ကိုဗစ်-၁၉ ရောဂါပိုးကူးစက်မှု တဖန်ပြန်လည်မြင့်တက်လာနေပြီး ကူးစက်မှုအခြေအနေကို စစ်ကောင်စီရဲ့ ကျန်းမာရေးဝန်ကြီးဌာနက ထုတ်ပြန်ပေးနေပေမဲ့ နေပြည်တော်ဒေသခံအများစုက ကိုဗစ်ရောဂါထက် သဘာဝဘေးကြုံရမှာကို ပိုမိုစိုးရိမ်နေကြပါတယ်။
မြန်မာနိုင်ငံအတွင်း ကိုဗစ်-၁၉ ရောဂါကူးစက်မှုဟာ ပြီးခဲ့တဲ့ ဧပြီလကုန်ပိုင်း ကနေ ပြန်လည်မြင့်တက်လာခဲ့တာဖြစ်ပြီး အခုမေလ ပထမ ၁၀ ရက်အတွင်းမှာပင် ကူးစက်ခံရသူဦးရေ ၁၃၀၀ နီးပါးခန့်ရှိနေတယ်လို့ စစ်ကောင်စီရဲ့ ကျန်းမာရေးဝန်ကြီးဌာနက ထုတ်ပြန်ချက်တွေအရသိရပါတယ်။
မေလ ၄ ရက်နေ့ တစ်ရက်ထဲမှာပင် ကူးစက်ခံရသူ ၂၀၀ နီးပါးရှိတယ်လို့ ထုတ်ပြန်ခဲ့ပေမဲ့ နေပြည်တော်မှာတော့ ကိုဗစ်-၁၉ ရောဂါအတွက် အကာအကွယ်ကြိုတင်ပြင်မှုတွေ တွေ့မြင်ရခြင်းမရှိပါဘူး။
ပုဗ္ဗသီရိမြို့နယ်နေသူတစ်ဦးက "တစ်နေ့ဘယ်လောက်ကူးစက်နေတယ်ဆိုတာ သတင်းတွေထဲမှာတော့ ပါနေတာပဲ။ ဒီမှာတော့ ဘယ်သူမှ အဲ့လောက်စိတ်မဝင်စားကြတော့ဘူး။ နေပြည်တော်က သိပ်မကူးခံရတာလည်း ပါမှာပေါ့။ အခုလောလောဆယ် ဦးတို့ကတော့ မုန်တိုင်းသတင်းပဲ စိတ်ဝင်စားနေတာ။ ကိုယ့်ဆီမှာ ဒီလောက်မဖြစ်လာနိုင်ပေမယ့် ဖြစ်လာခဲ့ရင် ဆိုပြီး တွေးပူနေကြတာပေါ့ " လို့ ပြောပါတယ်။
ကိုဗစ်-၁၉ ရောဂါနဲ့ ပတ်သက်လို့ နေပြည်တော်အဝင်ဂိတ်တချို့မှာ စစ်ဆေးမှုတွေရှိနေပေမယ့် ဒေသအတွင်းမှာတော့ စည်းကမ်းကန့်သတ်မှုတွေ မရှိသေးသလို လူစည်ကားရာ နေရာတွေနဲ့ ဈေးတွေမှာလည်း Mask တပ်သူနည်းပါးနေတာဖြစ်ပါတယ်။
နေပြည်တော်မှာ သဘာဝဘေးနဲ့ပတ်သက်ပြီး ပြီးခဲ့တဲ့ ဧပြီ ၂၁ ရက်U လယ်ဝေးမြို့နယ်အတွင်း လေပြင်းတိုက်ခတ်မှုကြောင့် ကျေးရွာနှစ်ရွာမှ အိမ်ခြေ ၂၀၀ ကျော်ပျက်ဆီးဆုံးရှုံးခံ့သလို လူအသေအပျောက်လည်း ရှိခဲ့ပါသေးတယ်။
နေပြည်တော်၊ ဥတ္တရသီရိမြို့၊ ဇဝနသိဒ္ဓိရပ်ကွက်၊ ဘူတာမီးပွိုင့်မှာ မေလ ၃ ရက် ည ၇ နာရီက လုံခြုံရေးကင်း ပစ်ခတ်ခံရပြီး ရဲနှစ်ယောက် ဒဏ်ရာရရှိခဲ့တယ်လို့ မြို့ခံတွေဆီက သိရပါတယ်။
မနေ့ည ၇ နာရီကျော်က စစ်ကောင်စီတပ်နဲ့ ရဲတွေ စစ်ဆေးရေးလုပ်နေတဲ့ ဇဝနသိဒ္ဓိရပ်ကွက် ဘူတာမီးပွိုင့် လုံခြုံရေးကင်းကို ဗုံး၊ သေနတ်တွေနဲ့ ပစ်ခတ်တိုက်ခိုက်ခဲ့တာလို့ မြို့ခံတဦးက ပြောပါတယ်။
“ဗုံးနဲ့အရင်ပစ်တာ၊ ဗုံးပေါက်ပြီးတော့ သေနတ်သံတွေကြားရတယ်။ အပြန်အလှန်ပစ်တဲ့ ပုံစံမျိုး။ နောက်တော့ ဆေးရုံကားတွေ ရောက်လာတယ်။”
ဝဏ္ဏသိဒ္ဓိရပ်ကွက်ရှိ လုံခြုံရေးကင်း ပစ်ခတ်ခံရမှုကြောင့် ရဲတပ်ကြပ် ကြည်နိုင်နဲ့ ရဲတပ်သား အောင်ထိုက်တို့မှာ ထိခိုက်ဒဏ်ရာ ရရှိခဲ့တယ်လို့ ရဲတပ်ဖွဲ့နဲ့ နီးစပ်သူတဦးက ပြောပါတယ်။
“ရဲတပ်သားအောင်ထိုက်က ဒဏ်ရာရတာ များတယ်။ အခြေအနေမကောင်းဘူး။ စိုးရိမ်ရတယ်။ ရဲတပ်ကြပ် ကြည်နိုင်ကတော့ သိပ်မစိုးရိမ်ရဘူး။ နှစ်ယောက်စလုံး နေပြည်တော် ခုတင်တထောင်မှာ ဆေးကုသနေတယ်။”
ဥတ္တရသီရိမြို့နယ် လုံခြုံရေးကင်း ပစ်ခတ်ခံရပြီးနောက် ဒီနေ့မနက်မှာ သီရိမဏ္ဍိုင်လမ်းမကြီးပေါ်မှာ စစ်ကောင်စီတပ်နဲ့ ရဲတွေကို ပိုမိုချထားတယ်လို့ သိရပါတယ်။
ပြီးခဲ့တဲ့နှစ် စက်တင်ဘာ ၁၀ ရက် ညကလည်း ဥတ္တရသီရိမြို့နယ် မောင်ရမ်းကျေးရွာမှာ ပစ်ခတ်မှုဖြစ်ပြီး စစ်တပ်ထောက်ခံသူနှစ်ဦး သေဆုံးခဲ့ပါတယ်။
