စစ်အာဏာရှင်၊ တစ်ပါတီအာဏာရှင် ဘယ်လိုအာဏာရှင်မျိုးပဲဖြစ်ဖြစ် သူတို့ရဲ့ နောက်ဆုံးလက်ကျန် အချိန်တွေမှာ အဆိုးဝါးဆုံး၊ ရက်စက် အကြမ်းကြုတ်ဆုံးနည်းလမ်းတွေသုံးပြီး ပြည်သူလူထုကို ဖိနှိပ်သတ်ဖြတ်ညှဉ်းပန်းပြီး သူတို့ဆက်လက် ရှင်သန်နိုင်ရေးအတွက် အားကုန် ရုန်းကန်လေ့ရှိပါတယ်။

ထို့အတူပါပဲ စစ်ရာဇဝတ်ကောင်တွေ ဘယ်လောက်ပဲ ရက်စက်ရက်စက်၊ ဘယ်လောက်ပဲ လူမဆန်စွာ ဖိနှိပ်သတ်ဖြတ်ဖျက်ဆီးနေပေမဲ့ အခြေခံပြည်သူလူထုက လုံးဝလက်မခံတော့တာ ၁၀၀ ရာခိုင်နှုန်း သေချာနေတာမို့ အာဏာရူးမအလနဲ့ လက်ပါးစေ စစ်အခွင့်ထူးခံ အာဏာရှင်မျိုးဆက်ဟာ မြန်မာနိုင်ငံရဲ့ နောက်ဆုံးစစ်အာဏာရှင်မျိုးဆက် ဖြစ်ရတော့မှာ လူတိုင်း မြင်သာနေပါပြီ။

မြန်မာနိုင်ငံမှာ ပြည်သူ့ဆန္ဒကို ဆန့်ကျင်ပြီး လက်ရှိအချိန်ထိ ဒုက္ခအကြီးအကျယ်ပေးနေဆဲ စစ်အခွင့်ထူးခံအင်အားစုတွေထဲက နောက်ဆုံးပေါ် မျိုးစိတ်အသစ်ဖြစ်တဲ့ ဟိုက်ဘရစ် ကပြားစစ်အာဏာရှင်တွေဟာ သူတို့အရင်က ပေါ်ထွန်းခဲ့ဖူးတဲ့ စစ်အာဏာရှင်မျိုးစိတ်တွေထက် ပိုအန္တရာယ်ပေးနိုင်၊ အဖျက်စွမ်းအားပိုကြီးတယ်ဆို‌ပေမဲ့ လက်ရှိ နိုင်ငံ‌ရေးဖြစ်ထွန်းမှုတွေက ကဏ္ဍအသီးသီးမှာ ရှုံးနိမ့်လို့ မြော့မြော့သာကျန်တော့တဲ့ အကြမ်းဖက်စစ်ကောင်စီရဲ့ အခြေအနေအရပ်ရပ်က သက်သေပြနေပါတယ်။

ဘာကြောင့်လဲဆို‌တော့ လွပ်လပ်‌ရေးရပြီးစကတည်းက ပြည်တွင်းစစ်ကြီးနဲ့အတူ ပေါက်ဖွားလာခဲ့တဲ့ စစ်ဂျပိုး လူ့ဂျပိုးတွေကြောင့် နှစ်ပရိစ္ဆေဒကြာမြင့်စွာ ရုပ်ပိုင်း၊ စိတ်ပိုင်း ချုံးချုံးကျသွားခဲ့လို့ နာတာရှည်ရောဂါသည်ပမာ ဖြစ်ခဲ့ရတဲ့ နိုင်ငံတနိုင်ငံကို ထပ်ပြီး အာဏာရူး သမ္မတရူး မင်းအောင်လှိုင်နဲ့ စစ်အခွင့်ထူးခံ ဗိုလ်ယုတ်တသိုက်ဟာ မြေနိမ့်ရာလှံစိုက်၊ ရေနစ်သူ ဝါးကူထိုးသလို ဒုက္ခပင်လယ်ဝေနေတဲ့ ပြည်သူတွေကို ရိုင်းစိုင်းကောက်ကျစ်စွာ အာဏာလုပြီး ငရဲတွင်းထဲ ထပ်မံတွန်းချခဲ့တာမို့ ပြည်သူအများစုက သေမထူး နေမထူးတဲ့ ဘဝမှာ မိမိတို့ရှိတဲ့ အင်အားနဲ့ မီးကုန်ယမ်းကုန် စုပေါင်း ဝိုင်းဝန်းဆန့်ကျင် ဖယ်ရှားနေကြလို့ပဲ ဖြစ်ပါတယ်။

တကယ်တော့ ပြည်သူတွေကို နှစ်ပေါင်း ၇၀ ကျော် အနိုင်ကျင့်ဗိုလ်ကျ သတ်ဖြတ် အခွင့်ထူးခံခဲ့‌လေ့ရှိတဲ့ စစ်အာဏာရှင်စနစ်ဟာ အများပြည်သူတွေ၊ ပြည်တွင်း ပြည်ပက လက်မခံတော့တဲ့ အခြေအနေအရပ်ရပ်နဲ့ ဖိအားတွေကြောင့် ပြောင်မိုက်‌ကျေးခွဲပြီး အာဏာလုတဲ့ ပုံစံကို ဆက်လက်ကျင့်သုံးလို့မရနိုင်တာကို ဘာကြောင့်လဲဆိုတာ ပြောရရင် အဖိနှိပ်ခံ အများပြည်သူတွေဟာ အကြောက်တရားကို ကျော်လွှားလွန်မြောက်ရုံသာမက စစ်အာဏာရှင် ကျွေးတဲ့ အလိမ်အညာဂျင်းတွေ မတိုးနိုင်အောင် နိုင်ငံရေးအသိ၊ နိုင်ငံရေးရေချိန်အမြင့်ဆုံးကို တက်လှမ်းရောက်ရှိသွားလို့ပဲ ဖြစ်ပါတယ်။ 

မြန်မာ့နိုင်ငံရဲ့သမိုင်းမှာ နာမည်ဆိုးနဲ့ မှတ်တမ်းဝင်ခဲ့တဲ့ စစ်အာဏာရှင်တွေဟာ ပြည်သူလူထုကို သူတို့ အာဏာလုယူတာကို ဖုံးကွယ်ဖို့အတွက် အလိမ်အညာ ဂျင်း ၃ ကြိမ်ကျွေးခဲ့ပါတယ်။

ပထမဆုံးဂျင်းကတော့ ၁၉၆၂ ခုနှစ်မှာ စစ်ဗိုလ်ယုတ်ကြီး နေဝင်းက ပြည်သူက ရွေးကောက်တင်မြှောက်ခဲ့တဲ့ ပါလီမန်အစိုးရလက်ထဲကနေ အာဏာသိမ်းယူတော့ မြန်မာ့နည်းမြန်မာ့ဟန် ဆိုရှယ်လစ်စနစ်ကို တည်ဆောက်မယ်လို့ ကြေညာပြီး ဂျင်းအကြီးကြီး ကျွေးခဲ့ပါတယ်။ ပြည်သူတွေ အငိုက်မိပြီး ပထမဆုံးဂျင်းမိခဲ့ကြပါတယ်။

ဒုတိယအကြိမ်ဂျင်းကတော့ ၁၉၈၈ ရှစ်လေးလုံးလူထုအရေးတော်ပုံကြီးကို လက်နက်နဲ့ အကြမ်းဖက်နှိမ်နင်းပြီး အာဏာလုယူပြီးတဲ့နောက် ပါတီစုံစနစ်ထူထောင်ပြီး ရွေးကောက်ပွဲ လုပ်ပေးမယ်၊ အနိုင်ရပါတီကို အာဏာလွှဲပေးမယ်ဆိုပြီး ကတိပေးလိမ်ညာတဲ့ ဂျင်းပါပဲ။ တကယ်တမ်းကျတော့ အနိုင်ရ NLD ပါတီကို အာဏာလွှဲမပေးခဲ့ဘဲ ဖွဲ့စည်းပုံအခြေခံဥပဒေအသစ် ရေးဆွဲရမယ် အကြောင်းပြပြီး အမျိုး ဘာသာသာနာ တည်တံ့ဖို့ စည်းကမ်းပြည့်ဝသော ဒီမိုကရေစီဆိုတာကြီး သွားမယ်ဆိုတဲ့ဂျင်းကို တချို့‌သော နိုင်ငံ‌ရေးအသိ နိမ့်ကျန်ရစ်တဲ့ ပြည်သူတွေက ယုံစားခဲ့ကြပြီး ဂျင်းစားခဲ့ကြပါတယ်။  

ပြည်သူလူထု အလိုမတူဘဲ သူတို့ဘာသာ ဇွတ်ရေးဆွဲပြဋ္ဌာန်းခဲ့တဲ့ ၂၀၀၈ စစ်အခွင့်ထူးခံ ဖွဲ့စည်းပုံအခြေခံ ဥပ‌ဒေကို‌‌ သူတို့ကိုယ်တိုင် ချိုးဖောက်ပြီး နိုင်ငံတော်ရဲ့ အချုပ်အခြာအာဏာ ၃ ရပ်စလုံးကို မတရားသိမ်းပိုက်ပြီး ကံကြမ္မာဆိုးငင်မဲ့ ဟိုက်ဘရစ်ကပြားစစ်အာဏာရှင်စနစ် (Hybrid Military Dictatorship) အသွင်ကူးပြောင်းသွားခဲ့တာပဲ ဖြစ်ပါတယ်။

အခုနောက်ဆုံး သမ္မတရူး မအလနဲ့ နောက်ဆုံးစစ်အာဏာရှင်မျိုးဆက် ကျွေးတဲ့ဂျင်းဖြစ်တဲ့ ဘာသာခြားတွေ အုပ်စီးမခံရအောင် မြန်မာနိုင်ငံကို လူမျိုးခြားတွေ ခြယ်လှယ်လွှမ်းမိုးတာမခံရဖို့ အာဏာလုရပါတယ်၊ ရွေးကောက်ပွဲပြန်လုပ်ပေးပါ့မယ်ဆိုတဲ့ အလိမ်အညာဂျင်းကိုတော့ ဦးနှောက် မှိုတက်နေတဲ့ အစွန်းရောက် မျိုးညစ် ဘာသာညစ် မဘသ အနည်းအကျဉ်းမှအပ တိုင်းရင်းသား ရဟန်းရှင်လူပြည်သူအများစုကို အဲ့ဒီဂျင်းက မတိုးနိုင်တော့ပါဘူး။

တိုင်းပြည်ကို မှန်ကန်တဲ့ အုပ်ချုပ်ပုံစနစ်ဆီရောက်အောင် ပြုပြင်ပြောင်းလဲလို့မရအောင် ပိတ်ဆို့‌တားဆီးနိုင်တဲ့ အဖျက်စွမ်းအားကြီးတဲ့ ဟိုင်းဘရစ်ကပြားစစ်အာဏာရှင်တွေဟာ ပြည်သူ့ဘဏ္ဍာတွေ၊ နိုင်ငံပိုင်မြေယာအ‌ဆောက်အဦတွေ၊ စီးပွားလုပ်ကွက်တွေ ခိုးဆိုးလုယူပြီး စီးပွားရေးအင်အားတောင့်တင်းလာတဲ့အခါ ဒေါ်လာဘီလီယံချီ ငွေကြေးတွေ မသိနားမလည် ရဟန်းရှင်လူ ပြည်သူတွေကို လှည့်ဖြားအယောင်ဆောင်ခဲ့ကြတယ်။

ဟိုက်ဘရစ်စစ်အာဏာရှင်တွေဟာ အမျိုး ဘာသာ သာသနာ မျက်နှာဖုံးစွပ်ပြီး ဘုရားတွေတည်ပြ၊ ခိုးယူထားတဲ့ ဓနဥစ္စာတွေ၊ အခွင့်ထူးခံခွင့်တွေ‌ ပေးအပ်စည်းရုံးပြီး အသိဉာဏ်နဲ့ သီလအားနည်းတဲ့ ရဟန်းရှင်လူပြည်သူတချို့ကို ခွဲထုတ်စည်းရုံးသွေးခွဲခဲ့ကြတယ်။

ပြည်သူအားကို မကိုးစားဘဲ လက်နက်အင်အားကို ကိုးစားတဲ့ ဟိုင်းဘရစ်ကပြား စစ်ခေါင်းဆောင်တွေ ငြိမ်းချမ်းရေးစားပွဲဝိုင်းတွေမှာ မင်းမူနေသရွေ့ နိုင်ငံတော်ဟာ သွေးမတိတ်နိုင်ဘဲ စစ်ပွဲတွေဆက်ဖြစ်နေအုံးမယ်ဆိုတာ သူတို့ဦး‌ဆောင်ခေါ်ယူပြီး မအောင်မြင်ခဲ့တဲ့ ငြိမ်းချမ်းရေးစားပွဲဝိုင်းတွေက ညွှန်ပြနေပါတယ်။

နိုင်ငံတနိုင်ငံ တိုးတက်ဖွံ့ဖြိုးချမ်းသာ တည်ငြိမ်အေးချမ်းဖို့ဆိုရင် နိုင်ငံတော်အဆင့် ဥပဒေတွေဟာ ခေတ်နဲ့ လျော်ညီရမယ့်အပြင် လူနည်းတစုအတွက်မဖြစ်စေဘဲ အများပြည်သူတွေ အကျိုးစီးပွားကို ကာကွယ်စောင့်ရှောက်နိုင်အောင် ခိုင်မာမှန်ကန်နေဖို့ လိုအပ်ပါတယ်။

၂၀၂၁ ခုနှစ် ဖေ‌ဖော်ဝါရီ ၁ ရက်နေ့မှာ အာ‌ဏာလုယူခဲ့ပြီးတဲ့နောက် စစ်ရာဇဝတ်ကောင်တွေဟာ အောက်ပါနည်းလမ်းတွေနဲ့ တိုင်းသူပြည်သားတွေကို အဆိပ်ခတ်ကြပြန်ပါတယ်။

၁) လူမျိုးခြား၊ နိုင်ငံခြားသားမုန်းတီးစိတ်တွေလှုံ့ဆော်ခဲ့ကြပါတယ်။

၂) ထိရှလွယ်တဲ့ ဘာသာခြားမုန်းတီးရေးကိုဗန်းပြပြီး သူတို့ကိုယ်သူတို့ တိုင်းပြည်ကယ်တင်ရှင်လို ထင်ရအောင် ကြံစည်လုပ်ကိုင်ခဲ့ကြပါတယ်။

၃) တိုင်းရင်းသားတွေကို မျှော်လင့်ချက်အမှား‌ပေးပြီး ကိုယ့်ပြည်နယ်မှာ ကိုယ့်ဝန်ကြီးချုပ် ကိုယ်ခန့်နိုင်အောင် ပုဒ်မ ၂၆၁ ပြင်ဖို့နဲ တိုက်တွန်းရင်း တိုင်းရင်းသားတွေ မျက်စိလည်အောင် ဆောင်ရွက်ခဲ့ကြပါတယ်။

၄) အမျိုးဘာသာသာသနာစောင့်ရှောက်ဟန်ဆောင်ပြီး ဘုရားတည်ပြ၊ စေတီတည်ပြလုပ်ပြီး မသိနားမလည်တဲ့ ရဟန်းသံဃာ‌တွေနဲ့ လူထုကိုအယုံသွင်းခဲ့ကြပါတယ်။

၄) အွန်လိုင်းမှာ သတင်းတု သတင်းမှားတွေဖန်တီးပြီး ယုံလွယ်တဲ့လူတွေကို လမ်းမှားလိုက်အောင်လှုံ့ဆော်ခဲ့ကြပါတယ်။

၅) တုတ်၊ ဓားလက်နက်တွေနဲ့ အကြမ်းဖက်ဗိုလ်ကျ အနိုင်ကျင့်ချင်တဲ့စိတ်တွေ လှုံ့ဆော်ခဲ့ကြပါတယ်။

၆) ဥပဒေအထက်ထိုင်ပြီး အဂတိ ၄ ပါးစလုံး လိုက်စားပြီး ဥပဒေမစိုးမိုးအောင် ကျူးလွန် ဖောက်ဖျက်ခဲ့ကြပါတယ်။

အခုချိန်ခါမှာတော့ ဖက်ဆစ်မိစ္ဆာစစ်ဘီလူးတွေ ၂၀၂၀ အထွေထွေရွေးကောက်ပွဲကြီးမှာ ပြည်သူတွေရွေးကောက်တင်မြှောက်လိုက်တဲ့ NLD ပါတီထံကနေ လက်နက်အားကိုးနဲ့ နိုင်ငံ‌တော်အာဏာကိုလုယူခဲ့တာမို့ မတရားမှုကို လက်မခံဘဲ ဆန့်ကျင်တော်လှန်ကြတဲ့ ပြည်သူလူထုကို အကြမ်းဖက်သတ်ဖြတ်ယုတ်မာခဲ့တာ တနှစ်ကျော်သွားခဲ့ပေမဲ့ အခုထက်ထိ စစ်ကောင်စီအာဏာမတည်သေးပါဘူး။ 

မှန်းချက်နဲ့ နှမ်းထွက်မကိုက်ဘဲ စစ်အာဏာလုပွဲ မအောင်မြင်ခဲ့တာမို့ ပြည်သူပြည်သားတွေအပေါ် အငြိုးအတေးထားပြီး နောက်ဆုံးလက်ကျန်အချိန်မှာ အရက်စက်ဆုံးနည်းလမ်းတွေနဲ့ နိုင်ငံသူနိုင်ငံသားတွေကို အရှင်လတ်လတ် မီးရှို့သတ်၊ မြို့ပေါ်ကျေးလက်ဒေသတွေမှာ အိုးအိမ်တွေ မီးရှို့ဖျက်ဆီး၊ သူတို့ရဲ့မတရားမှုကို ဆန့်ကျင်ကြတဲ့ ပြည်သူတွေ၊ နိုင်ငံရေးလှုပ်ရှားတက်ကြွသူတွေရဲ့ အိမ်ရာတွေကို သိမ်းဆည်းချိပ်ပိတ်၊ ပြည်သူအိမ်ရာတွေကို တိုက်လေယာဥ်နဲ့ ဗုံးကြဲ တိုက်ခိုက်နေကြတဲ့ စစ်ရာဇဝတ်ကောင် အာဏာရှင်အနွယ်အသိုင်းအဝိုင်းတွေ ဆက်ရှင်သန်နိုင်ဖို့ ဘယ်လိုနည်းနဲ့မှ မဖြစ်နိုင်တော့ပါဘူး။

ပြည်သူပြည်သားပေါင်း ၁၅၆၀ ကျော်ကို သတ်ဖြတ်ခဲ့ပြီး ၁၂၀၀၀ ကျော် တရားမဲ့ ဖမ်းဆီးချုပ်နှောင်လို့ ကျင့်ဝတ်မဲ့ ဥပဒေမဲ့ ရမ်းကားနေကြတဲ့ စစ်ရာဇဝတ်ကောင်တွေနဲ့ အမြစ်ပုပ်ပြီး သက်တမ်းကုန်သွားတဲ့ စစ်အာဏာရှင်စနစ် ဘာကြောင့် မရှင်သန်နိုင်တော့ဘူးလဲ၊ သူတို့အတွက် အချိန်များများစားစား မကျန်တော့ဘူး ဆိုတာကို ရဲရဲပြောရဲရသလဲဆိုရင် အောက်ပါညွှန်ကိန်းတွေ ရှင်းရှင်းလင်းလင်း ပြနေတာကြောင့်ပါပဲ။

(က) နိုင်ငံသားအများစုက စစ်ရာဇဝတ်ကောင်တွေနဲ့ စစ်အာဏာရှင် ကွယ်ပျောက်ချုပ်ငြိမ်းမှ အားလုံးဘဝတွေ လုံခြုံအေးချမ်းနိုင်မယ်ဆိုတာ ဘဝပေးအသိ နှလုံးထဲ စွဲမြဲယုံကြည်သွားလို့ပါပဲ။

(ခ) စစ်အာဏာရှင်စနစ်ရှင်သန်ဖို့ အဓိကလိုအပ်ချက်ဖြစ်တဲ့ အကြောက်တရားဟာ ပြည်သူအများစုဟာ ကျော်လွှားလွန်မြောက်ခဲ့လို့ပါပဲ။

(ဂ) စစ်အာဏာရှင်‌ မှိုင်းတိုက်အဆိပ်ခပ်တဲ့ ဂျင်းအမျိုးမျိုးကို ပြည်သူအများစုက မယုံကြည်တော့လို့ပါဘဲ။

(ဃ) လူမျိုးပေါင်းစုံ၊ ဘာသာပေါင်းစုံ၊ မျိုးဆက်ပေါင်းစုံ၊ တိုင်းရင်းသားတော်လှန်ရေး လက်နက်ကိုင်အင်အားစုတွေ၊ နိုင်ငံရေးအင်အားစုအစုံနဲ့ အရပ်သားပြည်သူတွေ စုံညီစွာ လက်တွဲချိတ် ရင်ချင်းအပ်ပြီး ဘုံရန်သူ ဖက်ဆစ်စစ်တပ်ကို အဆုံးထိ တိုက်ထုတ်ဖယ်ရှားဖို့ လက်တွေ့ ညီညွတ်စွာ ပူးပေါင်းဆောင်ရွက်လာကြလို့ပါပဲ။

မင်းကောင်းချစ်