သြစတြေးလျဝန်ကြီးချုပ် စကော့မောရစ်ဆင်က နိုဝင်ဘာလကစလို့ သြစတြေးလျ နိုင်ငံသား တွေကို နိုင်ငံခြား ခရီးသွားခွင့် ပြုသွားမယ်လို့ ကြေညာပါတယ်။
ဒါဟာ ကမ္ဘာမှာ အတင်းကြပ်ဆုံးလို့ နာမည်ကျော်တဲ့ သြစတြေးလျရဲ့ ၁၈ လအကြာ ကိုဗစ် လော့ဒေါင်း စည်းကမ်းတွေကို ဖြေလျော့ပေးတော့မယ့် ခြေလှမ်း ဖြစ်ပါတယ်။
သြစတြေးလျနိုင်ငံသားတွေနဲ့ အမြဲတမ်း နေထိုင်ခွင့် ရသူတွေကို နိုင်ငံခြား ထွက်ခွာဖို့ ပြန်ဖွင့်ပေးလိုက်တာနဲ့ ပြည်တွင်းက ကိုဗစ် လော့ဒေါင်း စည်းကမ်း ဖြေလျော့မှုတွေကြားမှာလည်း အဆက်စပ်ရှိလိမ့်မယ်လို့ ဝန်ကြီးချုပ် မော်ရစ်ဆင်က ဆိုပါတယ်။
အဓိပ္ပါယ်ကတော့ ပြည်နယ်တချို့က တချို့ အစိတ်အပိုင်းတွေမှာ ကိုဗစ် စည်းကမ်း သတ်မှတ်ချက်တွေကို မကြာခင်မှာ ဖြေလျော့ပေးမယ့် သဘော ဖြစ်ပါတယ်။
ပထမခြေလှမ်းအဖြစ် နိုင်ငံသားတွေနဲ့ အမြဲတမ်း နေထိုင်ခွင့်ရသူတွေကို နိုင်ငံ ပြင်ပ ထွက်ခွာခွင့်ပြုမှာ ဖြစ်ပြီး နောက်ပိုင်းမှာတော့ နိုင်ငံခြားသားတွေကို ပြည်ဝင်ခွင့်ပေးသွားဖို့ မျှော်လင့်ထားတယ်လို့ ပြောပါတယ်။
အစီအစဉ်အရ ကိုဗစ်ကာကွယ်ဆေး အပြည့်အ၀ ထိုးပြီးတဲ့ သြစတြေးလျ နိုင်ငံသားတွေ အနေနဲ့ နိုင်ငံခြား ခရီးသွားခွင့် ရမှာဖြစ်ပြီး ပြန်လာတဲ့အခါမှာ မိမိနေအိမ်မှာ ၇ ရက် သီးသန့်နေထိုင်ရမှာ ဖြစ်ပါတယ်။
ကာကွယ်ဆေး မထိုးထားတဲ့ သူတွေကျရင်တော့ နိုင်ငံခြားကနေ ပြန်လာတဲ့အခါမှာ ဟိုတယ် ကွာရန်တင်း ၁၄ ရက်နေရမှာ ဖြစ်ပါတယ်။
