သံတောင်မြို့တွင်းကို စစ်ကောင်စီတပ်က ဝင်ရောက်ပြီး လက်နက်ကြီးနဲ့ နေ့ညပစ်ခတ်နေတဲ့ အတွက် ထွက်ပြေးတိမ်းရှောင်နေရတဲ့ ရပ်ကွက် ၄ ခုက  မြို့ခံပြည်သူ ၈၀၀၀ ကျော်ဟာ နေရပ်မပြန်နိုင်သေးဘဲ နေထိုင်စားသောက်ရေး အခက်အခဲကြုံနေရတယ်လို့ မြို့ရပ်မိရပ်ဖတဦးက ပြောပါတယ်။

ဇန်နဝါရီ ၂၇ ရက် မနက် ၉ နာရီလောက်ကစတင်ပြီး စစ်ကောင်စီတပ်နဲ့ အမည်မသိ လက်နက်ကိုင်အဖွဲ့တွေကြား နှစ်ဖက်တိုက်ပွဲဖြစ်ခဲ့ပြီးတဲ့နောက် နေ့တိုင်း စစ်ကောင်စီ တပ်စခန်းတွေကနေ လက်နက်ကြီး ပစ်ခတ်နေတဲ့အတွက် ဒေသခံပြည်သူတွေဟာ ထွက်ပြေးတိမ်းရှောင်နေရတာပါ။

စစ်ကောင်စီရဲ့ လက်နက်ကြီးပစ်ခတ်မှုကြောင့် ဒေသခံပြည်သူတယောက် ထိမှန်ခဲ့သလို လူနေအိမ် ၈ လုံးနဲ့ ခရစ်ယာန်ဘုရားကျောင်း ထိမှန်ပျက်စီးခဲ့တဲ့အတွက် မြို့ခံပြည်သူတွေဟာ ဥယျာဉ်ခြံ၊ သံတောင်နဲ့ နီးစပ်ရာပျားစခန်း၊ ရွာကြီး၊ ကျောက်တိုင်၊ အန္တရာယ်ကွေ့၊ သူဌေးကုန်း၊ ချောင်းနှစ်ခွ စတဲ့ကျေးရွာတွေအပြင် သံတောင်ကြီး၊ တောင်ငူမြို့ စတဲ့နေရာတွေကို ထွက်ပြေးတိမ်းရှောင်နေရပါတယ်။

ထွက်ပြေးတိမ်းရှောင်နေရတဲ့ ကလေးသူငယ်တွေ၊ သက်ကြီးရွယ်အိုတွေ၊ ကိုယ်ဝန်ဆောင် မိခင်တွေနဲ့ မသန်စွမ်းသူတွေဟာ နေထိုင်စားသောက်ရေးမှာ အခက်အခဲတွေနဲ့ ပိုရင်ဆိုင်နေရပါတယ်။

သံတောင်မြို့ရပ်မိရပ်ဖတဦးက "ပြည်သူတွေအနေနဲ့ကတော့ ချက်ချင်းပြန်ချင်တာပေါ့။ ဒါပေမယ့် ပြည်သူတွေအတွက် အာမခံချက် ဘာမှမရှိတဲ့အတွက်ကြောင့် ပြန်ဖို့ တော်တော်ကြီးကို ပြောရခက်တယ်။ အိမ်ရာတွေ၊ တိရစ္ဆာန်တွေ အဲဒါတွေအတွက်တော့ စိတ်ပူရတာပေါ့။ တာဝန်ရှိ တဲ့ ပုဂ္ဂိုလ်တွေက ညှိနှိုင်းဆောင်ရွက်ကျဖို့ ကျနော်တို့ လိုလားတယ်။ ဒီအတိုင်းပဲ ဆက်ဖြစ်နေရတော့ ကျနော်တို့ ပြန်ဖို့အတွက် ခက်တယ်" လို့ ပြောပါတယ်။

ဇန်နဝါရီ ၄ ရက် ညနေ ၅ နာရီလောက်က သံတောင်ကြီး ဘုန်းကြီးလမ်းကနေဆင်းလာတဲ့ စစ်ကောင်စီတပ်ဖွဲ့ဝင်တွေဟာ ရပ်ကွက် ၁၊ သံတောင် အထကကျောင်းအနီးက ကေအန်ယူအုပ်ချုပ်ရေးမှူး နေအိမ်အပါအဝင် နေအိမ် ၃ လုံးကို မီးရှို့ဖျက်ဆီးခဲ့ပါတယ်။

အဆိုပါနေ့ မနက် ၅ နာရီလောက်က သံတောင်မြို့ (၁၃ မိုင်) သချိုင်းကုန်းအနီးမှာ သံတောင်ကြီး (ဘုရင်နောင်တပ်နယ်) ကနေ စစ်ကောင်စီတပ်ဖွဲ့ဝင်တွေ လိုက်ပါလာတဲ့ ကား ၂ စီး မိုင်းခွဲတိုက်ခိုက်ခံရတဲ့အတွက် စစ်ကောင်စီတပ်ဖွဲ့ဝင် ၁၀ ဦးထက်မနည်း ထိခိုက်သေဆုံးခဲ့တဲ့အတွက် အခုလို မီးရှို့ဖျက်ဆီးခဲ့တာလို့ စစ်ဘေးရှောင်အရေး ကူညီပေးနေသူတွေက ပြောပါတယ်။

ကရင်အမျိုးသားအစည်းရုံး (KNU) နယ်မြေတွေဖြစ်တဲ့ တပ်မဟာ ၇ ကလွဲရင် ကျန်နယ်မြေတွေမှာ စစ်ကောင်စီတပ်၊ နယ်ခြားစောင့် (BGF) ပူးပေါင်းတပ်တွေနဲ့ နယ်မြေစိုးမိုးနိုင်ဖို့ ကြိုးစားလာတဲ့အတွက် KNLA KNDO ကော်သူးတပ်မတော်၊ PDF မဟာမိတ်ပူးပေါင်းတပ်ဖွဲ့တွေနဲ့ နေ့တိုင်းတိုက်ပွဲတွေ ဖြစ်ပွားနေပါတယ်။

စစ်တပ်က အာဏာမသိမ်းခင်နဲ့ အာဏာသိမ်းပြီးနောက်ပိုင်း တိုက်ပွဲတွေကြောင့် ထွက်ပြေးလာတဲ့ ဒုက္ခသည်အရေအတွက်ဟာ ၁.၄ သန်းကျော်အထိ ရှိလာတယ်လို့ ကုလသမဂ္ဂ လူသားချင်းစာနာမှုဆိုင်ရာ ပေါင်းစပ်ညှိနှိုင်းရေးမှူးရုံး (UNOCHA) ကထုတ်ပြန်ထားပါတယ်။

ကယားပြည်နယ်၊ ဒီးမော့ဆိုမြို့နယ်တွင်းက စစ်ဘေးရှောင်ရောက်ရှိနေတဲ့ အရပ်သားပြည်သူ ၅၀၀၀ လောက်ဟာ ကရင်-ကယားနယ်စပ်မှာ နေထိုင်စားသောက်ရေး အခက်အခဲတွေနဲ့ ရင်ဆိုင်နေရတယ်လို့ အကူအညီပေးရေးအဖွဲ့တွေထံက သိရပါတယ်။

ကယားပြည်နယ်အတွင်း စစ်ကောင်စီတပ်တွေနဲ့ KNDF ပြည်သူ့ကာကွယ်ရေးတပ်ဖွဲတွေကြား တိုက်ပွဲတွေကြောင့် လွိုင်ကော်-တောင်ငူကားလမ်းကတဆင့် နီးစပ်ရာ ယာဒို၊ သောက်ရေခပ်၊ လိပ်သို၊ ထန်းတပင်၊ အင်းကျော်ကျေးရွာတွေမှာ အရပ်သားပြည်သူတွေ စစ်ဘေးရှောင်ခိုလှုံနေကြရတာပါ။

စစ်ရှောင်အရေးကူညီပေးနေသူတစ်ဦးက” ကျနော်တို့ ရထားတဲ့စာရင်းတွေအရ ၅၀၀၀ ကျော်နိုင်တယ်။ သူတို့အတွက် အခက်ခဲအခဲတွေက အများကြီးပဲ။ နေရာထိုင်ခင်း၊ စားသောက်ရေး၊ ဆေးဝါးတွေ လတ်တလောလိုအပ်နေတယ်။ ကျနော်တို့လည်း အတတ်နိုင်ဆုံးကြိုးစားပေးနေတယ်။ အလှူရှင်တွေလည်း တတ်နိုင်သလောက် တိုင်းရင်းသားမောင်နှမတွေအတွက် စာနာလှူဒါန်းပေးဖို့ နှိုးဆော်ချင်ပါတယ်”လို့ ပြောပါတယ်။

စစ်ဘေးရှောင် ရောက်ရှိနေသူတွေထဲမှာ သက်ကြီးရွယ်အိုတွေ၊ အမျိုးသမီးတွေနဲ့ ကလေးငယ်တွေ အများဆုံးပါဝင်ပြီး နေထိုင်မကောင်းသူတွေလည်း ပါဝင်တယ်လို့ သိရပါတယ်။

ကယားပြည်နယ်အတွင်း လက်ရှိဖြစ်ပွားနေတဲ့ တိုက်ပွဲတွေကြောင့် ကရင်နီဒေသတွင်းက စစ်ဘေးရှောင်နေပြည်သူတွေ သံတောင်မြို့ကိုမဝင်ရောက်နိုင်အောင် ယာဒိုကျေးရွာအနီးက စစ်ကောင်စီရဲ့(ယာဒို)တပ်စခန်းဂိတ်မှာ လုံခြုံရေးတင်းကျပ်ထားတယ်လို့ ဒေသခံတွေက ပြောပါတယ်။

ဖေဖော်ဝါရီ ၂၇ ရက်ကစတင်ပြီး တောင်ငူ၊ လွိုင်ကော်လမ်းကို ဆက်သွယ်သွားလာနေတဲ့ ကားလမ်းပိုင်းမှာ စစ်ကောင်စီရဲ့(ယာဒို)တပ်စခန်းက စစ်ဆေးမေးမြန်းတာတွေ ပိုမိုလုပ်ဆောင်လာတဲ့အပြင် ယာဉ်ဖြတ်သန်းသွားလာခွင့် ကန့်သတ်ထားပါတယ်။

ကရင်နီဒေသ KNDF ထိန်းချုပ်နယ်မြေတွေကို စစ်ကောင်စီရဲ့တပ်တွေက တောင်ငူ- သံတောင်- ဘောဂလိ- လွိုင်ကော်လမ်းပိုင်းကို စစ်ယာဉ်တန်းတွေ၊ အရပ်သားယာဉ်တွေကိုပါ အသုံးပြုပြီး လူ၊ လက်နက်ခဲယမ်းဖြည့်တင်းတာ ရိက္ခာပို့ဆောင်တာတွေကို အဓိကအသုံးပြုသွားလာနေတဲ့အတွက် မကြာခဏ မိုင်းဆွဲတိုက်ခိုက်ခံရလို့ စစ်ကောင်စီရဲ့တပ်ဖွဲ့ဝင်တွေ သေဆုံး၊ ဒဏ်ရာရှိသူတွေရှိတယ်လို့ ဒေသခံတွေဆီက သိရပါတယ်။