စစ်အာဏာသိမ်းပြီးနောက်  မကြုံစဖူး ကုန်ဈေးနှုန်းကြီးမြင့်မှုတွေနဲ့ ရင်ဆိုင်နေရတဲ့ နွမ်းပါးပြည်သူတွေအတွက် ဆန် ၁ ပြည် ကျပ် ၁၀၀၊ ကြက်ဥ ၁၀ လုံး တကတ်ကို ၁၀၀ ကျပ် ဈေးနှုန်းနဲ့ စက်တင်ဘာ ၇ ရက် မွန်းတည့် ၁၂ နာရီမှာ စတင်ရောင်းချပေးသွားမယ်လို့ ရန်ကုန်မြို့က အမျိုးသားအဝတ်အထည် ဖက်ရှင်ဆိုင်တဆိုင်က ကြေညာထားပါတယ်။

ဆန်ပြည် ၄၀၀ နဲ့ ကြက်ဥအလုံး ၃၃၀၀ ကို  တဦးလျှင် ကြိုက်နှစ်သက်ရာ တမျိုး  မကုန်မချင်း ရောင်းချပေးမှာဖြစ်ပြီး လူတွေရုတ်ရုတ်သဲသဲ မဖြစ်အောင် စနစ်တကျတန်းစီပေးဖို့လည်း ရောင်းချပေးသူက မေတ္တာရပ်ခံထားပါတယ်။ 

Aladdin Men Fashion ဆိုင်အနေနဲ့ စားဝတ်နေရေးကျပ်တည်းနေတဲ့ ပြည်သူတွေအတွက် ခုလိုရောင်းချပေးတာဟာ ဒုတိယအကြိမ်ဖြစ်ပြီး ပြီးခဲ့တဲ့ ဩဂုတ် ၁၇ ရက်ကလည်း ပထမအကြိမ် ရောင်းချခဲ့ပါတယ်။

နွယ်အေးစွန္နီဂျာမေဗလီ လူမှုရေးအသင်းကလည်း   ကြက်ဥ ၆ လုံးကို ကျပ် ၁၀၀၀ နှုန်းနဲ့  ရန်ကုန်တိုင်း၊ ဒေါပုံမြို့နယ်ရှိ ရပ်ကွက်တွေမှာ မကြာသေးခင်က   လိုက်လံရောင်းချပေးခဲ့ပါတယ်။

မြန်မာနိုင်ငံမှာ အကြမ်းဖက်စစ်အုပ်စုကမတရားအာဏာသိမ်းယူထားတဲ့ကာလဟာ ၁ နှစ်ခွဲကျော်ထိ ကြာမြင့်လာခဲ့ပြီဖြစ်ကာ ဒီကာလတွေအတွင်း နိုင်ငံရေးမတည်ငြိမ်မှုတွေနဲ့အတူ ပညာရေး၊ ကျန်းမာရေး၊ စီးပွားရေး၊ လူမှုရေးကဏ္ဍတွေအသီးသီးမှာ အဘက်ဘက်က ကျဆင်းနေခဲ့တာပါ။

စီးပွားရေးကဏ္ဍမှာလည်း မြန်မာကျပ်ငွေတန်ဖိုး စံချိန်တင်ထိုးကျပြီး ငွေကြေးဖောင်းပွမှုနဲ့အတူ အလုပ်အကိုင်ရှားပါး၊ အလုပ်လက်မဲ့ပြဿနာတွေကြောင့် ပြည်သူတွေဟာလည်း တနေ့တခြား ပိုမိုဆင်းရဲ ကျပ်တည်းနေပါတယ်။

 ဆိုင်လိပ်စာ-

တိုက်-1,No-003, မြေညီထပ်၊ လေးထောင့်ကန်လမ်းမကြီး၊  CB ဘဏ် မျက်စောင်းထိုး၊ ဘဝမြင့် မှတ်တိုင်အနီး သင်္ကန်းကျွန်းမြို့နယ်၊ရန်ကုန်မြို့။

မန္တလေးမြို့ ချမ်းမြသာစည်မြို့နယ်ရှိ လက်လုပ်လက်စား နွမ်းပါးပြည်သူ အိမ်ထောင်စု ၁၅၀ကို သြဂုတ် ၃၀ ရက်က အခြေခံစားသောက်ကုန်များ လှူဒါန်းခဲ့တယ်လို့ ရင်ဘတ်တူညီနောင်ကယ်ဆယ်ရေးအဖွဲ့က သိရပါတယ်။

ဒီလှူဒါန်းမှုကို မြို့ခံအလှူရှင်တွေ၊ ရင်ဘတ်တူညီနောင်ကယ်ဆယ်ရေးအဖွဲ့နဲ့ Green Cross အဖွဲ့တို့က စုပေါင်းလှူဒါန်းတာ ဖြစ်ပါတယ်။

ဆန်၊ ဆီ၊ ဆား၊ ကြက်သွန်နီ၊ ကြက်ဥ၊ ခရမ်းချဉ်သီး၊ လက်ဖက် စတဲ့ အခြေခံစားသောက်ကုန်တွေကို နွမ်းပါးပြည်သူ အိမ်ထောင်စု ၁၅၀ စုကို ဒုတိယအကြိမ် လှူဒါန်းခဲ့တာပါ။

သြဂုတ် ၂၆ ရက်က ပထမအကြိမ် လှူဒါန်းမှုမှာ ဆင်းရဲနွမ်းပါး အိမ်ထောင်စု ၂၃၄ စုကို လှူဒါန်းပေးခဲ့တာပါ။ ဒီနေ့ထိ ချမ်းမြသာစည်မြို့နယ်မှာ နွမ်းပါးပြည်သူ စုစုပေါင်း အိမ်ထောင်စု ၄၀၀ စုနီးပါးကို လှူဒါန်းပေးခဲ့တာပါ။

နိုင်ငံရေးအကျပ်အတည်း နဲ့ ကိုဗစ်တတိယလှိုင်းကာလ စားဝတ်နေရေး အလွန်ပင် ခက်ခဲနေတဲ့ အိမ်ထောင်စု အများအပြားရှိရာ တတ်နိုင်သူများမှာ စာနာဖေးကူစားနပ်ရိက္ခာများ လှူဒါန်းကြဖို့ တိုက်တွန်းနှိုးဆော်ထားပါတယ်။