စစ်ကိုင်းတိုင်း ခင်ဦးမြို့နယ်ထဲ မတ် ၅ ရက်ကနေ ၁၅ ရက်အထိ စစ်ကောင်စီတပ်တွေ မီးရှို့ခဲ့တာကြောင့် ကျေးရွာ ၄ ရွာက ပြည်သူတွေရဲ့နေအိမ် ၁၀၀ ကျော် ဆုံးရှုံးခဲ့ရပြီး ပြည်သူ ၃ ဦးအသတ်ခံရကာ PDF ရဲဘော် ၁၅ ဦး ကျဆုံးခဲ့တယ်လို့ ဒေသခံ စစ်ဘေးရှောင်ကူညီကယ်ဆယ်ရေးပရဟိတသမားတွေက ပြောပါတယ်။
အခုလို စစ်ကောင်စီက ကျေးရွာအတွင်း နေအိမ်မီးရှို့တာတွေ လုပ်ဆောင်ခဲ့တာကြောင့် ဒေသခံပြည်သူတွေ နေထိုင်ရေး အလွန်အမင်း ဒုက္ခရောက်နေကြရတယ်လို့ သိရပါတယ်။
ဒါန်းကုန်ရွာက နေအိမ် ၄၃ လုံး၊ မှန်တောရွာက နေအိမ် ၃၈ လုံး၊ ကျွန်းလယ်ရွာက နေအိမ် ၂ လုံး၊ ယာစောင့်တဲ ၅ လုံး၊ သက်ပေးရွာက နေအိမ် ၁၃ လုံး မီးရှို့ခံခဲ့ရတယ်လို့ ဒေသခံတဦးက ပြောပါတယ်။
“ခုဆို အဲဒီရွာက လူတွေ အတော်လေးဒုက္ခရောက်နေကြတယ်။ နွေရာသီဆိုတော့ သောက်သုံးရေတွေ၊ အမိုးအကာတွေ အရေးပေါ်တော့ လိုအပ်နေတယ်ဗျ။ ဒီကောင်တွေက နေအိမ်ပါမကဘူး ပြည်သူတွေလည်း သတ်ဖြတ်ခဲ့တယ်။”
ပြည်သူတွေဖြစ်တဲ့ ကိုသန်းငွေ၊ ကိုမျိုးကျော်နဲ့ ဦးကျွိတို့ အသတ်ခံရပြီး သိမ်တော်ရွာနားတိုက်ပွဲမှာ ကျဆုံးခဲ့တဲ့ ခင်ဦးပြည်သူ့ကာကွယ်ရေးအဖွဲ့ဝင်တွေကတော့ အသက် ၁၇ နှစ်ကနေ ၆၃ နှစ်အရွယ်တွေဖြစ်တဲ့ မောင်စည်သူနိုင်၊ မောင်ဖြိုးနန်း၊ မောင်သက်မျိုးနိုင်၊ မောင်ပြည့်ဖြိုးအောင်၊ မောင်စောလင်းမောင်၊ မောင်ဇော်ထက်၊ မောင်ဝေယံမြင့်လွင်၊ မောင်အောင်ငြိမ်း၊ မောင်ဝင်းဌေး၊ မောင်ဖိုးစိုး(ခ)ဝင်းမြအောင်၊ ဦးခင်မောင်တိုး၊ ဦးအောင်ဇော်မိုး၊ ဦးအောင်နိုင်၊ ဦးဘိုဝင်းနဲ့ ဦးစိုးတင့်တို့ ဖြစ်ပါတယ်။
ခင်ဦးမြို့နယ်အတွင်း စစ်ကောင်စီ ခလရ ၇၇ တပ်ရင်းက အင်အား ၂၀၀ လောက်ဟာ နေအိမ်တွေနဲ့ ပြည်သူတွေကို မီးရှို့သတ်ဖြတ်ပြီး ကျေးရွာတွေကို အဖွဲ့ခွဲစစ်ကြောင်း ထိုးနေတာကြောင့် ကျေးရွာ ၂၀ လောက်က ပြည်သူတွေ စစ်ဘေးရှောင်နေကြရတယ်လို့ ဒေသခံတွေက ပြောပါတယ်။
မွန်ပြည်နယ်၊ ဘီးလင်းမြို့နယ်၊ ဇုတ်သုတ်ကျေးရွာအုပ်စုမှာ ဒီကနေ့ ဇူလိုင် ၂၃ ရက်နေ့ ညနေ ၃ နာရီအချိန်လောက်က လေဆင်နှာမောင်း တိုက်ခတ်မှုကြောင့် နေအိမ် ၁၀၀ နီးပါး ပျက်စီးခဲ့တယ်လို့ ဘီးလင်းမြို့နယ် လူမှုကယ်ဆယ်ရေးအဖွဲ့တွေက DVB ကို ပြောပါတယ်။
လေဆင်ဆင်နှာမောင်း တိုက်ခတ်မှုကြောင့် ဇုတ်သုတ်ကျေးရွာနဲ့ အနိုင်းပွန်းကျေးရွာအတွင်းရှိ နေအိမ်အလုံး ၂၀ ပြိုကျ ပျက်စီးခဲ့ပြီး၊ အမိုးအလန်ပြီး ထိခိုက်ပျက်စီးမှု ဖြစ်ပေါ်ခဲ့တဲ့ အိမ်ခြေ ၈၀ နီးပါး ရှိပါတယ်။
လေဆင်နှာမောင်းတိုက်ခတ်မှုကြောင့် လူသေဆုံးတာ မရှိပေမယ့် ထိခိုက်ပွန်းပဲ့ ဒဏ်ရာရရှိသူ ၁၀ ဦးထက် မနည်းရှိခဲ့ပါတယ်။
လေဆင်နှာမောင်းတိုက်ခတ်မှုကြောင့် လေဘေးသင့် ပြည်သူ ရာချီရှိနေပြီး သူတို့အတွက် အကူအညီတွေ လိုအပ်နေတယ်လို့ ဆိုပါတယ်။
လေဘေးသင့်ပြည်သူတွေအတွက် ဇုတ်သုတ်ကျေးရွာ အထက်တန်းကျောင်းမှာ ယာယီကယ်ဆယ်ရေးစခန်းဖွင့်လှစ်ဖို့ စီစဉ်နေပါတယ်။
လက်ရှိမှာတော့ လေဆင်နှာမောင်းတိုက်ခိုက်မှုကြောင့် ပြိုကျပျက်စီးခဲ့တဲ့ နေအိမ်တွေကို သက်ဆိုင်ရာ ကယ်ဆယ်ရေးအဖွဲ့တွေက ရှင်းလင်းပေးနေပါတယ်။
