စစ်ကိုင်းတိုင်း ရေဦး၊ ရွှေဘို၊ ဒီပဲယင်း ၊ အရာတော်မြို့နယ်ရှိ ကျေးရွာပေါင်း ၃၈ ရွာမှ မီးရှို့ဖျက်ဆီးခံခဲ့ရတဲ့ ပြည်သူတွေအတွက် နေအိမ်တွေကို S&C မီးဘေး စစ်ဘေးပညာရေး ကူညီစောင့်ရှောက်ရေးအဖွဲ့က ဦးဆောင်ကာ တည်ဆောက်လှူဒါန်းခဲ့တာ နေအိမ် ၆၀၀ ရှိသွားပြီလို့ သိရပါတယ်။
ပြီးခဲ့တဲ့ သုံးလအတွင်းမှာ နေအိမ်အလုံး ၅၀၀ တည်ဆောက်ပြီးစီးခဲ့ပြီး အခု ဧပြီ ၅ ရက်နေ့မှာတော့ လေးလအတွင်း စုစုပေါင်း နေအိမ် ၆၀၀ ပြည့်သွားတာလို့ သိရပါတယ်။
“အိမ်တွေပြန်တည်ဆောက်ဖို့ အဓိကကျတဲ့ ငွေကြေး အခက်အခဲတွေ၊ သွားလာရခက်ခဲတဲ့ နေရာတွေ၊ အသက် ဘေးအန္တရာယ်အခက်အခဲတွေ၊ သယ်ယူပို့ဆောင်ရေး အခက်အခဲတွေ စသည်ဖြင့် အခက်အခဲမျိုးစုံကြားကနေပြီး နေအိမ်မီးရှို့ခံရတဲ့ ပြည်သူများအတွက် နားခိုစရာအရိပ်အဖြစ် အိမ်တွေ တည်ဆောက် ပေးနိုင်ခဲ့တာ၊ မီးရှို့ခံထားရတဲ့ ကျေးရွာများအတွက် နေအိမ်များ ပြန်လည် တည်ဆောက်ပေးဖို့ အိမ်အလုံးရေ ၁၀၀၀ အထိ ရည် ရွယ်ထားတယ်” လို့ S&C မီးဘေး စစ်ဘေးပညာရေး ကူညီစောင့်ရှောက်ရေး အဖွဲ့တာဝန်ရှိသူက ပြောပါတယ်။
ပြည်တွင်းပြည်ပ အလှူရှင်တွေ စုပေါင်းတည်ဆောက် လှူဒါန်းထားတဲ့ နေအိမ်တွေ ပြည်သူကို အပ်နှံတဲ့အချိန်မှာလည်း အညာမြေဒေသ ပြန်လည် စိမ်းလန်းစေဖို့ ရည်ရွယ်ချက်နဲ့ အိမ်ရှင်ပြည်သူက သစ်ပင် ၅ ပင်ကို မဖြစ်မနေ စိုက်ပေးရတယ်လို့လည်း သိရပါတယ်။
မတ်လ ၁ လတာအတွင်း NUG အစိုးရ၊ ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာန၊ မီးသတ်ဦးစီးဌာနက စာရင်းပြုစု ထုတ်ပြန်ချက်အရ စစ်ကောင်စီတပ်တွေဟာ စစ်ကိုင်းတိုင်းထဲမှာ အကြိမ်ရေ ၅၀ မီးရှို့ဖျက်ဆီးမှုတွေပြုလုပ်ခဲ့ပြီး မီးလောင်ပျက်စီးခဲ့ရတဲ့ နေအိမ်ပေါင်း ၃,၁၀၇ လုံးအထိ ရှိခဲ့တယ်လို့ သိရပါတယ်။
စစ်ကောင်စီတပ်တွေ စစ်ကြောင်းထိုး ဝင်ရောက် အကြမ်းဖက်မီးရှို့ဖျက်ဆီးခံခဲ့ရတဲ့ စစ်ကိုင်းတိုင်းထဲက ကျေးရွာတွေအတွက် ပြည်တွင်းပြည်ပ အလှူရှင်တွေရဲ့ စုပေါင်းလှူဒါန်းမှုနဲ့အတူ နေအိမ်အလုံးပေါင်း ၅၀၀ အထိ တည်ဆောက်ပြီးစီးခဲ့ပြီလို့ S&C မီးဘေး စစ်ဘေး ပညာရေးကူညီစောင့်ရှောက်ရေးအဖွဲ့ တာဝန်ခံက ပြောပါတယ်။
သုံးလအတွင်း အိမ်ခြေအလုံး ၅၀၀ ကို တည်ဆောက်ပေးခဲ့တာဖြစ်ပြီး ကျေးရွာပေါင်း ၃၇ ရွာအတွက် ပြန်လည်တည်ဆောက်ပေးဖို့ အိမ်အလုံး ၁,၀၀၀ ရည်ရွယ်ထားကာ စစ်ကိုင်းတိုင်းထဲမှာတော့ နေအိမ်ဆုံးရှုံးမှုက သိန်းနဲ့ချီရှိတယ်လို့ ဆိုပါတယ်။
လက်ရှိမှာလည်း မီးဘေးသင့်ပြည်သူတွေအနေနဲ့ စားသောက်ကုန်နဲ့ နေအိမ်တွေ ပြန်လည်တည်ဆောက်ဖို့ လိုအပ်ချက်တွေ အများကြီးရှိနေသေးတယ်လို့လည်း S&C မီးဘေး စစ်ဘေးပညာရေး ကူညီစောင့်ရှောက်ရေးအဖွဲ့ တာဝန်ခံက ပြောပါတယ်။
ပြီးခဲ့တဲ့ ဖေဖော်ဝါရီ ၂၀ ရက်ကလည်း စစ်ကိုင်းတိုင်း၊ ထူးကြီးကျေးရွာမှာရှိတဲ့ ကာလတန်ဖိုး သိန်းပေါင်း သောင်းဂဏန်းဝန်းကျင်ရှိတဲ့ ရက်ကန်းစင်ပေါင်း ရာချီနီးပါးကို စစ်ကောင်စီတပ်တွေ မီးရှို့ဖျက်ဆီးခဲ့တာကြောင့် ရက်ကန်းစင်တွေ မီးလောင်ဆုံးရှုံးကုန်ပြီး S&C အဖွဲ့အနေနဲ့ အလှူရှင်တွေနဲ့ စုပေါင်းကာ လစဉ် ရက်ကန်းစင် ၁၀ စင်နှုန်းနဲ့ ပြန်လည်ကူညီထောက်ပံ့ပေးခဲ့ ပါတယ်။
အမျိုးသားညီညွတ်ရေးအစိုးရရဲ့ စာရင်းပြုစုချက်တွေအရ ပြီးခဲ့တဲ့ ဖေဖော်ဝါရီ တလတာအတွင်း စစ်ကိုင်းတိုင်းထဲမှာ မီးရှို့ခံရတဲ့အကြိမ်ရေ ၇၃ ကြိမ်နဲ့ အများဆုံး ကျူးလွန်ခဲ့ကြပြီး စစ်ကောင်စီတပ်တွေ မီးရှို့ဖျက်ဆီးခဲ့လို့ မီးလောင်ပျက်စီးခဲ့ရတဲ့ အရပ်သားနေအိမ် ၆,၆၆၂ လုံးအထိ ရှိခဲ့ပြီး ထိခိုက်ပျက်စီးခဲ့တဲ့ ဘာသာရေး အဆောက်အဦမျိုးစုံ ၄ လုံးနဲ့ စာသင်ကျောင်း ၁၀ ကျောင်း၊ ဆေးရုံနဲ့ ကျေးလက်ဆေးပေးခန်း ၂ ခု ရှိခဲ့တယ်လို့လည်း ထုတ်ပြန်ထားပါတယ်။
