ရန်ကုန်တိုင်းအတွင်းရှိ မြို့နယ်ရေကစားမဏ္ဍပ်တွေမှာ လုံခြုံရေးအနေနဲ့ စွမ်းအားရှင်တွေကို စစ်ကောင်စီတပ်က

နေ့စားခပေးပြီး ခေါ်ထားတယ်လို့ စစ်တပ်နဲ့နီးစပ်သူတွေဆီက သိရပါတယ်။

လှိုင်သာယာ (အရှေ့ပိုင်း) မြို့နယ်မှာ  ဧပြီ ၁၁ က ဖွင့်လှစ်ခဲ့တဲ့ "လှိုင်ပိတောက်မေ" သင်္ကြန်မဏ္ဍပ် ဖွင့်ပွဲအခမ်းအနားမှာ စွမ်းအားရှင်အချို့ကို စစ်တပ်က နေ့စားခပေး ခေါ်ယူတာ သိခဲ့ရတယ်လို့ မြို့ခံတဦးက ဒီဗွီဘီကို ပြောပါတယ်။

"အဲ့နေ့ဖွင့်ပွဲတက်လာတဲ့အထဲမှာ ၂၀၀၇ ရွှေဝါရောင်တော်လှန်ရေးတုန်းက တောင်ဥက္ကလာငွေကြာရံမှာ ဘုန်းကြီးနဲ့နိုင်ငံရေးသမားတွေကို ရိုက်တဲ့သူတွေပါတယ်၊ စစ်တပ်က နေ့စားခပေးပြီး ခေါ်သုံးတာ။" 

၂၀၀၇ ရွှေဝါရောင်တော်လှန်ရေးမှာ  မြောက်ပိုင်းခရိုင်ဥက္ကဋ္ဌ ဗိုလ်မှူးနေလင်း နေ့စားခနဲ့ ခေါ်ယူအသုံးပြုခဲ့သော လှိုင်သာယာမြို့အတွင်းရှိ ရပ်ကွက်နဲ့ကျေးရွာအချို့က စွမ်းအားရှင်တွေ ဖြစ်တယ်လို့ အုပ်ချုပ်ရေးမှူးဟောင်းတဦးက ဒီဗွီဘီကို ပြောပါတယ်။

"အဲ့ဒီတုန်းက ဘုန်းကြီးတွေရိုက်ခဲ့တဲ့ ၁၅ ရပ်ကွက်က ဆင်ကြီး ဝင်းတင်တို့အုပ်စုတော့ မပါဘူး၊ အခြားသူတွေတော့ပါတယ်။ ပုံထဲမှာပါတဲ့သူတွေကြည့်ပြီး မြို့ခံတွေက ဆုံးဖြတ်ပေးလိမ့်မယ်။" 

အလားတူပင် ဒဂုံအရှေ့၊ တာမွေ၊ ရန်ကင်း၊ မြောက်ဒဂုံ စတဲ့မြို့နယ် မဏ္ဍပ်တွေမှာလည်း နယ်ခံ လူမိုက်အချို့နဲ့ စွမ်းအားရှင်တွေကို ခေါ်ထားတယ်လို့ မြို့ခံတွေဆီက သိရပါတယ်။

ဒါ့အပြင်  မြို့နယ်ရေကစားမဏ္ဍပ်တွေမှာ  စစ်တပ်၊ ရဲ၊ စသုံးလုံး၊ ထောက်လှမ်းရေး အစရှိတဲ့ အဖွဲ့အစည်းတွေကို ထားရှိကာ လုံခြုံရေးကို ပိုမိုတင်းကျပ်ထားတယ်လို့ သိရပါတယ်။

ဧရာဝတီတိုင်း၊ မြောင်းမြမြို့မှာ ဖေဖေါ်ဝါရီ ၁ ရက် မနက်ပိုင်းက တပ်မတော်ထောက်ခံပွဲမှာ ပါဝင်သူအချင်းချင်း နေ့စားဆန္ဒပြခ အဝေမတည့်ရာက စကားများရန်ဖြစ်တဲ့အတွက် စစ်ကောင်စီတပ်ဖွဲ့ဝင်တွေက ဝင်ရောက်ဟန့်တားခဲ့ရတယ်လို့ ဒေသခံတွေထံက သိရပါတယ်။

စစ်ကောင်စီ အာဏာသိမ်း ၂ နှစ်မြောက်နေ့မှာ မြန်မာနိုင်ငံအနှံ့ တိတ်ဆိတ်ခြင်းသပိတ် ဆင်နွှဲနေစဉ် စစ်ကောင်စီကလည်း တပ်မတော်ထောက်ခံပွဲတွေ စီစဉ်ပြုလုပ်စေခဲ့ရာမှာ ထောက်ခံသူတွေအချင်းချင်း စကားများ ရန်ဖြစ်ခဲ့တာ ဖြစ်ပါတယ်။

ထောက်ခံပွဲမှာ ပါဝင်သူတွေနဲ့ နီးစပ်သူ ဒေသခံအမျိုးသားတဦးက “စကားများ ရန်ဖြစ်တဲ့ ကိစ္စက ပိုက်ဆံအဝေမတည့်တဲ့ကိစ္စလို့ သိရတယ်။ ကျေးရွာကသူတွေကို နေ့စားနဲ့ ခေါ်လာတယ်။ ပိုက်ဆံရတာ တဦးနဲ့တဦး မတူလို့ စကားများ ရန်ဖြစ်ကြတာ။ အဲ့ဒါကို ဘယ်သူကသွားတိုင်လဲမသိဘူး။ လုံခြုံရေးလိုက်ပေးနေတဲ့ ရဲနဲ့ စစ်တပ်က ရောက်လာပြီး စကားမများနဲ့ အကုန်ဆွဲစိလိုက်မယ်ဆိုမှ ငြိမ်သွားတာ” လို့ ပြောပါတယ်။

မြောင်းမြမြို့မှာ တိတ်ဆိတ်ခြင်းသပိတ် ဆင်နွှဲနေတဲ့အချိန် စစ်ကောင်စီကကျင်းပတဲ့ တပ်မတော်ထောက်ခံပွဲမှာ ပါဝင်ဆန္ဒထုတ်ဖော်သူတွေကို အစားအသောက်နဲ့ ငွေကျပ်တသောင်း ကြံ့ခိုင်ရေးပါတီဝင်တွေက ပေးခဲ့တယ်လို့လည်း မြို့ခံကပြောပါတယ်။

မြောင်းမြတမြို့လုံးနီးပါး တိတ်ဆိတ်ခြင်းသပိတ်ပြုလုပ်နေစဉ် တပ်မတော်ထောက်ခံသူ အင်အား ၁၀၀ ကျော်ဟာ စင်္ကြာနန္ဒာဘုရားရှေ့မှ စတင်ကာ မြို့တွင်း ဗိုလ်ချုပ်ကြေးရုပ်အရှေ့ကတဆင့် မြို့မဘောလုံးကွင်းအထိ ကြွေးကြော်သံတွေနဲ့ ဆူညံစွာ အော်ဟစ် ဆန္ဒပြခဲ့ကြတာပါ။