ရုရှားသမ္မတ ဗလာဒီမာ ပူတင်က မော်စကိုအနေနဲ့ နျူကလီးယား မပြန့်ပွားရေးနဲ့ မဟာဗျူဟာမြောက် တည်ငြိမ်ရေးအတွက် ဆွေးနွေးပွဲတံခါးကို ဖွင့်လှစ်ထားတယ်လို့ ဇွန် ၃၀ ရက်မှာ ပြောပါတယ်။
ဖေဖော်ဝါရီ ၂၄ ရက်မှာ ရုရှားက ယူကရိန်းနိုင်ငံထဲကို စစ်တပ်တွေစေလွှတ်ပြီး ကျူးကျော်တိုက်ခိုက်တဲ့နောက်ပိုင်း အမေရိကန်ပြည်ထောင်စုနဲ့ ရုရှားတို့ကြားမှာ နျူကလီးယားလက်နက်အရေးဟာ အရေးကြီးတဲ့ကိစ္စ ဖြစ်လာပါတယ်။
ဒီနှစ်နိုင်ငံဟာ ကမ္ဘာမှာ နျူကလီးယားလက်နက် အများဆုံးပိုင်ဆိုင်တဲ့နိုင်ငံတွေ ဖြစ်ကြပြီး နှစ်နိုင်ငံပေါင်း နျူကလီးယားထိပ်ဖူး ၁၁,၀၀၀ ရှိမယ်လို့ ခန့်မှန်းရပါတယ်။
“ရုရှားအနေနဲ့ မဟာဗျူဟာမြောက် တည်ငြိမ်ရေး၊ လူတွေ အစုလိုက်အပြုံလိုက် သေဆုံးစေနိုင်တဲ့ လက်နက်တွေ စည်းမျဉ်းစည်းကမ်းနဲ့အညီ ထိန်းချုပ်ရေး ကိစ္စတို့နဲ့ ပတ်သက်လာရင် ဆွေးနွေးဖို့ တံခါးဖွင့်ထားပါတယ်” လို့ သမ္မတ ပူတင်က သူ့ရဲ့ဇာတိ စိန့်ပီတာစ်ဘာဂ်မြို့မှာ ပြုလုပ်တဲ့ တရားဥပဒေဆိုင်ရာ ဆွေးနွေးပွဲတခုမှာ ပြောတာပါ။
ဒီလိုဆောင်ရွက်တဲ့နေရာမှာ လုံ့လစိုက်ထုတ်ဖို့ လိုအပ်ပြီး ယူကရိန်းနိုင်ငံ ဒွန်းဘက်စ်မှာ ဖြစ်နေတဲ့ အခြေအနေမျိုး ထပ်မကြုံအောင် ဆောင်ရွက်ရမယ်လို့ ဆိုပါတယ်။
ရုရှားဘက်ကတော့ ယူကရိန်းနိုင်ငံ ဒွန်းဘက်စ်ဒေသထဲမှာ ရုရှားနွယ်ဖွားတွေ၊ ရုရှားစကားပြောတဲ့ တိုင်းရင်းသား အနည်းစုတွေကို ကာကွယ်ဖို့ ယူကရိန်းနိုင်ငံမှာ အထူးစစ်ဆင်ရေး တိုက်ခိုက်နေတာလို့ ပြောနေပါတယ်။
ဒါပေမဲ့ ယူကရိန်းနဲ့ အနောက်နိုင်ငံတွေကတော့ ရုရှားရဲ့လုပ်ရပ်ဟာ နယ်မြေကျူးကျော်မှုဖြစ်ပြီး ယူကရိန်းနယ်မြေတွေကို သိမ်းပိုက်ဖို့နဲ့ သမ္မတ ဇလန်းစကီးကို ဖြုတ်ချဖို့ ရည်ရွယ်တယ်လို့ ယူဆပါတယ်။
