စစ်ကိုင်းတိုင်း၊ ကလေးမြို့မှာ စစ်အာဏာရှင်ဆန့်ကျင်ရေး ငြိမ်းချမ်းစွာဆန္ဒပြခဲ့ကြတဲ့ ပင်မသပိတ်အဖွဲ့ဝင်တွေရဲ့ နေအိမ် ၄ လုံးကို စစ်ကောင်စီက ချိပ်ပိတ်လိုက်တဲ့အပြင် စစ်ကောင်စီတပ်သားတွေက JCB (မြေထိုးစက်) တွေနဲ့ ဖြိုချဖျက်ဆီးသွားတယ်လို့ မြို့ခံတွေက ပြောပါတယ်။

ဧပြီ ၁၉ ရက် ညနေပိုင်းကစတင်ပြီး သပိတ်အဖွဲ့ဝင်တွေရဲ့ နေအိမ်တွေကို စစ်ကောင်စီတပ်သားတွေက ပါဂျဲရိုးကား အနက်တစီး၊ စစ်ကားအသေး ၂ စီး၊ စစ်ကားအကြီး ၁ စီးနဲ့ JCB (မြေထိုးစက်) တွေနဲ့ လာရောက်ဖြိုဖျက်ခဲ့တာလို့ မျက်မြင်တွေ့ခဲ့တဲ့ မြို့ခံတဦးက ဒီဗွီဘီကို ပြောပါတယ်။

“သူတို့လာတော့ လမ်းထဲကို ထွက်မကြည့်ခိုင်းဘူး။ လမ်းကြောင်းရှင်းထားတာ။ စစ်သားအင်အား ၃၀ လောက်ရှိမယ်။ အိမ်တွေကို မြေတူးစက်နဲ့ ဖြိုဖျက်ပြီး ပြန်လှည့်သွားကြတာ။”

ဧပြီ ၁၆ ရက် သင်္ကြန်အတက်နေ့က ကလေးပင်မသပိတ်အဖွဲ့ဝင် ကိုသန်းစိုးဦး၊ ကိုမျိုးကိုဝင်း၊ မနှင်းစံနဲ့ မကျင်ဒိတ်ကင်တို့ဟာ တော်လှန်သင်္ကြန်သပိတ်ပြုလုပ်စဉ် စစ်ကောင်စီပတ်ကင်းနဲ့ တွေ့ဆုံကာ ဖမ်းဆီးခံခဲ့ရပြီးနောက် ညနေပိုင်းမှာ နေအိမ်တွေကိုချိပ်ပိတ်ကာ မိသားစုဝင်တွေကိုပါ ဖမ်းဆီးသွားခဲ့တာလို့ ဆိုပါတယ်။

စစ်ကောင်စီတပ်သားတွေ ဖြိုဖျက်လိုက်တဲ့ နေအိမ်တွေကတော့ ပင်မသပိတ်အဖွဲ့ဝင် ကိုဗိုက်ပူ၊ မနှင်းစံ၊ မပွားလေးနဲ့ မကျင်ဒိတ်ကင်တို့ရဲ့ နေအိမ်တွေကို ဖျက်ဆီးသွားခဲ့တာ ဖြစ်ပါတယ်။

နေအိမ်ဖြိုဖျက်ခံလိုက်ရလို့ တော်လှန်ရေးစိတ်ကတော့ ယိမ်းယိုင်မသွားဘဲ ဒီတော်လှန်ရေးမှာ အဆုံးထိပါဝင်ကာ စစ်ကောင်စီကို ဆန့်ကျင်တော်လှန်သွားမယ်လို့ ကျန်ရှိခဲ့တဲ့ သပိတ်အဖွဲ့ဝင်တွေက ပြောပါတယ်။

မန္တလေးတိုင်း ပြည်ကြီးတံခွန်မြို့နယ် ရဲဘော်ကွက်သစ်ရပ်ကွက်က ဘူဒိုဇာနဲ့ ထိုးချဖျက်ဆီးခံခဲ့ရတဲ့ နေအိမ် ၂၀၀ ကျော်က လူဦးရေ ၁၀၀၀ လောက် စားဝတ်နေရေး အခက်အခဲ ကြုံနေကြရတယ်လို့ သိရပါတယ်။
ပြီးခဲ့တဲ့ ဖေဖော်ဝါရီ ၂၆ ရက်နေ့ မနက် ၁၀ နာရီလောက်က စစ်ကောင်စီတပ်၊ ရဲနဲ့ စည်ပင်ဝန်ထမ်းတွေက ဓာတ်ကြိုးမလွတ်လို့ဆိုပြီး တာဝါတိုင်အောက်ဘက်နားရောက်နေတဲ့ ဂရန်ပေါက်ပြီးသား လူနေအိမ် ၂၀၀ ကျော် ဘူဒိုဇာနဲ့ ထိုးချဖျက်ဆီးသွားခဲ့တာပါ။
ဖျက်ဆီးခံလိုက်ရတဲ့ အိမ်ပိုင်ရှင်တဦးက “မနက် ၈ နာရီထိ ဘာမှမသိရသေးဘူး။ ၉ နာရီဝန်းကျင်မှာ သူတို့ရောက်ပြီး ဓာတ်ကြိုးမလွတ်လို့ ၁ နာရီအတွင်း ပစ္စည်းတွေသိမ်းပြီး ဖယ်ခိုင်းတယ်ဆိုတာ အမေ ဖုန်းဆက်ပြောမှ သိရတာ။ မနက် ၁၀ နာရီမှာ အပြီးထွက်ပေးရမယ်တဲ့။ သံတိုသံစကောက်တဲ့ လူတွေကလည်း သူ့ပစ္စည်း ကိုယ့်ပစ္စည်းမှန်းမသိ ဝင်ယူကြတယ်။ အိမ်ဆောက်ထားပြီး လူမနေတဲ့ အိမ်တွေဆို ရေစက်တွေကအစ ဝင်ယူသွားကြတာ။ ၂၆ ရက်နေ့ တရက်ပဲ အိမ်တွေလာဖျက်သွားပြီး အခုထိ ဆက်မလာတော့ကြောင့် အိမ်ဝိုင်းပိုင်ရှင်တွေက ကိုယ့်မြေနေရာလေးမှာ ပြန်ရနိုးနိုးနဲ့ တဲလေးတွေထိုးပြီး အိပ်နေကြတယ်။ တချို့ဆို ငိုယိုပြီး တက်သွားကြလို့ ဆေးရုံဆေးခန်းပို့ရတဲ့အထိ ဖြစ်သွားကြတယ်” လို့ ပြောပါတယ်။
ဖျက်ဆီးခံလိုက်ရတဲ့ အိမ်ပိုင်ရှင် နောက်တဦးက “အဓိကကတော့ မိန်းမသားတွေပေါ့။ ယောက်ျားရင့်မာကြီးတွေတောင် မျက်ရည်လည်ကြသေးတာပဲ။ ပုံမှန် လစာကောင်းတခုရှိတဲ့ ကျမတို့တောင် စားဝတ်နေရေး ခုထိ အဆင်မပြေသေးတာ၊ တချို့မိသားစုတွေ တော်တော်ဒုက္ခရောက်နေကြတယ်” လို့ ပြောပါတယ်။
နေအိမ်ဖျက်ဆီးခံရသူတွေဟာ အိမ်ငှားရာမှာလည်း နိုင်ငံရေးနဲ့ မလွတ်မှာ စိုးရိမ်ပြီး အိမ်ပိုင်ရှင်တွေက လက်မခံကြတာကြောင့် လမ်းဘေးမှာ အိပ်နေကြရတယ်လို့ ဆိုပါတယ်။
အနီးအနားက ဘုန်းကြီးကျောင်းတွေ၊ ဓမ္မာရုံတွေမှာ ခိုကပ်နေသူတွေရှိသလို တချို့လည်း ပစ္စည်းလောက်ပဲ ဘုန်းကြီးကျောင်းထဲ လွတ်ရင်ပြီးရော ပုံထားကြပြီး စားဝတ်နေရေး အရမ်းခက်ခဲနေကြရတယ်လို့ သိရပါတယ်။
နေအိမ်ဖျက်ဆီးခံရတဲ့သူတွေဟာ ရဲဘော်ကွက်သစ်ရပ်ကွက်အတွင်းမှာ နှစ် ၄၀ ကျော် နေထိုင်လာကြတာဖြစ်ပြီး အိမ်ဝိုင်းဂရန်ပေါက်ပြီးသားတွေ ဖြစ်တယ်လို့ ဒေသခံတဦးက ဒီဗွီဘီကို ပြောပါတယ်။
ပြီးခဲ့တဲ့ လပိုင်းတုန်းကလည်း စစ်ကောင်စီက အောင်မြေသာစံမြို့နယ်၊ ချမ်းမြသာစည်မြို့နယ်နဲ့ အမရပူရမြို့နယ်အတွင်းရှိ ရထားသံလမ်းဘေးက နေအိမ်တွေကို ဖယ်ရှားခိုင်းတာ၊ ကမ်းနားလမ်းဘေးက တဲအိမ်တွေကို ဖယ်ရှားရှင်းလင်းတာတွေ လုပ်ဆောင်ခဲ့ပါတယ်။