ဥရောပချန်ပီယံဟောင်းအသင်းဖြစ်တဲ့ နော်တင်ဟမ်ဖောရက်အသင်းဟာ မေ ၂၉ ရက် မနေ့ညက ကစားခဲ့တဲ့ ဟတ်ဒါဖီးလ်နဲ့ ပလေးအော့ဖ်ဗိုလ်လုပွဲမှာ ၁ ဂိုး ဂိုးမရှိနဲ့ အနိုင်ရပြီး ပရီးမီးယားလိဂ် တန်းတက် ကစားခွင့်ရရှိခဲ့ပါတယ်။
ဥရောပချန်ပီယံလိဂ်ပြိုင်ပွဲမှာ ချန်ပီယံဖြစ်ဖူးတဲ့ အင်္ဂလန်ကလပ်အသင်း ၅ သင်းသာရှိပြီး နော်တင်ဟမ်ဖောရက်စ်က ၁၉၇၉ နဲ့ ၁၉၈၀ ပြည့်နှစ်ပြိုင်ပွဲတွေမှာ ချန်ပီယံနှစ်ကြိမ် ဆက်တိုက် ရယူနိုင်ခဲ့တာပါ။
အင်္ဂလန်ကလပ်တွေထဲမှာ ဥရောပချန်ပီယံ ၆ ကြိမ်ရရှိထားတဲ့ လီဗာပူးနဲ့ ၃ ကြိမ်ရရှိ ထားတဲ့ မန်ယူအသင်းတို့ ပြီးရင် နော်တင်ဟမ်ဖောရက်က ချဲလ်ဆီးအသင်းနဲ့အတူ ၂ ကြိမ် ရရှိထားပြီး တတိယမြောက် အအောင်မြင်ဆုံးအသင်း ဖြစ်ပါတယ်။
၁၉၉၉ ခုနှစ်မှာ ပရီးမီးယားလိဂ်ပြိုင်ပွဲကို နောက်ဆုံး ကစားခဲ့တဲ့ နော်တင်ဟမ်ဖောရက်အသင်းဟာ ၂၃ နှစ်ကြာမှာ တကျော့ပြန် တန်းတက်ကစားခွင့်ရရှိခဲ့တာပါ။
သူတို့ဟာ အခုနှစ် ချန်ပီယံရှစ်မှာအဆင့် ၄ နေရာမှာ ရပ်တည်ခဲ့ပြီး ပလေးအော့ဖ် ဆီမီးဖိုင်နယ်မှာ ရှက်ဖီးယူနိုက်တက်ကို ပင်နယ်တီအဆုံးအဖြတ်နဲ့ အနိုင်ရခဲ့ပြီး ဗိုလ်လုပွဲမှာ ဟတ်ဒါဖီးလ်တောင်းကို ထပ်ပြီးအနိုင်ရခဲ့တာပါ။
နော်တင်ဟမ်ဖောရက် အသင်းဟာ ၁၉၇၈ ခုနှစ်မှာ အင်္ဂလန်ပထမတန်း ချန်ပီယံတစ်ကြိမ်လည်း ဖြစ်ခဲ့ဖူးပြီး အက်ဖ်အေဖလား ၂ ကြိမ်၊ လိဂ်ဖလား ၄ ကြိမ်၊ ဥရောပစူပါဖလား ၁ ကြိမ် ရယူဖူးတဲ့အသင်းလည်း ဖြစ်ပါတယ်။
