ကလည်း ပြန်လည်လက်ခံမယ့် လူစာရင်းကို ဘင်္ဂလာအစိုးရဆီ ပြန်လည်ပေးပို့ထားပြီးဖြစ်ပါတယ်။ 

မြန်မာ-ဘင်္ဂလားဒေ့ရှ်အစိုးရအစီအစဉ်နဲ့ နေရပ်ပြန်ဖို့ စာရင်းပေးထားတဲ့ ရိုဟင်ဂျာဒုက္ခသည် အိမ်ထောင်စု ၇၀ ဆယ်ကျော်လူဦးရေ ၁၁၄၀ ဦးရှိပြီး ဒီအထဲမှာ ဟိန္ဒူဒုက္ခသည် ၃၀၀ ကျော်ပါ ဝင်ကြောင်းသိရှိရပါတယ်။

လက်ရှိ ဒုက္ခသည် ၁၁၄၀ ထဲမှာ ၇၁၁ ​ဦးရဲ့ အချက်အလက်တွေကို စစ်ဆေး အတည်ပြုပြီးဖြစ်ပေမဲ့ ၄၂၉ ယောက်ရဲ့ စာရင်းတွေကို စိစစ်နေဆဲဖြစ်တယ်လို့ မြန်မာစစ်ကောင်စီကိုယ်စားလှယ်အဖွဲ့ထံက သိရပါတယ်။

3 hours Ago

July 19, 2020

ရေးမြို့နယ် မဲစာရင်း၌ နိုင်ငံသားမှတ်ပုံတင်ဖြည့်ရန်ကျန်နေသူများကို လိုက်လံစစ်ဆေး

မွန်ပြည်နယ်၊ ရေးမြို့နယ်မှာ မဲစာရင်းကောက်ယူခဲ့စဉ်က နိုင်ငံသားမှတ်ပုံတင်ဖြည့်သွင်းဖို့ ၅ သောင်းကျော်ကျန်ရှိနေတာကြောင့် အခုလ တတိယပတ်ကစလို့ စေတနာ့ဝန်ထမ်းတွေနဲ့ လိုက်လံစစ်ဆေးဆောင်ရွက်နေပါတယ်။ အဲဒီလိုကောက်ခံရာမှ ရပ်ကွက်နဲ့ ကျေးရွာတခုကို စေတနာ့ဝန်ထမ်း ၅ ဦးစီးပါဝင်ပြီး အခုလကုန်အတွင်း စာရင်းအရ ပြီးစီးအောင်ဆောင်ရွက်သွားမယ်လို့ ရေးမြို့နယ်လ၀ကဦးစီးမှူး ဦးမျိုးခိုင်က ပြောပါတယ်။ “နိုင်ငံသားမှတ်ပုံတင်နေရာမှာ ကွက်လပ်ဖြည့်တဲ့သူတွေကိုသာ လိုက်လံစစ်ဆေးဆောင်ရွက်မှာဖြစ်တယ်၊ ရှိတယ်ဆိုဖြည့်မယ်၊ ပျောက်ဆုံးတာ၊ လုံးဝမရှိသေးဘူးဆိုရင် နိုင်ငံသားကတ်အသစ်လုပ်မယ်ဆိုပြီး စာရင်းထည့်မယ်။  ဆုံးသွားတာတို့ ရှိလာရင် သေဆုံးစာရင်းထည့်မယ်။ ဘုန်းကြီးဝတ်နေတာတို့ရှိရင် ရွေးကောက်ပွဲမတိုင်ခင် ထွက်မယ်ဆိုရင် ဖြည့်သွင်းပါမယ်။ စာရင်းထပ်တာ၊ ရူးသွပ်တာ၊ အသက်မပြည့်တာ၊ ပြည်ပသွားတို့ရှိရင် စာရင်းပြုစုမယ်ပေါ့။”  ကောက်ခံပြီးတဲ့ စာရင်းတွေအရ နိုင်ငံသားကတ်အသစ်ပြုလုပ်ဖို့ ရှိလာပါက လာမယ့်ရွေးကောက်ပွဲအမီ ကွင်းဆင်းဆောင်ရွက်ပေးသွားမယ်လို့လည်း ဦးမျိုးခိုင်က ပြောပါတယ်။ ရေးမြောက်ပိုင်းနေ စေတနာ့ဝန်ထမ်းဆောင်ရွက်နေသူတဦးက ''မဲထည့်ချင်သူ နိုင်ငံသားတိုင်းအတွက် ခုလိုဆောင်ရွက်ခွင့်ရတာ အကျိုးရှိတဲ့ လုပ်ရပ်လို့မြင်ပါတယ်။ မဲထည့်ချင်သူ နိုင်ငံသားတွေအနေနဲ့လည်း မဲစာရင်းတွေထွက်ပေါ်လာခဲ့ရင် လာရောက်ကြည့်ရှုစေချင်တယ်၊ ဒီလိုဖြစ်အောင်လည်း အရပ်ဘက်အဖွဲ့တွေနဲ့ ပါတီတွေက တိုက်တွန်းပေးစေလိုပါတယ်”' လို့ ပြောပါတယ်။ ရေးမြို့နယ်အတွင်း လာမယ့်ရွေးကောက်ပွဲအတွက် ကောက်ခံရရှိတဲ့စာရင်းအရ မဲပေးခွင့်ရှိသူဦးရေ ၂ သိန်းကျော်ရှိနေပြီး ပထမအကြိမ်မဲပေးမယ့်သူ ၃၀၀၀၀ လောက် ပါဝင်လာနိုင်တယ်လို့ ရေးမြို့နယ်ကော်မရှင်အဖွဲ့ခွဲက သိရပါတယ်။ ဝင်းနိုင်သက်
3 years Ago
Up