ရခိုင်ပြည်နယ်က နေရပ်စွန့်ခွာထွက်ပြေးသွားသူတွေ ပြန်လည်လက်ခံရေးဆိုင်ရာ မြန်မာ-ဘင်္ဂလားဒေ့ရှ် ပူးတွဲ လုပ်ငန်းအဖွဲ့ရဲ့ ၅ ကြိမ်မြောက်အစည်းအဝေးကို ဇွန် ၁၄ ရက်နေ့က ဗီဒီယိုကွန်ဖရင့်နဲ့ ကျင်းပခဲ့တယ်လို့ စစ်ကောင်စီလက်အောက်ခံ နိုင်ငံခြားရေးဌာနက ထုတ်ပြန်ပါတယ်။
အစည်းအဝေးထုတ်ပြန်ချက်အရတော့ ဘင်္ဂလားဒေ့ရှ်နိုင်ငံကိုရောက်နေတဲ့ ရခိုင်ပြည်နယ်က နေရပ်စွန့်ခွာသူတွေကို ပြန်လက်ခံဖို့လုပ်ငန်းစတင်ဖို့အတွက် ပြင်ဆင်နေတုန်းပဲရှိသေးတယ်လို့ သိရပါတယ်။
အစည်းအဝေးမှာ ဘင်္ဂလားဒေ့ရှ်နိုင်ငံကိုရောက်နေတဲ့ နေရပ်စွန့်ခွာသူတွေကို ပြန်လည်လက်ခံရာမှာ နှစ်နိုင်ငံအကြား လက်မှတ်ရေးထိုးထားတဲ့ သဘောတူညီချက်တွေ၊ ကျန်းမာရေး ဝန်ကြီးဌာနရဲ့ ကိုဗစ်-၁၉ ရောဂါကာကွယ်၊ ထိန်းချုပ်၊ ကုသရေးဆိုင်ရာ လုပ်ထုံးလုပ်နည်းတွေနဲ့အညီ ပြန်လည်လက်ခံနိုင်ရေး၊ နေရပ်စွန့်ခွာသူတွေကို ပြန်လည်စိစစ်ရာမှာ ဖြစ်ပေါ်လာနိုင်တဲ့ ကိစ္စရပ်တွေကို အဖြေရှာနိုင်ဖို့ ဖွဲ့စည်းထားပြီးဖြစ်တဲ့ ရခိုင်ပြည်နယ်က နေရပ်စွန့်ခွာသူတွေကို ပြန်လည် လက်ခံရေးအတွက် စိစစ်ရေးလုပ်ငန်းစဉ်ဆိုင်ရာ မြန်မာ-ဘင်္ဂလားဒေ့ရှ် အထူးအဖွဲ့အကြား ဆက်လက်ညှိနှိုင်းဆောင်ရွက်သွားရေးတို့ကို ဆွေးနွေးခဲ့ကြတယ်လို့ ဆိုပါတယ်။
ပြီးတော့ နေရပ်စွန့်ခွာသူတွေကို လူဝင်မှုကြီးကြပ်ရေးဆိုင်ရာ စိစစ်ဆောင်ရွက်နေတဲ့အခြေအနေနဲ့ ကြုံတွေ့ရတဲ့ အခက်အခဲတွေဖြေရှင်းနိုင်ရေး၊ စိစစ်ပြီး နေရပ်စွန့်ခွာသူတွေကို ပြန်လည် လက်ခံရေးလုပ်ငန်း စတင်နိုင်ဖို့ အစီအမံတွေ ပြင်ဆင်ဆောင်ရွက်နေတဲ့လုပ်ငန်းတွေ၊ ပြန်လည် ဝင်ရောက်လာသူတွေကို ပြန်လည်နေရာချထားရေးအစီအမံတွေ၊ ပြန်လည်ဝင်ရောက်လာမယ့်သူတွေ ကိုယ့်ဆန္ဒအလျောက် နေရပ်ပြန်စေရေးအတွက် ယုံကြည်မှု တည်ဆောက်ရေးလုပ်ငန်း စတာတွေ ဆွေးနွေးခဲ့တယ်လို့လည်း ဆိုပါတယ်။
စစ်ကောင်စီလက်အောက်ခံ မြန်မာကိုယ်စားလှယ်အဖွဲ့ကတော့ ရခိုင်ပြည်နယ်မှာ လုံခြုံရေးနဲ့ တရားဥပဒေစိုးမိုးရေးတို့အတွက် ဆောင်ရွက်ထားတဲ့အခြေအနေတွေ၊ ပြန်လည်လက်ခံရေးစခန်းတွေ၊ ကြားစခန်းနဲ့ နေရာချထားပေးမယ့်ရွာတွေက အိမ်တွေကို ပြန်မွမ်းမံပြင်ဆင်နေတဲ့ အခြေအနေတွေ၊ ပြန်လည်ဝင်ရောက်လာမယ့်သူတွေအတွက် အသက်မွေးဝမ်းကြောင်း၊ ကျန်းမာရေးနဲ့ ပညာရေး ဝန်ဆောင်မှုပေးနိုင်ဖို့ ပြင်ဆင်ဆောင်ရွက်ထားတာ၊ ကောင်းမွန်တဲ့ ပတ်ဝန်းကျင် ဖန်တီးပေးရေးနဲ့ ပြန်လည်နေရာချထားရေး လုပ်ငန်းစဉ်မှာ မိတ်ဖက်နိုင်ငံတွေ၊ အာဆီယံနဲ့ ကုလသမဂ္ဂ လက်အောက်ခံ အဖွဲ့အစည်းတွေနဲ့ ပူးပေါင်းဆောင်ရွက်နေတာတွေကို ဆွေးနွေးခဲ့တယ်လို့ ဆိုပါတယ်။
ဒီအစည်းအဝေးကို စစ်ကောင်စီလက်အောက်ခံ နိုင်ငံခြားရေး ဝန်ကြီးဌာန၊ အမြဲတမ်းအတွင်းဝန် ဦးချမ်းအေးနဲ့ ဘင်္ဂလားဒေ့ရှ်နိုင်ငံခြားရေးဝန်ကြီးဌာန၊ နိုင်ငံခြားရေး အတွင်းဝန် မစ္စတာ မာစွတ် ဘင် မိုမမ်တို့က ပူးတွဲသဘာပတိအဖြစ် ဆောင်ရွက်ပြီး နှစ်နိုင်ငံပူးတွဲလုပ်ငန်းအဖွဲ့ အဖွဲ့ဝင်တွေ တက်ရောက်ခဲ့သလို မြန်မာ-ဘင်္ဂလားဒေ့ရှ် ပူးတွဲလုပ်ငန်းအဖွဲ့ရဲ့ ၆ ကြိမ်မြောက်အစည်းအဝေးလုပ်မယ့် ရက်နဲ့ နေရာတို့ကို သံတမန်လမ်းကြောင်းကတဆင့် နှစ်ဖက်ညှိနှိုင်း အကြောင်းကြားမယ်လို့လည်း စစ်ကောင်စီက ထုတ်ပြန်ထားပါတယ်။
ရခိုင်ပြည်နယ်မှာ ၂၀၁၇ ခုနှစ် သြဂုတ်လကဖြစ်ပွားခဲ့တဲ့ အကြမ်းဖက်မှုနဲ့ စစ်တပ်ရဲ့ နယ်မြေရှင်းလင်းမှုတွေကြောင့် ရခိုင်ပြည်နယ်၊ ဘူးသီးတောင်၊ ရသေ့တောင်၊ မောင်တောမြို့နယ်တွေရှိ မွတ်ဆလင်ကျေးရွာ ၁၀၀ ကျော်က တစ်ဖက်ဘင်္ဂလားဒေ့ရှ်နိုင်ငံဘက်သို့ထွက်ပြေးသွားခဲ့ကြရတဲ့ မွတ်ဆလင်ဒုက္ခသည် ၆ သိန်းနဲ့ ဟိန္ဒူ ၄၄၄ ဦးဟာ အခုအချိန်အထိ သူတို့နေထိုင်ရာမူလနေရာတွေကို ပြန်မလာနိုင်ကြသေးတာပါ။
ဘင်္ဂလားဒေ့ရှ်နိုင်ငံဘက် ထွက်ပြေးသွားခဲ့ကြရတဲ့ မွတ်ဆလင်နဲ့ ဟိန္ဒူဒုက္ခသည်တွေထဲက အယောက် ၁၀၀၀ ကျော်ကို ပြန်လည်လက်ခံဖို့ မြန်မာဘက်က အဆင်သင့်လုပ်ထားပြီး ဖြစ်တယ်လို့ ရခိုင်ပြည်နယ်စစ်ကောင်စီရဲ့ ပြောခွင့်ရသူက ပြောဆိုထားပေမဲ့ ယနေ့အထိပြန်လည်လက်ခံတာ မရှိသေးဘူးလို့ ဒေသခံ မွတ်ဆလင်နဲ့ ဟိန္ဒူအသိုက်အဝိုင်းကနေ သိပါတယ်။
မြန်မာဘက်ကတော့ ပြန်လည်လက်ခံရေးစခန်း ၂ ခုဖြစ်တဲ့ တောင်ပြိုပြန်လည်လက်ခံရေးစခန်း၊ ငါးခူရပြန်လည်လက်ခံရေးစခန်းအပြင် လှဖိုးခေါင်ယာယီပြန်လည်လက်ခံရေးစခန်းတွေ အဆင်သင့်အနေအထားလုပ်ဆောင်ထားပါတယ်။
ထွက်ပြေးသွားသူတွေကို ပြန်လည်လက်ခံဖို့ အန်အယ်လ်ဒီအစိုးရလက်ထက် ၂၀၁၈ ခုနှစ် ဇန်နဝါရီ ၂၃ ရက်ကတစ်ကြိမ် ၂၀၁၈ ခုနှစ်၊ နိုဝင်ဘာ ၁၅ ရက်ကတကြိမ် နှစ်ကြိမ်တိုင်တိုင်ကြိုးစားခဲ့ဖူးပေမဲ့ ဘင်္ဂလားဒေ့ရှ်ဘက်က တယောက်မှ ပြန်ပို့ပေးခဲ့ခြင်း မရှိသေးပါ။၏
