မွန်ပြည်နယ်၊ သံဖြူဇရပ်မြို့နယ် အမျိုးသားဒီမိုကရေစီအဖွဲ့ချုပ် NLD ပါတီ အလုပ်အမှုဆောင် နေအိမ်အပါအဝင် နေအိမ် ၃ လုံးကို စစ်ကောင်စီက လာရောက်ချိပ်ပိတ်သွားတယ်လို့ မိသားစုနဲ့ နီးစပ်သူတွေက ဒီဗွီဘီကို ပြောပါတယ်။
ပြီးခဲ့တဲ့ ဇူလိုင် ၂၁ ရက်နေ့က သံဖြူဇရပ်မြို့နယ် ကျုံကဒက်ကျေးရွာရှိ NLD ပါတီ မြို့နယ် အလုပ်အမှုဆောင် ဦးမင်းအောင် နေအိမ်နဲ့ သံဖြူဇရပ်မြို့က တက်ကြွလှုပ်ရှားသူတွေဖြစ်တဲ့ ဦးရဲလင်းထွန်းနဲ့ ဦးပိုင်စိုးတို့ရဲ့ နေအိမ်တွေကို စစ်ကောင်စီတပ်ဖွဲ့ဝင်တွေနဲ့ အုပ်ချုပ်ရေးအဖွဲ့တွေက လာရောက် ချိပ်ပိတ်သွားတာပါ။
စစ်ကောင်စီကတော့ သူတို့ ၃ ဦးဟာ အကြမ်းဖက်အဖွဲ့အစည်းနဲ့ ဆက်စပ်တဲ့အတွက် နေအိမ်တွေကို နိုင်ငံတော်ပိုင်အဖြစ် သိမ်းဆည်းမှာဖြစ်တာကြောင့် ချိပ်ပိတ်ရတာလို့ ဆိုထားပါတယ်။
သံဖြုဇရပ်မြို့ခံတဦးကတော့ NLD ပါတီ မြို့နယ်အလုပ်မှုဆောင် ဦးမင်းအောင်ကို စစ်ကောင်စီက သံဖြူဇရပ်မြို့ အဝင်အထွက်တွေမှာ အကြမ်းဖက်သောင်းကျန်းသူအဖြစ် ဗွီနိုင်းချိတ်ဆွဲထားတယ်လို့ ပြောပါတယ်။
ဒါအပြင် ဦးမင်းအောင်ရဲ့ နေအိမ် လာရောက် ချိပ်ပိတ်စဉ် ညီမဖြစ်သူနဲ့အတူ မိသားစုဝင်တွေကိုလည်း နေအိမ်ကနေ ချက်ချင်းဆင်းခိုင်းခဲ့တယ်လို့ ဆိုပါတယ်။
နေအိမ် ချိပ်ပိတ်ခံရတဲ့ NLD ပါတီ မြို့နယ်အလုပ်မှုဆောင် ဦးမင်းအောင်နဲ့ တက်ကြွလှုပ်ရှားသူတွေ ဖြစ်တဲ့ ဦးရဲလင်းထွန်းနဲ့ ဦးပိုင်စိုးတို့ကို စစ်ကောင်စီက ရာဇသတ်ကြီး ဥပဒေ ပုဒ်မ ပုဒ်မ ၅၀၅ အပြင် အကြမ်းဖက် ဥပဒေတွေနဲ့ပါ အမှုဖွင့်ထားပါတယ်။
မွန်ပြည်နယ်မှာတော့ စစ်တပ်အာဏာသိမ်းတဲ့ တနှစ်ကျော်ကာလအတွင်း NLD ပါတီအမတ်တွေ၊ NLD ပါတီဝင်တွေနဲ့ တက်ကြွလှုပ်ရှားသူ နေအိမ် ၁၀ လုံးထက်မနည်း ချိပ်ပိတ်ခံထားရပါတယ်။
စစ်ကိုင်းတိုင်း၊ ကလေးမြို့နယ်မှာ ဧပြီ ၂၉ ရက်က စစ်ကောင်စီတပ်က ကြံသာကျေးရွာနဲ့ မြောက်စည်းကျေးရွာဘက်ကနေ တင်သားအုပ်စုက ကျေးရွာတွေကို လက်နက်ကြီးတွေ နဲ့ အဆက်မပြတ် ပစ်ခတ်နေတယ်လို့ ဒေသခံတွေဆီက သိရပါတယ်။
လက်နက်ကြီး ပစ်ခတ်မှုကြောင့် အရှေ့စည်းရွာက ဒေသခံလူနေအိမ် ၃ လုံး မီးလောင် ပျက်စီး သွားပြီး နေအိမ် ၂ လုံး ထိခိုက်ပျက်စီးသွားတယ်လို့ အရှေ့စည်းရွာကဒေသခံတစ်ဦးက ပြောပါတယ်။
"လက်နက်ကြီးတွေနဲ့ အကြောင်းမဲ့ ပစ်နေတာ။ ဒါကြောင့်ရွာမှာ မနေရဲကြဘူး။ ပြေးနေကြရတာ အခုလည်း ရွာထဲကနေ အိမ်တွေ လက်နက်ကြကျပြီး မီးလောင်သွားတယ်။ အရင်တခါကလည်း လက်နက်ကြီမှန်လို့ အဖိုး ဦးဖိုးတုတ်လည်း ဆုံးခဲ့ရပြီးပြီ။"
လက်ရှိမှာတော့ ဒေသခံပြည်သူတွေဟာ စစ်ကောင်စီရဲ့ လက်နက်ကြီးရန်နဲ့ တိုက်ပွဲတွေကြောင့် ဘေးလွတ်ရာတောတောင်ဒေသတွေမှာ နေထိုင်နေကြရပြီးနေထိုင်စားသောက်ရေး အခက်အခဲတွေ ဖြစ်ပေါ်နေပါတယ်။
လက်တလောမှာတင်သား ကျေးရွာအုပ်စုအတွင်းမှာ စစ်ကောင်စီတပ်သားတွေနဲ့ ကလေး PDF မဟာမိတ်ပူးပေါင်းတပ်ဖွဲ့တွေကြား တိုက်ပွဲတွေ မကြာခဏဖြစ်ပွားနေပါတယ်။
ဧပြီ ၁၂ ရက်ကလည်း စစ်ကောင်စီတပ်သားတွေက နန်းကသည်းမြစ်တစ်ဖက်ကမ်းရှိ မြောက်စည်းရွာကနေ အရှေ့စည်းရွာဘက်ကို လက်နက်ကြီးနဲ့ပစ်ခတ်ခဲ့တာကြောင့် ဒေသခံအသက် ၆၆ နှစ်အရွယ်ရှိ ဦးဖိုးတုတ်မှာ လက်နက်ကြီးမှန်ပြီး သေဆုံးခဲ့ပါသေးတယ်။
