မြောက်ကိုရီးယားအစိုးရဟာ နိုင်ငံရဲ့ အရှေ့ဘက်ကမ်းရိုးတန်း ပင်လယ်ထဲကို ပဲ့ထိန်းဒုံးကျည်တစင်း မေ ၄ ရက်က ပစ်လွှတ်ခဲ့တယ်လို့ တောင်ကိုရီးယား ပူးတွဲစစ်ဦးစီးချုပ်ရုံး (JCS) က ပြောပါတယ်။
မြောက်ကိုရီးယားအစိုးရက သူ့ရဲ့ နျူကလီးယားတပ်ကို ဖြစ်နိုင်သမျှ အမြန်ဆုံးအရှိန်နဲ့ တိုးတက်အောင်လုပ်ဖို့ ကတိပြုအပြီး သီတင်းတပတ်အကြာမှာ ခုလို ပစ်လွှတ်ခဲ့တာပါ။
ဒုံးကျည်ဟာ အမြင့် ၄၈၅ မိုင်ထိ မြင့်တက်ပျံသန်းခဲ့ပြီး ၂၉၂ မိုင် အဝေးကို ရောက်ခဲ့တယ်လို့ JCS က ပြောပါတယ်။
ဒါဟာ ဒီနှစ်အတွက် မြောက်ကိုရီးယားက ပစ်လွှတ်တဲ့ ၁၄ ကြိမ်မြောက် လူသိတဲ့ လက်နက်စမ်းသပ်မှုပါ။ စမ်းသပ်ချက်တွေထဲမှာ နိုင်ငံရဲ့ နျူကလီးယားစွမ်းရည်ကို မြှင့်တင်ဖို့ ရည်ရွယ်တဲ့ နည်းဗျူဟာမြောက် လမ်းညွှန်လက်နက်သစ်တခု ပါပါတယ်။
တောင်ကိုရီးယားမှာ အသစ်ရွေးကောက်ခံသမ္မတ ယွန်းဆွတ်ခ်ယိုးက မေ ၁၀ ရက်မှာ ကျမ်းသစ္စာကျိန်ဆိုတာ မလုပ်ခင် ရက်ပိုင်းအလိုမှာ စမ်းသပ်ပစ်လွှတ်တာလည်း ဖြစ်ပါတယ်။
မြောက်ကိုရီးယားဟာ ဧပြီ ၁၆ ရက်ကမှ နောက်ဆုံး ဒုံးကျည်ကို ပစ်လွှတ် စမ်းသပ်ထားတာပါ။
ပြုံယမ်းမြို့တော် ဆူနန်ဒေသထဲကနေ မွန်းလွဲပိုင်းမှာ ပစ်လွှတ်ခဲ့တာကို ထောက်လှမ်းတွေ့ရှိထားတယ်လို့ တောင်ကိုရီးယားရဲ့ JCS က ပြောပါတယ်။
ဒီနေရာဟာ နိုင်ငံတကာလေဆိပ်ရှိရာ နေရာလည်း ဖြစ်ပြီး မတ် ၂၄ ရက်က ဟွာဆောင် ၁၇ လို့ခေါ်တဲ့ မြောက်ကိုရီးယားရဲ့ အကြီးဆုံး တိုက်ချင်းပစ် ပဲ့ထိန်းဒုံးကျည် ပစ်လွှတ်စမ်းသပ်ရာ နေရာလို့ မြောက်ကိုရီးယားအစိုးရက ပြောထားပါတယ်။
